ފަލަސްޠީނުގެ ބިންތަކަށް ވެރިވެގަނެގެން އުޅޭ ޔަހޫދީ އިސްތިޢުމާރީ އިޒްރޭލާއި މިޞްރާ ދެމެދުން، މެޑިޓަރޭނިއަން ކަނޑުގެ އައްސޭރިފަށާ ގުޅިފައި އޮތް ޣައްޒާއަށް މި ދުވަސްވަރަކީ ފިނި މޫސުމުގެ ދުވަސްވަރެވެ. ޣައްޒާ ކޮންޓްރޯލް ކުރަމުންދާ ޙަމާސް ޖަމާޢަތުގެ ވަސް، މި ބިންމަތިން ފޮހެލާނެ ކަމަށް ބުނެ، މީގެ 50 އަކަށް ދުވަސް ކުރިން ޔަހޫދީން ހިންގަން ފެށި ޤަތުލުޢާންމުގައި މުޅި ރަށް އޮތީ ސުންނާފަތި ކޮށްފައެވެ. 4 ދުވަހުގެ މުއްދަތަށް ޙަމަލާތައް ހުއްޓާލާ، ޤައިދީންނާއި އަސީރުން ބަދަލު ކުރުމުގެ އެއްބަސްވުމަކަށް އާދެވިފައި އޮތެއް ކަމަކު، އެ މުހުލަތު ހަމަވުމާއެކު، އެންމެ މަދުވެގެން އަދި 2 މަހެއްހާ ދުވަހަށް ޙަމަލާތައް ދޭނެ ކަމަށް އިޒްރޭލުން މިހާރުވެސް ވަނީ ބުނެފައެވެ.

އެއްގަމާއި، ކަނޑާއި ވައިގެ މަގުން، އެޔެއް މިޔެއް ބެލުމެއް ނެތި އިޒްރޭލުން ދެމުންދާ ޢުދުވާނީ ޙަމަލާތަކުގައި ދިފާޢުވާނެ އެއްވެސް މަގެއް ފެންނަން ނެތް ޣައްޒާގެ ވަޒަންވެރިން މި ދުވަސްތައް ގުނަމުން ދަނީ ޖެހެމުންދާ ފިނިވައިގެ ތެރޭގައެވެ. ވެހެންޏާ ވެހޭހާ ވާރޭއެއްގައެވެ. ކާނެ އެއްޗެއް، ބޯލާނެ ސާފު ފެންފޮދެއްގެ މިންވަރުވެސް ނެތެވެ. ކަރަންޓެއް، ތެލެއް ހަކަތައެއް ނެތެވެ. ޣައްޒާގެ މަސްރަޙު އޮތީ، އިންސާނަކު ދިރިއުޅެން ހެޔޮ ވާ ވަރަށް ވުރެ އިންތިހާ ދެރަކޮށެވެ. ހުޅަނގުގެ ކައްޓާއިން އިންސާނީ ޙައްޤުތައް ވަޒަން ކުރާ ބަޔަކަށް، މި މަންޒަރުތައް ނުވެސް ފެންނަނީއެވެ. ހުރިހާ ވެނަކާއި ތަކުލީފެއް އުފުލަމުން ދަނީ ޣައްޒާގެ ވަޒަންވެރިންނެވެ. އަމިއްލަ ފަސްގަނޑުގައި ބަޔަކު ނިކަމެތި ކޮށްލެވޭނީ އެހާކަންވަރަށެވެ.

ޣައްޒާގެ ކޮންމެ ވަޒަންވެރިއަކުވެސް މިއަދު މަސައްކަތް ކުރަމުން ދަނީ، އެމީހަކަށް ވީ ގޮތަކުން ސަލާމަތާއި ރައްކާތެރިކަން ހޯދޭ ތޯއެވެ. ޣައްޒާގެ އުތުރުން މީހުން ހުސް ކުރުމަށް އިޒްރޭލުން ދިން އިންޒާރާއެކު އެތައް ސަތޭކަ ހާސް ބަޔަކު ބަދަލުވީ ޣައްޒާގެ ދެކުނަށެވެ. ދެކުނުގެ އަވަށެއް ކަމަށްވާ ޚާން ޔޫނިސްއަށް ބަލާލުމުންވެސް ފެންނަނީ މި ދެންނެވި މަންޒަރެވެ. ޖަހާފައިވާ ފެލިގެތަކުން ހިޔާވަހިކަމެއް ލިބޭތޯ މަސައްކަތް ކުރާ މީހުންނެވެ. ފޭލިގެތަކުގެ ބޭރުގައި ދަރުޖައްސައިގެން، ކޮންމެވެސް އެއްޗެއް ރޯފިލުވާލެވޭތޯ މަސައްކަތް ކުރާ މީހުންނެވެ. ތަރައްޤީއާއި ތަހުޒީބުގެ ރޭހުގައި ރޮކެޓް ދުވެލީގައި ކުރިއަރާ ދާ ކަމަށް ވަކާލާތު ކުރާ އަދުގެ ދުނިޔޭގައި، ބިކަކޮށް ހަވާސާކޮށްފައި ވާ ޣައްޒާގައިވެސް ދިރިއުޅެމުން އެ ދަނީ ހަމަ އިންސާނުންނެވެ.

