ޔާމީން އަލަށް އުފައްދަވާ ޕާޓީ، ޕީއެންއެފްގެ އިސް މުއައްސިސެއްގެ ގޮތުގައި ދަރިކަލުން ޒޭން
26 ނޮވެމްބަރު 2023 | އާދީއްތަ 08:17އަމާޒަކީ ރާއްޖޭގައި އެންމެ އަވަހަށް އުފައްދާ ސިޔާސީ ޕާޓީގެ ރިކޯޑު ގާއިމު ކުރުން
އިލެކްޝަންސް ކޮމިޝަން (އީސީ) މެންބަރުންނާއެކު ކުރިއަށް ގެންދިޔަ ބައްދަލުވުމުގެ ތެރެއިން
ކުރީގެ ރައީސް އަބްދުﷲ ޔާމީން އަލަށް އުފައްދަވާ ޕާޓީ، ޕީޕަލްސް ނޭޝަނަލް ފްރަންޓް (ޕީއެންއެފް)ގެ އިސް މުއައްސިސެއްގެ ގޮތުގައި ދަރިކަލުން ޒޭން އަބްދުﷲ ޔާމީން ހަމަޖައްސައިފިއެވެ.
އާދިއްތަ ދުވަހު ހެނދުނު މި މަސައްކަތުގައި އިސްކޮށް ހަރަކާތްތެރިވެ ވަޑައިގަންނަވާ ބޭފުޅުން ވަނީ އިލެކްޝަންސް ކޮމިޝަނަށް ވަޑައިގެން، ކޮމިޝަނުގެ މެންބަރުންނާއެކު މަޝްވަރާ ބައްދަލުވުމެއް ބާއްވަވާފައެވެ. މި ބައްދަލުވުމަށްފަހު ނުކުމެވަޑައިގަންނަވާ މީޑީއާތަކަށް މައުލޫމާތު ދެއްވަމުން ކުރީގެ ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު ވިދާޅުވީ، ކުރީގެ ރައީސް ޔާމީންގެ ނަންފުޅުގައި އައު ސިޔާސީ ޕާޓީއެއް އުފެއްދުމަށްޓަކައި ކުރަންޖެހޭ މަސައްކަތްތައް ކުރައްވަމުން ގެންދަވާ ކަމަށެވެ. އަދި ޔާމީން އެ ނިންމެވުން ނިންމަވާފައިވަނީ އެ މަނިކުފާނު ވަރަށް ގިނަ ޚިދުމަތްތަކެއް ކުރެއްވި ޕާޓީ، ބަޔަކު މީހުން ފޭރިގަނެފައިވާތީ ކަމަށް މަލީހު ވިދާޅުވިއެވެ.
އައު ޕާޓީ އުފެއްދުމަށް ކުރައްވަމުން ގެންދަވާ މަސައްކަތްތަކާއި ގުޅޭގޮތުން މަލީހު ވިދާޅުވީ ޕާޓީގެ މުއްސިސުންގެ ގޮތުގައި ޖުމްލަ އަށް ބޭފުޅަކު ހިމަނުއްވަން ނިންމަވާފައިވާ ކަމަށެވެ. އެއީ ޔާމީންގެ ދަރިކަލުން ޒޭން އަބްދުﷲ ޔާމީން، ކުރީގެ ރައީސް އަބްދުﷲ ޔާމީން، ކުރީގެ ނާއިބު ރައީސް ޑރ. މުހައްމަދު ޖަމީލު އަހުމަދު، ކުރީގެ ކޮމިޝަނަރު އޮފް ޕޮލިސް ހުސައިން ވަހީދު، ކުރީގެ ޗީފް އޮފް ސްޓާފް އަހުމަދު މުސްތަފާ، އަދްލީ އިސްމާއިލް، ޑރ. އަބްދުﷲ ޖިހާދު އަދި އަލީ އާދަމް އެވެ. ނަމަވެސް ކޮމިޝަނުގެ ގަވާއިދު އޮންނަ ގޮތުން ޕާޓީއެއް އުފެއްދުމުގެ ހުއްދަ ދެނީ އެންމެ ބޭފުޅަކަށް ކަމަށްވާތީ، ޕާޓީގެ މުއައްސިސްކަން ޒޭނަށް ދިނުމަށް ނިންމަވާފައިވާ ކަމަށެވެ. އަދި އެ ގޮތަށް ނިންމެވީ މަޝްވަރާ ކުރެއްވުމަށްފަހު ކަމަށް މަލީހު ވިދާޅުވިއެވެ.
މީގެ އިތުރުން މަލީހު ވިދާޅުވީ އަމާޒަކީ ރާއްޖޭގައި އެންމެ އަވަހަށް އުފައްދާ ސިޔާސީ ޕާޓީގެ ރިކޯޑު ގާއިމު ކުރުން ކަމަށެވެ. އަދި ޕާޓީ އުފެއްދުމުގެ މަސައްކަތް ފަށައިގަންނަން ހުއްދަ ލިބުނުހާ އަވަހަކަށް ގާނޫނުގައި ބަޔާންކުރާ 3،000 މެންބަރުން ހަމަކޮށް އެންމެ ބޮޑު ސިޔާސީ ޕާޓީއަށް ޕީއެންއެފް ހައްދަވާނެ ކަމަށް މަލީހު ވިދާޅުވިއެވެ.
މަލީހު ވިދާޅުވީ ކުރިއަށް އޮތް މާލޭ ސިޓީގެ މޭޔަރުކަމުގެ ބައި އިލެކްޝަނުގައާއި ރައްޔިތުންގެ މަޖިލިސް އިންތިޚާބުގަައި ހުރިހާ ދާއިރާއަކަށް ޕާޓީގެ ފަރާތުން ކެންޑިޑޭޓުން ވާދަކުރާނެ ކަމަށެވެ. އަދި ބޮޑު އަގުލަބިއްޔަތެއް ލިބޭނެކަމުގެ ޔަގީންކަން އޮތް ކަމަށް ވެސް މަލީހު ވިދާޅުވިއެވެ.
މަލީހު ވިދާޅުވީ ޔާމީނަށް ތާއިދުކުރާ ހުރިހާ މެންބަރުން ވެސް ޕީއެންއެފްއާއި ގުޅުމަށް އެމަނިކުފާނު އެދިވަޑައިގެންފައިވާ ކަމަށެވެ.
