އިސްރާއީލާއި ހަމާސްއާއި ދެމެދު، ޤައިދީން ބަދަލުކުރުމުގެ އެއްބަސްވުމަށް ހުކުރު ދުވަހު ޢަމަލުކުރަން ފަށާއިރު ހަމަލާތައް ދިނުންވެސް ހެނދުނު 7:00 އިން ފެށިގެން ހުއްޓާލާނެކަމަށް ޤަތަރުން ބުނެފިއެވެ.   

ގަތަރުގެ މެދުވެރިއެއްގެ ރޯލް އަދާކުރި، އިސްރާއީލާއި ހަމާސްއާއި ދެމެދު ގައިދީން ބަދަލުކުރުމުގެ އެއްބަސްވުމަށް އަމަލު ކުރުމުގެ މަސައްކަތް ހުކުރު ދުވަހުގެ ހެނދުނު ފަށާނެ ކަމަށް ޤަތަރުގެ ޚާރިޖީ ވުޒާރާއިން ވަނީ ކަށަވަރު ކޮށްދީފައެވެ.

އެ މިނިސްޓްރީގެ ތަރުޖަމާނު ވިދާޅުވީ ޣައްޒާއަށް އިސްރާއީލުން ދެމުންދިޔަ ހަމަލާތައް ހަތަރު ދުވަހުގެ މުއްދަތަށް މެދުކަނޑާލާނީ ހުކުރު ދުވަހުގެ ހެނދުނު 7:00 އިން ފެށިގެން ކަމަށެވެ.

މި އެއްބަސްވުމުގެ ދަށުން، އިސްރާއީލުގެ ޖަލުތަކުގައި ބަންދުކޮށްފައި ތިބި ފަލަސްތީނުގެ 50 މީހަކު ދޫކޮށްލުމަށް އިސްރާއީލުން ވަނީ އެއްބަސްވެފަ އެވެ. 

މީގެ އިތުރުން މި އެއްބަސްވުމުގެ ދަށުން ޣައްޒާގައި ބަންދުކޮށްފައި ތިބި އިސްރާއީލްގެ 13 އާންމުން ހުކުރު ދުވަހުގެ ހަވީރު 4:00 އެހާއިރު ޣައްޒާއިން ދޫކޮށްލާނެ އެވެ. އަދި މިސްރާއި އެކު އޮންނަ ރަފާހް ބޯޑަރު ހުރަސްކޮށް އެހީގެ ޓްރަކްތަކަށް ވެސް ޣައްޒާއަށް ވަނުމުގެ ހުއްދަ ދޭނެ އެވެ.

މި އެއްބަސްވުމަށް އަމަލު ކުރަން ފަށާއިރު، ޣައްޒާގައި އިސްރާއީލާއި ހަނގުރާމަވެރިންނާ ދެމެދު ހަ ހަފުތާއަށް ވުރެ ގިނަ ދުވަހު ހިނގި ވަރުގަދަ ކުރިމަތިލުންތަކުގައި ފަލަސްތީނުގެ 14،800 އަށް ވުރެ ގިނަ މީހުން ވަނީ މަރުވެފައެވެ. އަދި ހަމާސްގެ ރޮކެޓް ހަމަލާތަކުގައި އިސްރާއިލްގެ 1200 މީހުންވެސް މަރުވެފަ އެވެ.

އިސްރާއީލުން، ދާދި ފަހުން ޣައްޒާގެ އައްޝިފާ ހޮސްޕިޓަލްގެ ޑިރެކްޓަރު ހައްޔަރުކުރުމާ ގުޅިގެން ޣައްޒާގެ ކަމާބެހޭ ފަރާތްތަކުން ބުނެފައިވަނީ ބަލި މީހުން އެ ސަރަހައްދުން ބޭރަށް ފަރުވާ އަށް ގެންދިއުމުގައި ޑަބްލިއުއެޗްއޯއާ ގުޅިގެން މަސައްކަތް ކުރުން ހުއްޓާލާނެ ކަމަށެވެ.  

ފަހަކަށް އައިސް ޤަތަރުން ދަނީ، އިސްރާއީލު ސިފައިންނާއި ޣައްޒާއާ ދެމެދު ކުރިން ހަދާފައިވާ ހަނގުރާމަ ހުއްޓާލުމުގެ އެއްބަސްވުންތަކަށް އަމަލީ ސިފަ ގެނައުމުގައި މެދުވެރި އެއްގެ ރޯލް އަދާކުރަމުންނެވެ. ނަމަވެސް މިފަދަ އެއްބަސްވުންތައް އެކުލަވާލި ނަމަވެސް ގިނަ ފަހަރަށް އޮންނަނީ އިސްރާއީލުން އެއްބަސްވުންތަކާއި ޚިލާފުވެ އިސްވެ ހަމަނުޖެހުން ހިންގާފައެވެ.