ސްޕެނިޝް ނުވަތަ ލަލީގާގެ ރައީސް ހާވިއާ ޓަބޭސް އިސްތިއުފާދީފި އެވެ.

އޭނާ އިސްތިއުފާދިން ނަމަވެސް އަންނަ މަހު ބާއްވާ އިންތިހާބުގައި ހަތަރު ވަނަ ދައުރަކަށް އޭނާ ވާދަކުރާނެ އެވެ. އަދި މި އިންތިހާބު ވާދަވެރިއަކު އޭނާ ކާމިޔާބު ކުރާނެ ކަމަށް ވެސް ސްޕޭނުގެ ނޫސްތަކުން ދަނީ ބުނަމުންނެވެ.

ޓަބޭސްގެ ދައުރު ހަމަވާނީ ވެސް އަންނަ ޑިސެމްބަރު މަހު އެވެ. އެކަމަކު އޭގެ ކުރިން އޭނާ އިސްތިއުފާދީ، އަންނަ މަހު އައު އިންތިހާބެއް ބޭއްވަން ނިންމީ، ލަސްކޮށްފިނަމަ އަންނަ އަހަރު ކުރީކޮޅު ބާއްވާ ސްޕޭނުގެ ފުޓްބޯޅަ ފެޑަރޭޝަނުގެ އިންތިހާބާއި ދިމާވެ، ފުށުއެރުންތަކެއް ދިމާވެދާނެތީ އެވެ.

ލަލީގާގެ ރައީސް ކަމަށް އޭނާ އެންމެ ފުރަތަމަ ހޮވުނީ 2013 ވަނަ އަހަރު އެވެ. އަދި އޭގެ ފަހުން ނިމިދިޔަ ދެ އިންތިހާބު ކާމިޔާބު ކުރީ ވެސް ވާދަވެރިއަކު ނެތި އެވެ.

ލަލީގާގެ އިންތިހާބީ ކޮމިޓީގައި ހިމެނޭނީ ލަލީގާ ތިން ކުލަބާއި ލަލީގާ ދެ ވަނަ ޑިވިޝަނުގެ ދެ ކުލަބެވެ. އޭނާއާ މެދު ކިރިޔާ ވެސް ހިތްހަމަނުޖެހުމެއް ގެންގުޅުނީ ބާސެލޯނާއިންނެވެ. އެއީ އެކުލަބުގެ މާލީ ހާލަތުގެ އޮތް ގޮތުން ކުޅުންތެރިން ގެނައުމަށް ބާސެލޯނާ އެދުހުނުހާ ގޮތަކަށް ޓަބޭސް ދޫނުދިނުމުންނެވެ.