ހުޅުމާލެ އަދި ގުޅިފަޅުން ދީފައިވާ ގޯތިތައް އެ ތަންތަނުން ލިބޭނެ ކަމާމެދު ސުވާލު އުފެދިއްޖެ!
ހުޅުމާލެއާއި ގުޅިފަޅަކީ އެސެޓެއް؛ އެ އެސެޓްގެ ބޭނުން ހިފެމުންދަނީ އެންމެ ރަނގަޅަށްތޯ ރިވިއު ކުރައްވާނެ ކަމަށް މިނިސްޓަރު ވިދާޅުވި
"ބިންވެރިޔާ ސްކީމް"ގެ ދަށުން ގޯތި ލިބޭ މީހުންނަށް ދޫކުރާ ގޯތިތަކުގެ ގުރުއަތުލުން ކުރިއަށްދަނީ
މި ސަރުކާރުން ދައުލަތުގެ އެސެޓްތައް ބޭނުންކުރެވެނީ ރަނގަޅަށްތޯ ރިވިއު ކުރާނެ ކަމަށާއި، ގުޅިފަޅާއި އެހެން ތަންތަނުގެ އިންފްރާސްޓަރކްޗަރ އަދި އަސާސީ ހިދުމަތްތައް ގާއިމް ނުކުރެވޭނެކަމަށް ފިނޭންސް މިނިސްޓަރު ޑރ. މުހައްމަދު ޝަފީގު ވިދާޅުވެއްޖެއެވެ.
ބަޖެޓް ދިރާސާ ކޮމިޓީގައި ދާންދޫ ދާއިރާގެ މެންބަރު ޔައުގޫބު އަބްދުﷲ ވިދާޅުވީ ރައީސް މުއިއްޒުގެ ތަގުރީރުގައި، އުތުރު ތިލަފަޅުން ފެށިގެން ފުށިދިއްގަރާ ހަމައަށް ޒީނަތްތެރި ބޮޑު ސިޓީއެއް ގެންނަވާނެ ވާހަކަފުޅު ވިދާޅުވިކަމަށެވެ. ނަމަވެސް ގުޅިފަޅާއި ގިރާވަރު ފަޅުން މާލޭގެ ރައްޔިތުންނަށް ގޯތި ދީފައިވާ އިރު، އެކަމާއި ގުޅޭ ޕްލޭނެއް ނުވަތަ ތަސައްވުރެއް އެބައޮތްތޯ ވަނީ ސުވާލު ދަންނަވާފައެވެ. އަދި އެ ތަންތަނުގެ އިންފްރާސްޓްރަކްޗަރާއި މަގުހެދުމާއި ސްކޫލްތާއި މިސްކިތްތަކާއި އެހެނިހެން އަސާސީ ވަސީލަތްތައް ހިމަނަން 2024 ވަނަ އަހަރުގެ ބަޖެޓުގައި ހިމަނާފައިވޭތޯ މެންބަރު ސުވާލު ދެންނެވިއެވެ.
މެންބަރު ދެންނެވި ސުވާލަށް ޖަވާބު ދެއްވަމުން ފިނޭންސް މިނިސްޓަރު ވިދާޅުވީ 5 އަހަރުގެ ދައުރުގެ ތެރޭގައި ހާސިލްކުރަން ބޭނުންވާ ކަންތަައްތަކެއް އެބަހުރިކަމަށާއި މިހާރު އޮތް ކްރިޓިކަލް ހާލަތުގައި، އަންނަ އަހަރު އެ ހުރިހާކަމެއް ނުކުރެވޭނެ ކަމަށެވެ. އަދި އަންނަ އަހަރު ހަރަދުތައް ކުޑަކޮށް ލާރި ހޯދާނެ ގޮތްތަކެއް ހޯދާފައި ކުރެވޭ އިންވެސްޓްމަންޓުގެ ނަފާ ލިބެން ފެށުމުން އެކަންކަން ކުރެވޭނެ ކަމަށެވެ.
ނަމަވެސް 100 ދުވަހުގެ ތެރޭގައި ރައީސް މުއިއްޒު ކުރައްވާ ކަންކަމުގެ ތެރޭގައި ފުށިދިއްގަރު ފަޅު ހިއްކުން ހިމެނެއެވެ. 30 ދުވަހުގެ ތެރޭގައި ފެށުމަށް ހަމަޖެހިފައިވާ މި މަސައްކަަތަށް 400 މިލިއަން ރުފިޔާ ހަރަދުވެއެވެ. ނަމަވެސް މިހާރު ހިއްކަން ފަށައި، އަދި ގޯތި ދޫކޮށްފައިވާ ގުޅިފަޅާއި ގިރާވަރު ފަޅުގައި އަސާސީ ހިދުމަތްތަކާއި އެހެނިހެން ވަސީލަތްތަކުގެ ވާހަކަ ބަޖެޓުގައި ހިމަނާފައި ނުވެއެވެ.
