ފަލަސްޠީނުގެ ޒުވާން ޤައުމީ ޓީމު ރާއްޖޭގައި ކޭމްޕު ކުރުމުގެ ފުރުސަތު ދިނުމަށް، ކުޅިވަރު ވުޒާރާ އަދި ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފި އެވެ.

އޭއެފްސީ އޭޝިއަން ކަޕްގެ 17 އަހަރުން ދަށުގައި ވާދަކުރާ ފަލަސްޠީނުގެ ޒުވާން ޤައުމީ ޓީމާއި، ދިވެހި ރާއްޖޭގެ 17 އަހަރުން ދަށުގެ ޒުވާން ޤައުމީ ޓީމާ މެދު ރަޙުމަތްތެރި ކަމުގެ ދެ މެޗު ކުޅުމަށާއި، ދިވެހި ރާއްޖޭގައި ކޭމްޕު ކުރުމުގެ ފުރުސަތު ފަހި ކޮށްދިނުމަށް، ފަލަސްޠީނު ފުޓުބޯޅަ އެސޯސިއޭޝަން އިން ވަނީ އެފްއޭއެމްގައި އެދިފަ އެވެ.

އެކަމާ ގުޅިގެން މިދިޔަ އާދީއްތަ ދުވަހު ބޭއްވި އެފްއޭއެމްގެ ހިންގާ ކޮމެޓީގެ ބައްދަލުވުމުގައި ނިންމާފައި ވަނީ، މިއަހަރުގެ ނޮވެމްބަރު މަހުގެ އަށް ވަނަ ދުވަހުން، 18 ވަނަ ދުވަހަށް ދިވެހި ރާއްޖޭގައި ތިބުމާއި، އެހެނިހެން އިންތިޒާމުތައް ހަމަޖެއްސުމުގައި ސަރުކާރުގެ އެހީތެރިކަމަށް އެދުމަށެވެ. އަދި ރަޙުމަތްތެރި ކަމުގެ ދެ މެޗަށް ސްޕޮންސާ ހޯދުމަށް ވެސް ވަނީ ފާސްކޮށްފަ އެވެ.

އޭގެ ފަހުން އަންގާރަ ދުވަހު ކުޅިވަރު ވަޒީރު ޢަބްދުﷲ ރާފިޢު (ރާއްޕެ) ވަނީ، އެފްއޭއެމްގެ ރައީސް އަޙުމަދު ޠާރިޤު (ޓޮމް)އާ ބައްދަލު ކުރައްވައިފަ އެވެ. އެ ބައްދަލުވުމުގެ މައުލޫމާތު ހިއްސާ ކުރަމުން ކުޅިވަރު ވުޒާރާ އިން ބުނެފައި ވަނީ، ފަލަސްޠީނުގެ ޒުވާން ޤައުމީ ޓީމު ރާއްޖޭގައި ކޭމްޕު ކުރުމުގެ ފުރުސަތު ފަހި ކޮށްދިނުމަށް ނިންމާފައިވާ ކަމަށެވެ.

މީގެ އިތުރުން އެ ވުޒާރާ އިން ބުނެފައި ވަނީ، އެއީ ފަލަސްޠީނާއި ރާއްޖެއާ ދެމެދު އޮތް ގުޅުން އިތުރަށް ވަރުގަދަ ވާނެ ނިންމުމެއް ކަމަށެވެ. އަދި ހަމަ އެހެންމެ، ކުޅިވަރުގައި ކަންކަމުގައި ފަލަސްޠީނަށް އެހީތެރިވުމަށް ކުރެވޭނެ މުހިންމު ކަމެއް ކަމަށް ވެސް އެ ވުޒާރާ އިން ވަނީ ބުނެފަ އެވެ.

އިސްރާއީލް އިން މިހާރު ޣައްޒާގައި ހިންގަމުން އަންނަ ހަނގުރާމައިގެ ސަބަބުން، ފަލަސްޠީނުގެ ކުޅިވަރުގެ އެއްވެސް ޙަރަކާތެއް ކުރިއަށް ގެންދެވޭ ގޮތް ވަނީ ނުވެފަ އެވެ. އެހެންވެ ފަލަސްޠީނުގެ ޤައުމީ ޓީމު ތަކުން މެޗުތައް އަދި ތަމްރީނުތައް ކުރިއަށް ގެންދަނީ އެހެން ޤައުމު ތަކުގަ އެވެ.