ސައުދީ ޕްރޯ ލީގުގައި އަލް އިއްތިފާގާ ދެކޮޅަށް ކުޅުނު މެޗުން، އަލް އިތިހާދު އެއްވަރު ވެއްޖެ އެވެ.

ލީގުގައި ހުކުރު ދުވަހުގެ ރޭ ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މިއީ، ދާދި ފަހުން އެ ޓީމުގެ ކޯޗުކަމާ ހަވާލުވި އާޖެންޓީނާގެ މާސެލޯ ގަލާޑޯގެ އިރުޝާދުގެ ދަށުން ކުޅުނު ފުރަތަމަ މެޗެވެ. އެ ޓީމުގެ ކުރީގެ ކޯޗު، ޕޯޗުގަލްގެ ނޫނޯ އެސްޕިރިޓޯ ސަންޓޯ މަގާމުން ވަކު ކުރީ ނަތީޖާ ނުނެރެވޭތީ އެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ އަލް އިއްތިފާގުންނެވެ. މެޗުގެ 41 ވަނަ މިނެޓުގައި އެ ޓީމަށް ލީޑު ނަގައިދިނީ ނެދަލެންޑްސްގެ ޖޯޖީނިއޯ ވައިނަލްޑަމް އެވެ. އަލް އިއްތިހާދުން މެޗުގެ ނަތީޖާ ހަމަހަމަ ކުރީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ނުވަ ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ، ޙަމަދުﷲ އެވެ. އޭގެ ފަހުން އެ ޓީމަށް ލީޑު ނަގައިދޭން ކެޕްޓަން ކަރީމް ބެންޒެމާ އަށް ވަނީ ރަނގަޅު ފުރުސަތު ލިބި، ބޭކާރުވެފަ އެވެ.

މި ނަތީޖާ އާއެކު އެންމެ ފަހުގެ ޗެމްޕިއަން އިލް އިއްތިހާދު އޮތީ ލީގު ތާވަލްގެ ހަތަރު ވަނައިގަ އެވެ. އެއީ މިހާތަނަށް ކުޅުނު 14 މެޗުން 25 ޕޮއިންޓު ހޯދައިގެންނެވެ. އަލް އިއްތިފާގު އޮތީ 14 މެޗުން 23 ޕޮއިންޓާއެކު ހަތް ވަނައިގަ އެވެ. މެޗުން މޮޅުވެ، ތިން ވަނަ އަށް ޖެހިލުމުގެ ފުރުސަތު ވެސް އަލް އިއްތިހާދަށް އޮތެވެ.