ހަމާސް ޖަމާއަތުން ހޮނިހިރު ދުވަހު ދޫކުރާނެ ރަހީނުންގެ ލިސްޓު އިސްރާއީލަށް ލިބިއްޖެ

ފަލަސްތީނުގެ ހަމާސް ޖަމާއަތުން ރަހީނުކޮށްފައިވާ އިސްރާއީލުގެ ރައްޔިތުންގެ ތެރެއިން، ހޮނިހިރު ދުވަހު ދޫކުރަން ހަމަޖެހިފައިވާ މީހުންގެ ލިސްޓެއް އިސްރާއީލަށް ލިބިފައިވާކަމަށް އޮފިޝަލުން ބުނެފިއެވެ.

އިސްރާއީލުގެ ސަލާމަތީ އޮފިޝަލުން އެ ލިސްޓު މުރާޖައާކުރަމުން އަންނަކަމަށް، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ނެރުނު ބަޔާނެއްގައި ބުނެފައިވެއެވެ.  

އޮކްޓޯބަރު މަހުގެ ހަތްވަނަ ދުވަހު އިސްރާއީލަށް ދިން ހަމަލާއެއްގައި ހަމާސް ޖަމާއަތުން އަތުލައިގަތް އެންމެން މިނިވަންކުރުމަށް މަސައްކަތް ކުރާނެކަމަށް ސަރުކާރުން ވައުދުވެފައިވާ ކަމަށް އެބަޔާނުގައި ބުނެފައިވެއެވެ.

އައިސީއާރްސީން ބުނީ، އިސްރާއީލުގެ އަންހެނުންނާއި ކުޑަކުދިންނާއި ތައިލެންޑުގެ ދަނޑުތަކުގައި މަސައްކަތްކުރާ މީހުން ހިމެނޭގޮތުން، ދޫކޮށްލި މީހުން ޣައްޒާއިން ބޭރަށް ބަދަލުކޮށް، ރަފާ ބޯޑަރު ކްރޮސިންގގައި މިސްރުގެ ކަމާބެހޭ ފަރާތްތަކާ ހަވާލުކޮށްފައި ވާކަމަށާއި، އިންޓަނޭޝަނަލް ކޮމިޓީ އޮފް ދަ ރެޑް ކްރޮސް (އައިސީއާރްސީ)ގެ 8 މުވައްޒަފަކާއެކު ހަތަރު ކާރުގެ ގާފިލާއެއްގައި ތިބިކަމަށެވެ. އެއަށްފަހު އެމީހުން އިސްރާއީލަށް ގެންދިޔައީ މެޑިކަލް ޗެކްކުރުމާއި ގާތްތިމާގެ މީހުންނާ އަލުން ބައްދަލުވުމަށެވެ.

ހަނގުރާމައިގެ އެއްބަސްވުމުގެ މެދުވެރިއެއްގެ ގޮތުގައި ހަރަކާތްތެރިވި ގަތަރުން ބުނީ، އިސްރާއީލުގެ 13 މީހަކު ދޫކޮށްލާފައިވާކަމަށާއި، އޭގެ ތެރެއިން ބައެއް މީހުންނަކީ ދެ ގައުމަށް ނިސްބަތްވާ މީހުން ކަމަށެވެ. އަދި އޭގެތެރޭގައި ތައިލެންޑުގެ 10 މީހަކާއި ފިލިޕީންސުގެ ދަނޑުވެރިއެއް ހިމެނޭކަމަށެވެ. އަނެއްކޮޅުން އިސްރާއީލުގެ ޖަލުތަކުން ފަލަސްތީނުގެ 39 އަންހެނުންނާއި ކުޑަކުދިން ވަނީ ދޫކޮށްލާފައެވެ.

އިސްރާއީލުން މިނިވަންކުރި މީހުންގެ ތެރޭގައި އެއް އާއިލާއެއްގެ ހަތަރު މީހުންނާއެކު ހަތަރު ކުޑަކުދިންނާއި އުމުރުން ދުވަސްވީ ފަސް އަންހެނުން ހިމެނެއެވެ.