ރާންދާ ޙަމޫދަކީ ޖަބާލިއާ ރެފިއުޖީ ކޭމްޕުގައި އުޅުނު މީހެކެވެ. އޭނާ ބުނި ގޮތުގައި އެ ދުވަހަކީ އެމީހުންނަށް އިންތިހާއަށް ދަތި ދުވަހެކެވެ. މޫސުން ހުރި ގޮތުންނެވެ. ގަދަ ވަޔާއި ވިއްސާރަގަނޑުގެ ތެރޭގައި ޓެންޓުތައް ވިއްސައިގެންގޮސް، ގަދަ ފިނީގައި އެންމެން ތެމި ފޯވީއެވެ.

ރޮއިޓާޒްއާ ވާހަކަދައްކަމުން ރާންދާ ބުނީ، އޭނާ އެދުނުހާވެސް ކަމަކީ ހަނގުރާމަ ހުއްޓި، އިހު އުޅުނު ޢާންމު ދިރިއުޅުމަށް ރުޖޫޢަވެވޭނެ ގޮތް ވުމަށެވެ. ރަޙުމެއް ނެތް އިސްތިޢުމާރީ އިޒްރޭލުގެ ޔަހޫދީން، ފައިބައިގެން ދިއުމަށެވެ.

ޣައްޒާގައި ވެރިކަން ކުރާ ޙަމާސް ޖަމާޢަތުން އޮކްޓޯބަރ 7 ވަނަ ދުވަހު އިޒްރޭލަށް ދިން ޙަމަލާއެއްގެ ރައްދުގައި ކަމަށް ބުނެ، އެންމެ ވަރުގަދަ އަސްކަރީ ބާރުވެރިކަމާއެކު އިޒްރޭލުގެ ޔަހޫދީން ޣައްޒާ ހަފުސް ކުރަން ފެށި ފަހުން، އެ ރަށުގެ ޙާލަތު ވަނީ ގޯހުން ގޯހަށް ގޮސްފައެވެ. މިދިޔަ 16 ވަރަކަށް އަހަރު ދުވަހުވެސް އިންތިހާ ދަތި ޙާލުގައި، ފިތިގެން އޮތް ޣައްޒާގެ ރަށްވެހިންނާ ދެކޮޅަށް އިޒްރޭލުން ފެށި ޤަތުލުޢާންމަށް 2 މަސްވާން ގާތް ވެފައި ވާ އިރު، 2.3 މިލިއަން މީހުންގެ އާބާދީއެއް އޮތް ޣައްޒާގެ އާބާދީގެ 3 ބައިކުޅަ 2 ބައި މީހުންގެ ގެދޮރު ވަނީ ގެއްލިފައެވެ. ފުރާނަ ގެއްލިދިޔަ މީހުންގެ ކަށަވަރު ޢަދަދުތައް ލިބެން ނެތެއް ކަމަކު، އޭގެ ތެރޭގައި ގިނައީ އަންހެނުންނާއި ކުޑަކުދިން ކަމީ އޮޅުވާލެވެން ނެތް ޙަޤީޤަތެކެވެ. ޓެރަރިސްޓުންތަކެއް ނައްތާލުމަށް ކަމަށް ބުނެ ޔަހޫދީން ހިންގަމުންދާ ޤަތުލުޢާންމުގައި ޣައްޒާއިން މަރުވި ކުޑަކުދިންގެ ޢަދަދު މިހާރު 6000 އަށް އަރަނީއެވެ.