ކުޅިވަރާއި ހަށިހެޔޮކަމާ ބެހޭ ވުޒާރާ އިން މަސައްކަތް ނިންމައި ހުޅުވި މަޝްރޫއުތަކަކީ ކުރީގެ ރައީސް އިބްރާހީމް މުޙައްމަދު ޞާލިޙު (އިބޫ)ގެ ސަރުކާރުގައި ފަށާފައިވާ މަސައްކަތްތައް ކަމަށް، އެ ސަރުކާރުގެ ކުޅިވަރު ވަޒީރު އަޙުމަދު މަޚްލޫފް ވިދާޅުވެއްޖެ އެވެ.
މަޚްލޫފް މިހެން ވިދާޅުވީ އެކަމާ ގުޅިގެން އާދީއްތަ ދުވަހު އެކްސްގައި ކުރި ޕޯސްޓެއްގަ އެވެ. އެގޮތުން ފާއިތުވި ދެ ހަފުތާއެއްހާ ދުވަހުގެ ތެރޭގައި ކުޅިވަރު ވުޒާރާ އިން ބައެއް މަޝްރޫއުތައް ރަސްމީކޮށް ހުޅުވި މަންޒަރުތައް ސޯޝަލް މީޑިއާ އިން ފެނިފައިވާ ކަމަށާއި، އެއީ ކޮންއިރަކު ފަށާފައިވާ މަސައްކަތްތަކެއްތޯ ގިނަ ފަރާތްތަކުން ސުވާލު ކުރަމުން އަންނަ ކަމަށް މަޚްލޫފް ވަނީ ވިދާޅުވެފަ އެވެ. އަދި މަޚްލޫފް ވަނީ މަޝްރޫތަކުގެ ތަފްސީލުތައް ވެސް ހިއްސާކޮށްފަ އެވެ.
މަޚްލޫފް ވިދާޅުވީ އެ ހުރިހާ މަސައްކަތްތަކަކީ ވެސް ރާއްޖޭގެ އެކި ރަށްރަށުގައި ކުޅިވަރު ވަސީލަތްތައް ތަރައްޤީ ކުރުމަށް ރައީސް ޞާލިޙުގެ ސަރުކާރުގައި ކުރިއަށް ގެންދިޔަ އެތައް ސަތޭކަ މަޝްރޫއުތަކުގެ ތެރޭގައި ހިމެނިގެން ފެށިފައިވާ މަސައްކަތްތަކެއްކަން އެ ރަށްތަކުގެ ރައްޔިތުންނަށް ނޯޅޭނެކަން ކަށަވަރު ކަަމަށެވެ. އެކަން ފާހަގަ ކުރައްވައި މަޚްލޫފް ވިދާޅުވީ މިހާރުފެ ސަރުކާރުން މަސައްކަތްތައް އެއްކޮށް ފުރިހަމަ ކޮށްދެއްވައި، ރައްޔިތުންނަށް ބޭނުން ކުރަން ފެށިފައިވާތީ ވަރަށް އުފާކުރާ ކަމަށެވެ.
އެ ޕޯސްޓުގައި މަޚްލޫފް ވިދާޅުވީ އއ.އުކުޅަހު ފުޓުބޯޅަ ދަނޑަކީ ސަބްބޭސް، ޓާފް އަދި ލައިޓިންގެ މަސައްކަތްތައް ވެސް ރައީސް ޞާލިޙުގެ ސަރުކާރުގައި ކޮންޓްރެކްޓު ކުރެވިފައިވާ މަޝްރޫއެއް ކަމަށެވެ. އަދި އެ މަޝްރޫއުގެ ބައެއް އަމަލީ މަސަކަތް ވެސް އޭރު ފެށިފައިވާ ކަމަށާއި، ދަނޑު ނިންމާލުން ލަސްވެގެން ދިޔައީ ކޯވިޑު 19 ގެ ބަލި މަޑު ކަމުގެ ސަބަބުން އަދި މަސައްކަތްތައް ގިނަވުމުގެ ސަބަބުން ކަމަށް މަޚްލޫފް ވަނީ ވިދާޅުވެފަ އެވެ.
