ވިޓޯ ރޯކް ރަޖިސްޓަރ ކުރަން ލަލީގާއިން ބާސެލޯނާ އަށް ހުއްދަދީފި

ބްރެޒިލްގެ ފޯވަޑް ވިޓޯ ރޯކް ރަޖިސްޓަރ ކުރަން ސްޕެނިޝް ލީގުން ބާސެލޯނާ އަށް ހުއްދަދީފި އެވެ.

މިއީ އެ ކުލަބުގެ މިޑްފީލްޑަރު ގަވީ ސްޕޭނުގެ ގައުމީ ޓީމަށް ކުޅެނިކޮށް އަނިޔާވެ މި ސީޒަނުގެ ބާކީބައިގައި ނުކުޅެވޭނެކަން ޔަގީންވުމާއެކު ދިން ހުއްދައެކެވެ. ސަބަބަކީ އިތުރު ކުޅުންތެރިއަކު ލިސްޓުގައި ހިމެނުމަށް ބާސެލޯނާއިން އެދިފައިވުމާއި ގަވީގެ މުސާރައިގެ 80 ޕަސެންޓް އައު ކުޅުންތެރިއަކު ރަޖިސްޓަރ ކުރުމަށް ބޭނުންކުރެވޭނެތީ އެވެ.

އުމުރުން 18 އަހަރުގެ ވިޓޯ ރޯކް ބާސެލޯނާ އަށް އައުމަށް ކުރިން ވެސް ހަމަޖެހިފައި އޮތީ އަންނަ ޖެނުއަރީ މަހު އެވެ. ނަމަވެސް މިކަން މުޅިން ހަމަޖެހިގެންދާނީ ބާސެލޯނާއިން ދައްކަންޖެހޭ 40 މިލިއަން ޑޮލަރު އެ ކުލަބަށް ދެއްކޭނެ މާލީ ތަނަވަސްކަން ހަމަޖެހިއްޖެނަމަ އެވެ.

ގަވީ އަށް އަނިޔާވުމާ ގުޅިން ބާސެލޯނާއިން އަންނަނީ ޖެނުއަރީ މަހު މިޑްފީލްޑަރަކު ގެނައުމަށް ވަރަށް ބޮޑަށް މަސައްކަތް ކުރަމުންނެވެ. މި ގޮތުން އެ ކުލަބުން ވިސްނަމުންދާ ކުޅުންތެރިންގެ ތެރޭގައި އާޖެންޓީނާގެ ލެސޮލްސޯ އާއި ރެއާޅް ސޮސިއޭޑާޑްގެ ޒުބިމެންޑީ ހިމެނެ އެވެ.