އައު ސަރުކާރުން އުފެއްދި ކުޅިވަރާއި ހަށިހެޔޮކަމާ ބެހޭ ވުޒާރާގެ ސްޓޭޓް މިނިސްޓަރަކަށް، ވޮލީ ބޯޅަ އެސޯސިއޭޝަން އޮފް މޯލްޑިވްސް (ވީއޭއެމް)ގެ ކުރީގެ ރައީސް، މުޙައްމަދު ރިޔާޟް ޢައްޔަން ކުރައްވައިފި އެވެ.
އެ މަގާމަށް ރިޔާޟް އައްޔަން ކުރައްވާފައި ވަނީ އަންގާރަ ދުވަހު، ރައީސުލްޖުމްޙޫރިއްޔާގެ އޮފީހުގައި އޮތް ޚާއްސަ ރަސްމިއްޔާތެއްގަ އެވެ. ރިޔާޟަށް މަގާމުގެ ލިޔުން ހަވާލުކޮށްދެއްވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެވެ. ރިޔާޟް އަކީ ކުޅިވަރު ވުޒާރާގެ ސްޓޭޓް މިނިސްޓަރުގެ މަޤާމަށް ޢައްޔަން ކުރެއްވި ދެ ވަނަ ފަރާތެވެ. ހޯމަ ދުވަހު ރައީސުލްޖުމްޙޫރިއްޔާ ވަނީ ކުޅިވަރު ވުޒާރާގެ ސްޓޭޓް މިނިސްޓަރުގެ މަޤާމަށް، ފުޓުބޯޅައިގެ ޚިދުމަތްތެރިޔާ އިބްރާހީމް އާމިރު (ސަލްސާ) ޢައްޔަން ކުރައްވައިފަ އެވެ.
ސްޓޭޓް މިނިސްޓަރުގެ މަޤާމަށް ރައީސުލްޖުމްޙޫރިއްޔާ ޢައްޔަން ކުރެއްވި ރިޔާޟް އަކީ، އިންޓަނޭޝަނަލް ވޮލީ ބޯޅަ ރެފްރީ އެކެވެ. މީގެ އިތުރުން ރިޔާޟް ވަނީ ވީއޭއެމްގެ ޖެނަރަލް ސެކްރެޓަރީގެ މަޤާމު ދެ ދައުރެއްގައި އަދާ ކުރައްވައިފަ އެވެ. އޭގެ ފަހުން، ވީއޭއްމެގެ ރައީސްކަމުގެ މަޤާމަށް ވެސް ރިޔާޟް ވަޑައިގެން ވަނީ، ވޮލީ އަށް ގިނަ ގުނަ ޚިދުމަތްތަކެއް ކުރައްވައިފަ އެވެ.
ވީއޭއެމްގެ ރައީސްކަމުގެ މަޤާމު އަދާކުރެއްވުމަށް ފަހު ވެސް، ރިޔާޟް ވަނީ ވޮލީގެ މަސައްކަތުގައި އުޅުއްވައިފަ އެވެ. ޚާއްސަކޮށް ވޮލީ ބޯޅަ އަށް ދިމާވަމުން އަންނަ ގޮންޖެހުންތަކުގެ ވާހަކަ އާއި، ދިމާވާ މައްސަލަތަކުގެ ވާހަކަ ދައްކަވައިފައިވެ އެވެ.
