އީއައިއޭ ފުރިހަމަނުކޮށް މުރަކަ އިންދުމުން ޖޯލި ރިސޯޓު ޖޫރިމަނާކޮށްފި
30 ދުވަހުގެ ތެރޭގައި އެ ފައިސާ ދެއްކުމަށް ވަނީ އަންގާފައި
ޖޯލި ރިސޯޓުގެ މުރަކަ އިންދުން
އެންވަރަމެންޓަލް އިމްޕެކްޓް އެސެސްމެންޓް (އީއައިއޭ) މަރުހަލާ ފުރިހަމަ ނުކޮށް, ރ. މުރަވަންދޫގައި ހިންގާ ޖޯލި ރިސޯޓުގައި މުރަކަ އާލާ ކުރުމުގެ މަސައްކަތް ފެށުމުން އެ ރިސޯޓު ހިންގާ އަލީބޭ މޯލްޑިވްސް ޕްރައިވެޓް ލިމިޓެޑް ޖޫރިމަނާ ކޮށްފިއެވެ.
އެންވާރަމަންޓް ޕްރޮޓެކްޝަން އެޖެންސީ (އީޕީއޭ) އިން ނެރުނު ބަޔާނެއްގައި ބުނީ ޖޯލި ރިސޯޓުގައި މުރަކަ އާލާ ކުރުމުގެ މަސައްކަތް އަލީބޭ ކުންފުނިން ފަށާފައި ވަނީ އީއައިއޭ މަރުހަލާ ފުރިހަމަ ކުރުމަކާ ނުލާކަން ޔަގީންކުރެވުނީ އެ އެޖެންސީން އެ މައްސަލަ ބަލައި އެއްކުރި މައުލޫމާތުންނާއި, ބަދަލުކުރި ލިޔެކިއުންތަކާއި އަދި ޓޫރިޒަމް މިނިސްޓްރީން ހޯދި މައުލޫމާތުތަކުން ކަމަށެވެ.
ޖޯލި ރިސޯޓު ޖޫރިމަނާ ކޮށްފައި ވަނީ ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު ހެދުމާ ބެހޭ ގަވައިދުގެ 20 ވަނަ މާއްދާގެ ހ. އަށް ރިއާޔަތްކޮށް, އެ ގަވާއިދުގެ ޖަދުވަލު ޖ. ގެ ދަށުންނެވެ. އެ ރިސޯޓު ޖޫރިމަނާކޮށްފައިވަނީ 20,000ރ އިންނެވެ.
މި މަހުގެ 22 ވަނަ ދުވަހު އެ ރިސޯޓު ޖޫރިމަނާކޮށްފައިވާއިރު 30 ދުވަހުގެ ތެރޭގައި އެ ފައިސާ ދެއްކުމަށް އީޕީއޭ އިން ވަނީ އަންގާފައެވެ.
މީގެ އިތުރުން އީޕީއޭ އިން ބުނީ ޖޯލި ރިސޯޓުގައި މުރަކަ އާލާ ކުރަން މިހާރު ކޮށްފައިވާ މަސައްކަތްތަކާއި ގުޅިގެން ރަށުގެ ތިމާވެށީގެ ހާލަތު, އީއައިއޭ ކޮންސަލްޓަންޓެއް މެދުވެރިކޮށް ވަޒަންކުރުމަށްފަހު އެކަމާ ގުޅޭ ރިޕޯޓު ވެސް 30 ދުވަހުގެ ތެރޭގައި ހުށަހެޅުމަށް އެ ރިސޯޓަށް އަންގާފައިވާ ކަމަށެވެ.
