މަޖިލިސް އިންތިޚާބަށް ނަގާ އޮފިޝަލުންގެ އެލަވަންސް ބޮޑުވާނެ ކަމަށް އިލެކްޝަންސް ކޮމިޝަންގެ ނައިބް ރައީސް އިސްމާއިލް ހަބީބް ވިދާޅުވެއްޖެއެވެ.
ބުދަ ދުވަހުގެ ރޭ ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަފުޅު ދައްކަވަމުން ހަބީބު ވިދާޅުވީ އޮފިޝަލުން ލިބުމަށް ދަތިވާ ކަމަށެވެ. އަދި ރިޔާސީ އިންތިޚާބުގައި އޮފިޝަލުންނަށް ދިނީ، ލޯކަލް ކައުންސިލް އިންތިޚާބުގައި ދިންވަރަށް ވުރެން ކުޑަ އެލަވަންސެއް ކަމަށް ވިދާޅުވިއެވެ.
އެ އެލަވަންސް ދީގެން އޮފިޝަލުން ލިބިދާނެކަމަށް ޤަބޫލުފުޅު ނުކުރައްވާކަން ފާހަގަކުރައްވާ ހަބީބު ވިދާޅުވީ ޤާނޫނުގައި މަޖިލިސް އިންތިޚާބު ބާއްވާ ތާރީޚު ދިމާވާނީ ރޯދަމަހަށް ކަމަށްވުމުން، އޮފިޝަލުންނަށް ދޭ އެލަވަންސް ބޮޑު ކުރައްވާނެ ކަމަށެވެ.
ހަބީބު ވިދާޅުވީ މިހާރު އަމަލުކުރަމުންދާ ގޮތަކީ ރަސްމީ ގަޑީގައި ވަޒީފާގައި އުޅުމަށްފަހު ޑިއުޓީ ނިމުމުން، އޮފިޝަލުނަށް ޓްރެއިނިންގ ފައްޓަނީ ރޭގަނޑާއެކު ކަމަށާއި ރޯދަ މަހަށް ބަލާނަމަ އެއީ ވަރަށް ބޮޑު ގޮންޖެހުމެއް ކަމަށެވެ. އޮފިޝަލުން ތަމްރީނު ކުރުމުގެ މަސައްކަތް ދުރާލާ ކުރިއަށް ގެންދެވޭތޯ މަސައްކަތް ކުރައްވަމުންދާ ކަމަށް ވެސް ވިދާޅުވިއެވެ.
ކޮމިޝަންގެ ވިސްނުމަކީ ރައްޔިތުންގެ ބައިވެރިވުން ވޯޓުގައި އޮންނާނެ ގޮތެއް ހޯދުން ކަަމަށާއި ރޯދަ މަހު އިންތިޚާބު އޮންނަނަމަ ވޯޓްލާ މީހުންގެ އަދަދު މަދުވާނެ ކަމަށް ހަބީބު ވިދާޅުވިއެވެ. ކޮންމެ އިރެއްގައި ވޯޓްލިނަމަވެސް ކޮމިޝަން އޮތީ އެކަމަށް ތައްޔާރަށް ކަމަށް ވެސް ހަބީބު ވިދާޅުވިއެވެ.
އީސީން އިތުރަށް ބުނީ ހިނގަމުންދާ މަޖިލީހުގެ ދައުރު ހަމަވުމުގެ 30 ދުވަސް ކުރިން މަޖިލިސް އިންތިހާބު ބާއްވަން ޖެހޭ ކަމަށެވެ. ޤާނޫނު ބުނާ ގޮތުން މަޖިލިސް އިންތިހާބާ ގުޅޭ އެންމެހާ ކަންތައްތައް ނިންމަންޖެހޭ އެންމެ ފަހު ތާރީޚަކީ އޭޕްރީލް 28، 2024 އެވެ.
