ސްޕެނިޝް ލީގުގައި ރެއާލް ސޮސިއެޑާޑާ ދެކޮޅަށް ކުޅުނު މެޗުން ރެއާލް މެޑްރިޑް މޮޅުވެއްޖެ އެވެ.

ރެއާލްގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ރެއާލް އިން އެއް ލަނޑު ޖެހިއިރު، ދެ ވަނަ ހާާފުގައި ވަނީ ދެ ވަނަ ލަނޑެއް ވެސް ޖަހައިފަ އެވެ.

މި މެޗަކީ ރެއާލަށް އިރުޝާދު ދެމުން އަންނަ ބްރެޒިލްގެ ކާލޯ އަންޗެލޮޓީ އެ ޓީމަށް އިރުޝާދު ދިން ފަހު މެޗެވެ. ރެއާލްގެ ކޯޗުކަން އޭނާ ދޫކޮށްލާއިރު، ދެން ރެއާލާ ހަވާލުވާނީ ބަޔާ ލެވަކޫސަންގެ ކުރީގެ ކޯޗު ޒަބީ އަލޮންސޯ އެވެ.

މީގެ އިތުރުން އެ މެޗުގައި ވަނީ ރެއާލް ދޫކޮށްލަން ނިންމާފައިވާ ކްރޮއޭޝިއާގެ ލޫކާ މޮޑްރިޗް ވަދާއީ ވެސް ފާހަގަ ކޮށްފަ އެވެ. ރެއާލް ދޫކޮށްލަން ނިންމި ނަމަވެސް، ކުރިއަށް އޮތް ފީފާ ކުލަބު ވޯލްޑް ކަޕްގައި އޭނާ ރެއާލަށް ކުޅޭނެ އެވެ. އެއީ އޭނާ ރެއާލްގެ ޖާޒީގައި ކުޅޭނެ ފަހު މުބާރާތެވެ.

މެޗުގެ ފުރަތަމަ ހާފުގެ 38 ވަނަ މިނެޓުގައި ރެއާލަށް ލިބުނު ޕެނަލްޓީ ކާމިޔާބުކޮށް، އެ ޓީމަށް ކުރި ހޯދައިދިނީ ފްރާންސްގެ ކެޕްޓަން ކީލިއަން އެމްބާޕޭ އެވެ.

އޭގެ ފަހުން މެޗުގެ ދެ ވަނަ ހާފުގައި، މެޗުގެ ފުރިހަމަ ވަގުތު ހަމަވާން ހަތް މިނެޓަށް ވެފައި ވަނިކޮށް އެމްބާޕޭ ވަނީ ދެ ވަނަ ލަނޑެއް ޖަހައި ރެއާލަށް ލީޑު ފުޅާ ކޮށްފަ އެވެ. އެ ލަނޑު އޭނާ ޖެހީ ވިނީޝިއުސް ޖޫނިއާ ތަނަވަސްކޮށްދިން ފުރުސަތެއްގަ އެވެ.

މޮޅާއެކު ރެއާލް އިން މި ސީޒަންގެ ސްޕެނިޝް ލީގު ނިންމާލީ ލީގު ތާވަލްގެ ދެ ވަނައިގަ އެވެ. އެއީ ލީގުގައި ކުޅުނު 38 މެޗުން 84 ޕޮއިންޓާ އެކު އެވެ.