އަންނަ އަހަރު ފުށިދިއްގަރު ފަޅު ތަރައްގީކޮށް ނިމޭނެ ކަމަށް މިނިސްޓަރު ވިދާޅުވެފައިވާތީ، މިހާރު ހިއްކާ ގޯތި ދީފައި އޮތްތަނެއް ބައިޕާސްކޮށްފައި ފުށިދިއްގަރު ފަޅަށް ދަނީ އެތަނުން ވުޖޫދުން ގެއްލިގެންދާތީ ތޯ މެންބަރު ޔައުގޫބު ސުވާލު ދެންނެވިއެވެ. އަދި ހައުސިންގ އަދި ބިން ހިއްކުމުގެ ބިޔަ މަޝްރޫއު ރައީސް އިއުލާންލުރައްވާފައިވާ އިރު، އެއީ ނިސްބަތުން ކުރެވޭ އެންމެ ބޮޑު ހަރަދު ކަމަށާއި، ގައުމު ދަރާފައި އޮތް ކަމަށް ވިދާޅުވާއިރު އަދި 17 ބިލިއަންގެ ފައިނޭންސިންގ ހޯދާއިރު އެކަންކަން ކުރަނީ ކިހިނެއްތޯ މެންބަރު ސުވާލު ދެންނެވިއެވެ. އަދި ފުށިދިއްގަރު ފަދަ ބޮޑު ޕްރޮޖެކްޓެއް ކުރިއަށް ގެންދަވާއިރު ދަރަނިވެރިނުވެ އެކަން ކުރައްވަނީ ކިހިނެއްތޯ ވެސް މެންބަރު ވަނީ ސުވާލު ދަންނަވާފައެވެ.
މެންބަރު ޔައުގޫބުގެ ސުވާލުގެ ޖަވާބުގައި މިނިސްޓަރު ވިދާޅުވީ މި ސަރުކާރުން ދައުލަތުގެ އެސެޓްގެ ބޭނުން އެންމެ ފުރިހަމަ ގޮތުގައި ހިފުމަށް މަސައްކަތް ކުރާނެ ކަމަށެވެ. އެގޮތުން ހުޅުމާލެއަކީ ދައުލަތުގެ ވަރަށް ބޮޑު އެސެޓެއް ކަމަށާއި، ގުޅިފަޅަކީ ވެސް ވަރަށް ބޮޑު އެސެޓެއް ކަމަށެވެ. އެ އެސެޓްގެ ބޭނުން ހިފެމުންދަނީ އެންމެ ރަނގަޅަށްތޯ ރިވިއު ކުރައްވާނެ ކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ ފުށިދިއްގަރު ފަޅުގެ ބިން ތަރައްގީކުރުމަކީ އިންގިލާބީ ބަދަލެއް އަންނާނެކަމެއް ކަމަށާއި، އެ ބަދަލު ވަރަށް އަވަހަށް އަންނާނެ ކަަމަށް އަދި އަންނަ އަހަރު އެ ބަދަލު ފެނިގެންދާނެ ކަމަށެވެ.
ހުޅުމާލެ އަދި ގުޅިފަޅަކީ ދައުލަތުގެ ބޮޑު ދެ އެސެޓްކަމަށާއި، އެތަންތަން ބޭނުންކުރާ ގޮތް ރިވިއުކުރައްވާނެކަމަށް ފިނޭންސް މިނިސްޓަރު ވިދާޅުވެފައިވާ އިރު، ސަރުކާރުން ދޫކޮށްފައިވާ ގޯތިތައް އެހެން ދިމަދިމާލަށް ރިލޮކޭޓްކުރައްވާނެ ކަމަށް ސަރުކާރުން ވަނީ ބުނެފައެވެ. މައުލޫމާތު ލިބިފައިވާ ގޮތުގައި ހުޅުމާލެ އަދި ގުޅިފަޅާއި ގިރާވަރު ފަޅުގެ އިތުރު މަސައްކަތްތަކެއް ކުރިއަށް ނުގެން ގޮސް ފުށިދިއްގަރު ފަޅު ހިއްކާ، އެތަނުން ބޯހިޔާވަހިކަން ދިނުމަށް ސަރުކާރުން ވަނީ ނިންމާފައެވެ.
