ސިޔާސީ ކަންކަމުގައި އަންހެނުންނާއި ޒުވާނުން ގިނަ ކުރުމަށް ކޯޓާއެއް ތައާރަފްކޮށް މަސައްކަތް ކުރަންޖެހޭ: އީސީ
އެންމެ މަތީ ފަންތީގެ ސިޔާސީ ކަންކަމުގައި އަންހެނުންނާއި ޒުވާނުން ގިނަ ނުވުމަކީ ކަންބޮޑުވުމެއް
އިލެކްޝަން ކޮމިޝަންގެ ނާއިބުރައީސް އިސްމާއީލް ހަބީބު
އެންމެ މަތީ ފަންތީގެ ސިޔާސީ ކަންކަމުގައި އަންހެނުންނާއި ޒުވާނުން ގިނަ ކުރުމަށް ކޯޓާއެއް ތައާރަފްކޮށް މަސައްކަތް ކުރަންޖެހޭ ކަމަށް އިލެކްޝަންސް ކޮމިޝަން (އީސީ)އިން ބުނެފިއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި އީސީގެ ނާއިބުރައީސް އިސްމާއީލް ހަބީބު ވިދާޅުވީ އެންމެ މަތީ ފަންތީގެ ސިޔާސީ ކަންކަމަށް އަންހެނުންނާއި، ޒުވާނުން ނުކުންނަން ޖެހޭ ކަމަށެވެ. ނަމަވެސް ބައެއް އަންހެނުންނާއި ޒުވާނުން އިންތިޚާބުތަކުގައި ވާދަކުރުމަށް ދެކޮޅު ހަދާ މަންޒަރު ނުވަތަ ފަހަތަށް ޖެހޭ މަންޒަރު ފެންނަ ކަމަށް ހަބީބު ވިދާޅުވިއެވެ. އަދި ވިދާޅުވީ އެންމެ މަތީ ފަންތީގެ ސިޔާސީ ކަންކަމުގައި އަންހެނުންނާއި ޒުވާނުން ގިނަ ނުވުމަކީ ކަންބޮޑުވުމެއް ކަމަށާއި، މި މައްސަލަ ހައްލު ކުރުމަށް ކޯޓާއެއް ތައާރަފްކޮށް މަސައްކަތް ކުރަންޖެހޭ ކަމަށެވެ.
ބޭރުގެ ބައެއް ގައުމުތަކުގައި މަސައްކަތްކޮށްފައިވާ ގޮތަށް އިޝާރާތް ކުރައްވައި ހަބީބު ވިދާޅުވީ އަންހެނުންނާއި ޒުވާނުންނަށް ޚާއްސަކޮށްގެން ކޯޓާ ކަނޑައަޅާ ކަމަށާއި، އެކަމަށް ހޭލުންތެރިވުމުން ފަހުން ކޯޓާ އުވާލާ ކަމަށެވެ. އަދި މިހާރު ބައެއް ގައުމުތަކުގެ ޕާލިމެންޓްގައި އަންހެނުން ގިނަ ކަމަށް ހަބީބު ވިދާޅުވިއެވެ.
ރައްޔިތުން މަޖިލީހަށް އިޝާރާތް ކުރައްވައި ހަބީބު ވިދާޅުވީ މަޖިލީހަށް ވެސް އަންހެނުންނާއި ޒުވާނުން އިންތިޚާބު ކުރަންޖެހޭ ކަމަށާއި، ތައުލީމީ ގާބިލް ބޭފުޅުންނަށް އިސްކަންދޭން ޖެހޭ ކަމަށެވެ. އެއީ ހަމައެކަނި ފައިސާވެރިން ހޮވަންޖެހޭ ތަނެއް ނޫން ކަމަށް ހަބީބު ވިދާޅުވިއެވެ.
މީގެ އިތުރުން ހަބީބު ވިދާޅުވީ ސިޔާސީ ޕާޓީތަކުން އިންތިޚާބުތަކަށް ކެންޑިޑޭޓުން ނެރުމުގައި ވެސް އަންހެނުންނާއި ޒުވާނުންނަށް އިސްކަން ދިނުމަކީ މުހިންމު ކަމެއް ކަމަށާއި، ވަކި އިންސައްތައެއް ކަނޑައެޅުމަކީ މިކަމަށް ހައްލެއް ލިބޭނެ ކަމެއް ކަމަށެވެ. އަދި ކުރިއަށް އޮތްތަނުގައި މިގޮތަށް މި ކަންކަން ކުރިއަށްދާނެ ކަމަށް އުންމީދު ކުރައްވާ ކަމަށް ހަބީބު ވިދާޅުވިއެވެ.
