ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުން، މ.އތޮޅު މުލަކުގައި ޤާއިމު ކުރި އައުޓް ޑޯ ވޮލީ ކޯޓުގެ މަސައްކަތް ނިންމައި، ރަސްމީކޮށް ހުޅުވައިފި އެވެ.

މުލަކުގައި ޤާއިމު ކޮށްފައިވާ އައުޓް ޑޯ ވޮލީ ކޯޓު ރަސްމީކޮށް ހުޅުވައި ދެއްވީ ކުޅިވަރާއި ހަށިހެޔޮކަމާ ބެހޭ ވުޒާރާގެ ސްޓޭޓް މިނިސްޓަރ މުޙައްމަދު ދިލްޝާން އަބްދުﷲ އެވެ. ވޮލީ ކޯޓު ހުޅުވުމަށް ބޭއްވި ރަސްމިއްޔާތުގައި ރައްޔިތުންގެ މަޖިލީހުގެ މުލަކު ދާއިރާގެ މެންބަރު އިބްރާހިމް ނައުފަލް އަދި ކުޅިވަރު ވުޒާރާގެ ޑެޕިއުޓީ މިނިސްޓަރ އިބްރާހިމް ނިޔާޒު ވެސް ބައިވެރިވެފައިވެ އެވެ.

ނަމަވެސް އެއީ ރައީސް ޞާލިޙުގެ ސަރުކާރުން ރާެއްޖޭގެ އެކި ކަންކޮޅު ތަކުގައި އައުޓް ޑޯ ވޮލީ ކޯޓު ޤާއިމު ކުރުމުގެ މަޝްރޫއުގެ ދަށުން ކުރިއަށް ގެންދިޔަ މަޝްރޫއެކެވެ. އަދި ރައީސް ޞާލިޙުގެ ސަރުކާރު ނިމި، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ސަރުކާރު ފެށުނުއިރު ވެސް، އެ ކޯޓުގެ މަސައްކަތުގެ ބޮޑު ބައެއް ވަނީ ނިމިފަ އެވެ.

މި ސަރުކާރުން މުލަކު ވޮލީ ކޯޓު ރަސްމީކޮށް ހުޅުވާފައިވާއިރު، އެ ކޯޓުގެ މަސައްކަތް ނިމިފައި އޮންނަތާ ވެސް ގާތް ގަނޑަކަށް ހަތަރު މަސް ދުވަސް ވެއްޖެ އެެވެ. ނަމަވެސް އެކި އެކި ސަބަބުތަކާ ހުރެ ކޯޓު ހުޅުވުން ވަނީ ލަސްވެފަ އެވެ. އެ މަޝްރޫއަކީ ކުރީގެ ކުޅިވަރު ވުޒާރާ އިން 1.3 މިލިއަން ރުފިޔާގެ ބަޖެޓެއް ހަމަޖައްސައިގެން ކުރިއަށް ގެންދިޔަ މަޝްރޫޢެކެވެ.

މިދިޔަ ސަރުކާރުން ރާއްޖޭގެ އެކި ކަންކޮޅު ތަކުގައި ޤާއިމު ކޮށްފައިވާ ކުޅިވަރުގެ ތަންތަން މި ސަރުކާރުން އަންނަނީ ހުޅުވަމުންނެވެ. މި ސަރުކާރުން އެ މަޝްރޫއުތައް ހުޅުވަމުން އަންނަނީ ހުއްޓިފައިވާ ކުޅިވަރު މަޝްރޫއުތައް ނިންމުމުގެ ދަށުން ކަމަށް ބުނެ އެވެ.