އިންޑިއާ ސިފައިން ތިބިކަމަށް ސަރުކާރުން ބުނި އަދަދާ މެދު ޔާމީން ސުވާލު އުފައްދަވައިފި
22 ނޮވެމްބަރު 2023 | ބުދަ 03:35އިންޑިއާ ސިފައިންގެ އަދަދާއި މެދު ރައީސް ޔާމީން އުފައްދަވާފައިވާ ކޮމިޓީން ސުވާލު އުފައްދާ ސަރުކާރަށް ފާޑުކިޔާފައިވޭ
ޔާމީން އައްޔަންކުރެއްވި ކޮމިޓީން ބޭއްވި ނޫސްވެރިންގެ ބައްދަލުވުން
ރާއްޖޭގައި ތިބިކަމަށް ބުނާ އިންޑިއާ ސިފައިންގެ އަދަދުކަމަށް ސަރުކާރުން ހާމަކުރި އަދަދާއި މެދު ސުވާލު އުފައްދާ ސަރުކާރުގެ ވާހަކަތަކުގެ ސައްހަކަމާމެދު ކުރީގެ ރައީސް އަބްދުﷲ ޔާމީން ސުވާލު އުފައްދަވައިފިއެވެ.
ކުރީގެ ރައީސް އަބްދުﷲ ޔާމީން މިފަދައިން ސުވާލު އުފައްދަވާފައިވަނީ، އެމަނިކުފާނުގެ އިރުޝާދުގެ ދަށުން ޕީޕީއެމްގެ ހިންގުމުގެ ޒިންމާ މަތިކޮށްފައިވާ "ޔާމީން ކޮމިޓީ" އިން ބޭއްވި ނޫސްވެރިންގެ ބައްދަލުވުމެއްގައެވެ.
ރައީސް އޮފީހުގެ އަންޑަރ ސެކްރެޓަރީ ފޯ ޕަބްލިކް ޕޮލިސީ، މުހައްމަދު ފިރުޒުލް އަބްދުﷲ ޚަލީލް ވިދާޅުވެފައިވަނީ ރާއްޖޭގައި 77 ސިފައިން ގާއިމްވެ ތިބިކަން ޔަގީންކުރެވިފައި ވާކަމަށެވެ. ނަމަވެސް ސަރުކާރުގެ މި ވާހަކަތަކާއި މެދު ސުވާލު އުފައްދާ "ޔާމީން ކޮމިޓީ" އިން ބޭއްވި ނޫސްވެރިންގެ ބައްދަލުވުމުގައި ޕީޕީއެމްގެ މެންބަރު އައްބާސް އާދިލް ރިޒާ ވިދާޅުވެފައިވަނީ ކުރީ ސަރުކާރުން ވެފައިވާ "ސިއްރު" އެއްބަސްވުންތަކުގެ ދަށުން އިންޑިއާގެ އިތުރު ސިފައިން ރާއްޖޭގައި އެބަތިބި ކަމަށެވެ. ރިޒާ ވަނީ ސަރުކާރުން ހާމަކުރި އަދަދަކީ ޖޯކެއް ގޮތަށް މާނަކުރައްވާފައެވެ.
ޕީޕީއެމް އިސްވެ "އިންޑިއާ އައުޓް" ހަރަކާތް ފަށާފައިވާ އިރު، ޕީޕީއެމްއާއެކު މަސައްކަތް ކުރަމުން އައި ޕީއެންސީން ވަނީ ވަކި ހިސާބަކުން އެ ހަރަކާތާ ވެސް ދުރަށް ޖެހިފައެވެ. އަދި އިންތިޚާބު ކާމިޔާބު ކުރައްވާ މަގުތަކަށް އެއްވުން ހުއްޓާލެއްވުމަށް ރައީސް ޑރ. މުހައްމަދު މުއިއްޒު އެދިވަޑައިގެންނެވިއެވެ. ނަމަވެސް މިކަން ރައީސް ޔާމީނަށް ބަލައިގަންނަން އުނދަގޫފުޅުވެ، މަގުތަކަށް ނުކުތުމަށް ސަޕޯޓަރުންނަށް ގޮވާލެއްވިއެވެ.
ޕީޕިއެމްގެ ހިންގުން ސްޓިއަރިންގ ކޮމިޓީއަކާއި ހަވާލުކޮށް މަސައްކަތް ކުރަމުން އަންނަ އިރު، ޕީޕީއެމާއި ޕީއެންސީ އަދި ރައީސް މުއިއްޒުއާއި ރައީސް ޔާމީނާއި ދެބޭފުޅުންގެ ގުޅުން ވަރަށް ބޮޑަށް ހީނަރުވެފައިވާ ކަމަށް ދެ ޕާޓީގެ އިސް ފަރާތްތަކުން އަންނަނީ ބުނަމުންނެވެ.
