ރާއްޖޭގައި ހިމެނޭ އެންމެހައި ކުޅިވަރު އެސޯސިއޭޝަންތަކަށް ބޭނުންވާ އެހީތެރިކަން ދެއްވައި، އެސޯސިއޭޝަންތައް އަމިއްލަ ފައި މައްޗަށް ތެދުވެވޭ ވަރު ކޮށްދެއްވާނެ ކަމަށް، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެ އެވެ.
ރާއްޖެ ޓީވީ އަށް ދެއްވި ޚާއްސަ އިންޓަވިޔުއެއްގައި ރާފިޢު ވިދާޅުވީ، ކުޅިވަރު އެސޯސިއޭޝަންތައް ހަރުދަނާ ކުރަން ޖެހޭ ކަމަށާއި، އެއީ ވަރަށް ބޮޑު އަހަންމިއްޔަތުކަމެއް ދީގެން ކުރަން ