ދިރާސީ އަހަރަށް ގެންނަ ބަދަލާއި ގުޅިގެން އެޑިއުކޭޝަން މިނިސްޓަރާއި ސުވާލުކުރަނީ
އެކަޑަމިކް އަހަރަށް ބަދަލު ގެނައުމާއި ގުޅޭގޮތުން މިނިސްޓަރ ވާހަކަ ދައްކަވާފައިވަނީ ޕްރިންސިޕަލުންގެ ބައްދަލުވުމުގައި
މިނިސްޓަރ އޮފް އެޑިޔުކޭޝަން ޑޮކްޓަރ އިސްމާޢީލް ޝަފީޢު
ދިރާސީ އާ އަހަރު ފެށުން، 2025 ވަނަ އަހަރު އަނެއްކާ ވެސް ޖެނުއަރީ މަހަށް ބަދަލުކުރަން ނިންމުމާއި ގުޅިގެމް އެޑިއުކޭޝަން މިނިސްޓަރ ޑރ. އިސްމާއިލް ޝަފީއު މަޖިލީހަށް ހާޒިރުކޮށް ސުވާލުކުރަން ހުށަހަޅައިފިއެވެ.
ދިރާސީ އަހަރަށް ގެންނަ ބަދަލާއި ގުޅިގެން އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މަޖިލީހަށް ހާޒިރުކޮށްދިނުމަށް އެދިވަޑައިގެންފައިވަނީ މީދޫ ދާއިރާގެ މެންބަރު ރޮޒައިނާ އާދަމެވެ. ރޮޒައިނާ ކުރެއްވި ޓްވީޓެއްގައި ވިދާޅުވެފައިވަނީ ދިރާސީ އާ އަހަރު ފެށުން، 2025 ވަނަ އަހަރު އަނެއްކާ ވެސް ޖެނުއަރީ މަހަށް ބަދަލުކުރާއިރު ކުދިންގެ ކިޔެވުމަށް ވާނެގޮތަކާމެދު ބެލެނިވެރިންގެ ކަންބޮޑުވުން އޮތުމާއެކު މިކަން ކުރަންއުޅޭގޮތެއް ދެނެގަތުމަށް މިނިސްޓަރަށް ވާނީ ސުވާލު ހުށައަޅާފައި ކަމަށެވެ.
ރޮޒައިނާ ކުރައްވާ ސުވާލެއްގެ ގޮތުގައި ރޮޒައިނާ ހުށަހަޅުއްވާފައިވާ ސުވާލަކީ 2025 ވަނަ އަހަރުން ފެށިގެން ދިރާސީ އައު އަހަރުގެ ފެށުން ޖެނުއަރީ މަހަށް ބަދަލުކުރައްވާނެ ކަމަށް، މާލޭ ސަރަހައްދުގެ ސްކޫލްތަކުގެ ޕްރިންސިޕަލުންނާއި ބައްދަލުކުރައްވާ، މިނިސްޓަރު ވިދާޅުވެފައިވާ ކަމަށެވެ. އަދި އެކަމުގެ ސަބަބުން ކިޔަވާކުދިންގެ ކިޔެވުމަށް އަސަރުކޮށް، އެ ކުދިންގެ އުމުރުން ބައެއް އަނެއްކާވެސް ގެއްލިގެން ހިނގައިދާނެކަމުގެ ބިރު ބެލެނިވެރިންނަށް އޮތުމާއެކު، މިހާރު ހިނގަމުންދާ ދިރާސީ އަހަރު، 2024 ވަނަ އަހަރުގެ ޖޫން މަހުގައި ނިމޭއިރު، އެ ތާރީހާއި، އަލަށް ފެށުމަށް ހަމަޖެހިފައިވާ ދިރާސީ އަހަރާ ދެމެދު ހޭދަވާ މުއްދަތުގައި ދަރިވަރުންގެ ކިޔެވުމާ ގުޅިގެން މިނިސްޓްރީއިން ވިސްނަވާފައިވާ ގޮތަކީ ކޮބައިކަން އޮޅުން ފިލުއްވައިދެއްވުމަށެވެ.
ނޮވެމްބަރު މަހުގެ 20 ވަނަ ދުވަހު މާލޭގެ ސްކޫލްތަކުގެ ޕްރިންސިޕަލުންނާއެކު ބައްދަލުކުރައްވާ މިނިސްޓަރ ވަނީ ދިރާސީ އައު އަހަރު, އަހަރުގެ ކުރީކޮޅަށް ބަދަލުކުރެއްވުމާއި ގުޅޭގޮތުން މަޝްވަރާކުރައްވާފައެވެ. ނަމަވެސް މިކަން ތަންފީޒުކުރަން ފަށާނެ ވަކި އަހަރެއް އަދި ކަނޑައަޅުއްވާފައި ނުވާކަމަށް އެޑިއުކޭޝަން މިނިސްޓްރީން ބުނެއެވެ.
