އޮފީސް ފޮރ ސިވިލް ރައިޓްސްއަށް ޝަކުވާ ހުށަހެޅޭނެ ރަސްމީ ނިޒާމު ގާއިމުކޮށްފި
23 ނޮވެމްބަރު 2023 | ބުރާސްފަތި 13:59ޝަކުވާތައް ހުށަހެޅުމާއި ބެލުމުގައި އަމަލުކުރާނީ "އޮފީސް ފޯރ ސިވިލް ރައިޓްސްއަށް ޝަކުވާ ހުށަހެޅުމާއި ގުޅޭ ގައިޑްލައިން"އާ އެއްގޮތަށް
ރައީސުލްޖުމްހޫރިއްޔާ ޑރ. މުއިއްޒު، ބަންޑާރަ ނައިބު އުޝާމާ ސަލާމްކުރައްވަނީ
އޮފިސް ފޮރ ސިވިލް ރައިޓްސްއަށް ޝަކުވާ ހުށަހެޅޭނެ ރަސްމީ ނިޒާމު، އެޓަރނީ ޖެނެރަލްގެ އޮފީހުން ގާއިމުކޮށްފިއެވެ.
މިއީ، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީއާއި ދިވެހިރާއްޖޭގެ ގާނޫނުތަކުގެ ދަށުން ކޮންމެ މީހަކަށް ލިބޭ މަދަނީ ހައްގުތައް ލިބިދޭކަން ކަށަވަރުކުރުމާގުޅޭ މަސައްކަތްތައް ކުރުމަށްޓަކައި، ބަންޑާރަނައިބުގެ އޮފީހުން 17 ނޮވެމްބަރު 2023ގައި އުފައްދާފައިވާ އޮފީހެކެވެ. އެކަމާމެދު އެޓަރނީ ޖެނެރަލްގެ އޮފީހުން ނެރުނު ނޫސްބަޔާނެއްގައި ބުނެފައިވަނީ، އެ އޮފީހަށް ޝަކުވާ ހުށަހެޅޭނެ ނިޒާމު ގާއިމުކުރީ ބުރާސްފަތި ދުވަހު ކަމަށެވެ.
އެ އޮފީހުގެ މެންޑޭޓުގެ ތެރޭގައި، ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީއާއި ދިވެހިރާއްޖޭގެ ގާނޫނުތަކުގެ ދަށުން ކޮންމެ މީހަކަށް ލިބޭ މަދަނީ ހައްގުތައް ލިބޭކަން ކަށަވަރުކުރުން ހިމެނެއެވެ. އަދި މަދަނީ ހައްގުތައް ލިބިދިނުމަށްޓަކައި ކުރެވޭ އެކިއެކި ތަފާތުކުރުންތަކާގުޅޭ ޝަކުވާތަކާއި މަދަނީ ހައްގުތައް ލިބިނުދީ ހިފެހެއްޓުމާ ގުޅޭގޮތުން ކުރާ ޝަކުވާތައް ބަލައި، ފިޔަވަޅު އެޅުން ހިމެނެއެވެ. އެ ޝަކުވާތައް ހުށަހެޅުމާއި ބެލުމުގައި އަމަލުކުރާނީ "އޮފީސް ފޯރ ސިވިލް ރައިޓްސްއަށް ޝަކުވާ ހުށަހެޅުމާއި ގުޅޭ ގައިޑްލައިން"އާ އެއްގޮތަށެވެ.
