ބަޖެޓު ބަހުސް: ސަރުކާރުން ފައިނޭންސް މެނޭޖްކުރާ ގޮތާއި ޕްރޮޖެކްޓްތައް ކުރިއަށް ގެންދާ ގޮތަށް މެމްބަރުންގެ ފާޑުކިޔުން
ސަރުކާރުން ޢަމަލުކުރާ ގޮތުން ސަރުކާރުގެ ނިޔަތާއި މެދު ސުވާލު އުފެދޭ ކަމަށް މެމްބަރުން ވިދާޅުވި
މަޖިލީހުގެ ޖަލްސާ އެއްގެ ތެރެއިން
ސަރުކާރުން ފައިނޭންސް މެނޭޖްކުރާ ގޮތާއި ޕްރޮޖެކްޓްތައް ކުރިއަށް ގެންދާ ގޮތަށް މެމްބަރުންގެ ފާޑުކިޔުން އަމާޒުކޮށްފިއެވެ.
މެމްބަރުން އެފަދައިން ކަންބޮޑުވުން ފާޅުކުރެއްވީ އާދިއްތަ ދުވަހު ބަޖެޓް ބަހުސްގައި ވާހަކަދައްކަވަމުންނެވެ.
އެގޮތުން ބަޖެޓް ބަހުސް މަރުހަލާގައި ދިއްދޫ ދާއިރާގެ މެމްބަރު އަބްދުﷲ ވަހީދު ވިދާޅުވީ ދައުލަތުގެ ކުންފުނިތައް ސަރުކާރުގެ ބަޖެޓަށް ބަރޯސާވާ މިންވަރު ބަދަލުކުރަން ޖެހޭ ކަަމަށެވެ. އަދި ކޮވިޑަށް ފަހު އެ ހާލަތު ބަދަލުނުވާ ކަމަށާއި ޕްރައިވެޓް ސެކްޓަރ އަށް މިހާރު ބަދަލުތަކެއް ގެންނަން ޖެހޭ ކަމަށް އޭނާ ވިދާޅުވިއެވެ. ހަމައެހެންމެ ރާއްޖޭގެ އިގްތިސާދީ ހަރަކާތް ދެމެހެއްޓެނެވި ގޮތަކަށް ކުރަން ޖެހޭ ކަމަށް އޭނާ ވިދާޅުވިއެވެ.
މީގެ އިތުރުން ތިނަދޫ ދެކުނު ދާއިރާގެ މެމްބަރު އަބްދުﷲ ސަނީފް ވިދާޅުވީ މި ސަރުކާރުން އަމަލުކުރާ ގޮތުން ސަރުކާރަށް ލިބެންވާ ފައިސާ ގެއްލިފައިވާ ކަމަށެވެ. އެގޮތުން ވީއައިއޭގެ މަސައްކަތް ކުރުމަށް ޗައިނާ ހާބަރ ކުންފުންޏަށް ދީފައިވާ މަސައްކަތް ހަވާލުކޮށްފައި ވަނީ 360 މިލިއަން ރުފިޔާ އަށް ކަމަށްވާއިރު އެ މަސައްކަތް ދިގުދަންމާލާފައިވާ ކަމަށް އޭނާ ވިދާޅުވިއެވެ. 2025 އާއި ހަމައަށް ޑިއުޓީ ނުދައްކާގޮތަށް މަސައްކަތް ދިގުދަންމާލާފައިވާ ކަމަށާއި އެކަމުގެ ސަބަބުން ދައުލަތަށް ލިބެން ޖެހޭ ލާރި ނުލިބިވާ ކަމަށް ވެސް ސަނީފް ވަނީ ވިދާޅުވެފައެވެ.
މީގެ އިތުރުން ގުރައިދޫ ދާއިރާގެ މެމްބަރު އިބްރާހިމް ޝާޒް އާއި އިނގުރައިދޫ ދާއިރާގެ މެމްބަރު ހަސަން އަހުމަދު (ހަސަންޓެ) އާއި ދެ ބޭފޫލުންގެން ވެސް ވަނީ މަޝްރޫޢު ކުރިއަށް ގެންދިއުމަކީ ސަރުކާރުގެ ޒިންމާ އެއް ކަމަށް ވިދާޅުވެފައެވެ. އަދި ކުރިއަށް ގޮސްގޮސް ހުރި ކަންކަން ހުއްޓާލުމަށް ސަރުކާރުން ވަކާލާތުކުރާ ކަމަށް ވިދާޅުވެ އެކަމަށް އެ މެމްބަރުން ވަނީ ފާޑުކިޔުން އަމާޒުކުރައްވާފައެވެ. މެމްބަރުން ވަނީ ސަރުކާރުން އަތޮޅުތެރޭގެ މަޝްރޫޢުތަކަށް އިސްކަން ނުދޭ ކަމަށް ވެސް ވިދާޅުވެފައެވެ. އަދި ދަރަނި ބޮޑުވާ ކަމަށް ވިދާޅުވުމަށް ފަހު މި ސަރުކާރުން ޢަމަލުކުރާ ގޮތުން ސަރުކާރުގެ ނިޔަތާއި މެދު ސުވާލު އުފެދޭ ކަމަށް މެމްބަރުން ވިދާޅުވިއެވެ.
