ވަޒީރުންނަށް ރުހުންނުދޭ ނަމަ ޕާޓީގެ މީހުންގެ ފަހަތުން ދާނެކަމުގެ އިންޒާރު ދިން - ފައްޔާޒް
ވަޒީރުން އައްޔަންކުރުމަށް ރުހުން ދިނުމުގެ މައްސަލަ ދިރާސާކުރުމަށް ކޮމިޓީ އަށް ވަނީ ފޮނުއްވާފަ
އެމްޑީޕީގެ 4 ވަނަ ދައުރުގެ ނުވަ ވަނަ ޤައުމީ މަޖިލީހުގެ ޖަލްސާގެ ތެރެއިން
ވަޒީރުންނަށް މަޖިލީހުން ރުހުން ނުދޭ ނަމަ ޕާޓީގެ މީހުންގެ ފަހަތުން ދާނެ ކަމަށް ބުނެ، މި ސަރުކާރަށް ނިސްބަތްވާ އިސް މީހަކު އިންޒާރު ދީފައިވާ ކަމަށް އެމްޑީޕީގެ ޗެއަރޕަރސަން ފައްޔާޒް އިސްމާއީލް ވިދާޅުވެއްޖެއެވެ.
ފައްޔާޒް މި ފަދައިން ވިދާޅުވީ ބުރާސްފަތި ދުވަހުގެރޭ އުކުޅަހުގައި ބޭއްވި އެމްޑީޕީގެ ޤައުމީ މަޖިލީހުގެ ބައްދަލުވުމުގައެވެ.
ފައްޔާޒް ވިދާޅުވީ މި ސަރުކާރުގެ އިސް މީހަކު އޭނާ އަށް ގުޅައި، ވަޒީރުންނަށް ރުހުން ނުދޭ ނަމަ އެމްޑީޕީގެ މީހުންގެ ފަހަތުން ދާނެ ކަަމަށް ބުނި ކަމަށެވެ. ވަޒީރުންނަށް ރުހުން ނުދޭ ކަމަށް ވާނަމަ އެމްޑީޕީގެ މީހުންގެ ފަހަތުން ދާނެ ކަަމަށް ބުނެ މަޖިލީހުގެ ބައެއް މެންބަރުންނަށް ވެސް މި ސަރުކާރުގެ އިސް މީހަކު ގުޅާފައިވާ ކަަމަށާއި، މަޖިލީހުގެ މެންބަރުން ވެސް އެމަނިކުފާނާއި އެކަން ހިއްސާ ކުރެއްވި ކަަމަށް ފައްޔާޒް ވިދާޅުވިއެވެ. ނަމަވެސް އެކަހަލަ ކަންކަމާ މެދު ކުޑަކޮށް ވެސް ނުވިސްނުމަށް ފައްޔާޒް އެދިވަޑައިގެންނެވިއެވެ.
އެމްޑީޕީގެ ސަރުކާރުގައި ކަމެއް ގޯސްކޮށް ހިނގާފައިވާ ނަމަ އެކަމުގެ ޒިންމާ ނަގަން ތައްޔާރަށް ހުންނެވި ކަމަށް ވެސް ފައްޔާޒް ވިދާޅުވިއެވެ. ނަމަވެސް އަދުލުވެރިކަމާއި އިންސާފުވެރިކަމާއެކު ބަލައިގެން އެމްޑީޕީ ސަރުކާރުގެ ބޮލުގައި އެޅުވޭނެ ކަމެއް ނުއޮންނާނެ ކަމަށާއި ނުހައްގުން ޖަލުގައި ކިތަންމެ ދުވަހަކު ތިބެން ޖެހުނަސް އެކަމަށް އެމްޑީޕީ އޮތީ ތައްޔާރަށް ކަމަށް ފައްޔާޒް ވިދާޅުވިއެވެ. އެހެންކަމުން ވަޒީރުންނަށް ރުހުން ދިނުމުގައި މެންބަރުންނަށް ފެނިވަޑައިގަންނަވާ ގޮތަކަށް އަމަލުކުރެއްވުމަށް ފައްޔާޒް އިރުޝާދުދެއްވިއެވެ.
މި ބައްދަލުވުމުގައި ވަޒީރުންނަށް ރުހުން ދިނުމާއި މެދު ވާހަކަފުޅު ދައްކަވަމުން ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ އެމްޑީޕީ މެންބަރު އިބްރާހީމް ނާޒިލް ވިދާޅުވީ ވަޒީރުންގެ ތެރޭގައި ރުހުން ދޭން އެކަށީގެން ނުވާ ފަދަ ބޭބޭފުޅުންގެ ނަންތައް އެބަހުރި ކަމަށެވެ. ނަމަވެސް އެއީ ކޮންބޭފުޅުންނެއް ކަމެއް އޭނާ ވިދާޅެއް ނުވެއެވެ.
ވަޒީރުން އައްޔަންކުރުމަށް ރުހުން ދިނުމުގެ މައްސަލަ ދިރާސާކުރުމަށް ކޮމިޓީ އަށް ވަނީ ފޮނުއްވާފައެވެ. މި ސަރުކާރުގެ ވަޒީރުންގެ ގޮތުގައި ރައީސް ޑރ.މުހައްމަދު މުއިއްޒު ވަނީ 22 ބޭފުޅުން އައްޔަންކުރައްވާފައެވެ.