އެމެރިކާގެ ރައީސް ޖޯ ބައިޑަން ވިދާޅުވީ ހަނގުރާމަ ހުއްޓާލުމުގެ މުއްދަތު އިތުރުކުރުމުގެ ހަގީގީ ފުރުސަތު އެބައޮތް ކަމަށާއި، ހަމަލާތައް މެދުކަނޑާލުމަކީ ޣައްޒާއަށް އިންސާނީ އެހީ ހޯދުމަށް ލިބުނު މުހިންމު ފުރުސަތެއް ކަމަށެވެ.

އިސްރާއީލާއި ހަމާސްގެ ހަނގުރާމަ ދެމިއޮންނާނީ ކިހާ ދުވަހަކަށް ކަމެއް ބައިޑަން ވިދާޅެއްނުވެއެވެ. ނޫސްވެރިންގެ ބައްދަލުވުމެއްގައި، އޭނާގެ އުންމީދަކީ ކޮބައިތޯ ދެންނެވުމުން ބައިޑަން ވިދާޅުވީ، ހަމާސް ނައްތާލުމުގައި އިސްރާއީލުގެ އަމާޒަކީ ސައްހަ މަގުސަދެއްނަމަވެސް އުނދަގޫ މިޝަނެއް ކަމަށެވެ. ބައިޑަން ވިދާޅުވީ އެކަމަށް ކިހާ ދުވަހެއް ނަގާނެކަމެއް ނޭނގޭކަމަށެވެ.

ފަލަސްތީނު ރެޑް ކްރެސެންޓް ސޮސައިޓީން ބުނީ، މިދިޔަ ހުކުރު ދުވަހު ރަފާހް ކްރޮސިންގ މެދުވެރިކޮށް އިންސާނީ އެހީގެ 196 ޓްރަކް ފޯރުކޮށްދީފައި ވާކަމަށާއި، މިއީ ހަމާސްއިން އިސްރާއީލަށް ދިން ހަމަލާގެ ބަދަލުހިފުމުގެ ގޮތުން އިސްރާއީލުން އެ ސަރަހައްދަށް ބޮން އެޅުމަށްފަހު ޣައްޒާއަށް ދިން އެންމެ ބޮޑު އެހީގެ ގާފިލާއެއް ކަމަށެވެ. އޮކްޓޯބަރު މަހުގެ 21 ވަނަ ދުވަހުން ފެށިގެން މިހާތަނަށް 1،759 ޓްރަކް އެންކްލޭވްއަށް ވަދެފައިވާކަމަށް އެ އިދާރާއިން ބުނެއެވެ.

އިސްރާއީލު ރައްޔިތުންގެ ތަފާތު އިހުސާސްތައް

ރަހީނުކުރި މީހުންގެ އާއިލާތަކުން ތަފާތު ޝުއޫރުތަކާއި އިހުސާސްތައް ފާޅުކުރަމުން ދިޔައީ ބާކީތިބި މީހުންނަށް ވާނެ ގޮތެއް ނޭނގޭތީއެވެ.

އިސްރާއީލުގެ ޗެނަލް 12އަށް ދިން އިންޓަވިއުއެއްގައި އުމޭރު ޝެމް ޓޮވް، 21، ގެ މަންމަ ޝެލީ ޝެމް ޓޮވް ބުނީ، މިއަދު ލޯބިވާ މީހުންގެ ގައިގައި ބައްދާލަން ފުރުސަތު ލިބުނު އާއިލާތަކާމެދު ވަރަށް އުފާކުރާ ކަމަށެވެ.

އިސްރާއީލުގެ ނޫސްތަކުން ބުނާގޮތުގައި އޮކްޓޯބަރު މަހު ދިން ހަމަލާގައި ހަމާސްގެ ހަނގުރާމަވެރިން ވަނީ 1،200 މީހުން މަރާލައި، ގާތްގަނޑަކަށް 240އްހާ މީހުން ރަހީނުކޮށްފައެވެ.