މީގެ އިތުރުން ހދ.ނޮޅިވަރަމް ފުޓުބޯޅަ ދަނޑަކީ ވެސް ރައީސް ޞާލިޙުގެ ސަރުކާރުގައި މަސައްކަތް ފަށާފައިވާ ދަނޑެއް ކަމަށް މަޚްލޫފް ވިދާޅުވި އެވެ. އަދި އެ ދަނޑުގައި ޓާފް އެޅުމަށް ދެ ދުވަހަށް ވެފައި ވަނިކޮށް، ޓާފްގައި އަލިފާން ރޯކޮށްލުމުން މަސައްކަތް ނިންމާނުލެވި އޮތް ދަނޑެއްކަން ވެސް މަޚްލޫފް ފާހަގަ ކޮށްފައިވެ އެވެ. ތަފާތު ސަބަބުތަކާ ހެދި އެ ރަށުގެ މަސައްކަތް ލަސްވެގެން ދިޔަ ކަމަށާއި، ފަހުން ޓާފު އިއުލާންކޮށް ގެނެސްފައި ވަނީ މި ސަރުކާރުން ކަމަށް ވެސް މަޚްލޫފް ވަނީ ވިދާޅުވެފަ އެވެ. މީގެ އިތުރުން އެ ރަށުގެ ވޮލީ ކޯޓަކީ ވެސް ރައީސް ޞާލިޙުގެ ސަރުކާރުގައި ކޮންޓްރެކްޓު ކުރެވި، އަމަލީ މަސައްކަތް ފެށިފައިވާ މަޝްރޫއެއް ކަމަށް ވެސް މަޚްލޫފް ވިދާޅުވެފައިވެ އެވެ.
ހަމައެހެން ގދ.ފިޔޯރީ ވޮލީ ކޯޓުގެ މަޝްރޫއަކީ ރައީސް ޞާލިޙުގެ ސަރުކާރުގައި އެ ރަށުގެ ކައުންސިލާ ހަވާލުކޮށްގެން ކުރިއަށް ގެންދެވުނު މަސައްކަތެއް ކަމަށް ވެސް މަޚްލޫފްގެ ޕޯސްޓުގައި ވަނީ ވިދާޅުވެފަ އެވެ. އަދި ދ.ރިނބުދޫ އައުޓް ޑޯ ޖިމް އަކީ ވެސް ރައީސް ޞާލިޙުގެ ސަރުކާރުގައި އިއުލާންކޮށް، ރާއްޖެ ގެނެވިފައިވާ ޖިމް ސާމާނު ކަމަށް ވެސް މަޚްލޫފް ވަނީ ވިދާޅުވެފަ އެވެ. ޕޯސްޓު ނިންމާލަމުން މަޚްލޫފް ވިދާޅުވެފައި ވަނީ އެފަދަ އެތައް މަޝްރޫއުތަކެއް، އެކި ރަށް ރަށުގައި ކުރިއަށް ގެންގޮސް ނިންމާ، އަދި ފެށިފައިވާތީ އުފާ ކުރާ ކަމަށެވެ.
ނިމިދިޔަ ރައީސް ޞާލިޙުގެ ސަރުކާރުގައި ވަނީ ރާއްޖޭގެ އެކި ރަށްތަަކުގައި ބޮޑު ފުޓުބޯޅަ ދަނޑު ޤާއިމު ކުރުމުގެ އިތުރުން، ޒަމާނީ ފެންވަރުގެ އައުޓް ޑޯ ވޮލީ ކޯޓުތައް ޤާއިމު ކުރުމާއި، ފުޓްސަލް ދަނޑުތައް ޤާއިމު ކުރުމާއި، އައުޓް ޑޯ ޖިމް ޤާއިމު ކުރުމުގެ އިތުރުން ކުޑަކުދިންގެ ޕާކު ޤާއިމު ކުރުމުގެ ގިނަ މަޝްރޫއުތަކެއް ކުރިއަށް ގެންގޮސްފަ އެވެ.