އޭގެ ފަހުން އިސްރާއީލުން، ހަމާސްގެ ވެރިކަންކުރާ އެންކްލޭވްއަށް ބޮމުގެ ވާރޭ ވެއްސައި، ޣައްޒާގެ 14،000ށްވުރެ މީހުން ޝަހީދުކޮށްލައިފާ ވާއިރު، އޭގެ ތެރެއިން ގާތްގަނޑަކަށް 40 އިންސައްތައަކީ ކުޑަކުދިން ކަމަށް ފަލަސްތީނުގެ ސިއްހީ އިދާރާތަކުން ބުނެއެވެ.

ޣައްޒާގެ 2.3 މިލިއަން މީހުންގެ ތެރެއިން އެތައް ހާސް ބަޔަކު ގެދޮރު ދޫކޮށް ގޮސްފައިވާއިރު، އޭގެ ތެރޭގައި އެންކްލޭވްގެ އުތުރުކޮޅުގެ ގިނަ މީހުންވެސް ހިމެނެއެވެ.

ދޫކޮށްލި މީހުންގެ ފުރަތަމަ މެޑިކަލް ޗެކްތައް ހެދުމަށްފަހު އާއިލާއާ އަލުން ގުޅެން ގެންދިއުމުން މެޑިކަލް އޮތޯރިޓީން ބުނީ، އެ މީހުންގެ ޖިސްމާނީ ހާލު ރަނގަޅުކަމަށް ފެންނަކަމަށާއި އިތުރު އިވެލުއޭޝަންތައް ހަދަމުން އަންނަކަމަށެވެ.

އޮހަދު މުންދަރުގެ ތިމާގެ މީހެއް ކަމަށްވާ ރޯނީ ހަވީވް ބުނީ، ނުވަ އަހަރުގެ އޮހަދު މުންޑާއަށް އޭނާގެ ފޭވަރިޓް ޓޯއީ ދިނުމަށް އުއްމީދުކުރާ ކަމަށެވެ.

ފަލަސްތީނު ރައްޔިތުންގެ އިހުސާސް

މިދިޔަ ހުކުރު ދުވަހު ދޫކޮށްލި މީހުންގެ ތެރޭގައި އިސްރާއީލުގެ ޖަލަށްލާފައިވާ ފަލަސްތީނުގެ 24 އަންހެނަކާއި 15 ކުޑަކުދިން ހިމެނެއެވެ. ގައިދީން ދޫކޮށްލުމުގެ ކުރިން އިސްރާއީލު ފުލުހުން ވަނީ ގުދުސްގައި ތިބި އެ މީހުންގެ އާއިލާތަކުގެ ގެތައް ބަލައި ފާސްކޮށްފައިކަމަށް، ކަމާބެހޭ ފަރާތްތަކުން ބުނެއެވެ. މިކަމާ ގުޅޭގޮތުން ފުލުހުން ވަކި އެއްޗެއް ބުނެފައެއް ނުވެއެވެ.

އަދިވެސް އުފާވެރިކަން އިހުސާސްކުރަން ބިރުގަންނަ ކަމަށާއި، ހަމަ އެއާއެކު ޣައްޒާގައި ހިނގަމުންދާ ކަންކަމުގެ ސަބަބުން އުފަލުގައި ތިބުމުގެ ފުރުސަތު އެމީހުންގެ ކިބައިގައި ނެތްކަމަށް އެ އަންހެން މީހާ ބުންޏެވެ.

މަޝްވަރާތަކާ ބެހޭގޮތުން މައުލޫމާތު ދިން ފަރާތަކުން ބުނީ، ތައިލެންޑުގެ މަސައްކަތްތެރިން ދޫކޮށްލުމަކީ ހަނގުރާމައިގެ މަޝްވަރާތަކާ ގުޅުމެއް ނެތް ކަމެއް ކަމަށާއި، އެއީ މިސްރާއި ގަތަރުން މެދުވެރިވާ ވަކި ޓްރެކަކަށް ތަބާވި ކަމެއް ކަމަށެވެ.

ދެ ފަރާތުންވެސް ބުނެފައިވަނީ، ހަނގުރާމަ ހުއްޓާލަން އެއްބަސްވި މުއްދަތު ނިމުނުހާ އަވަހަކަށް ހަނގުރާމަ އަލުން ފަށާނެކަމަށެވެ.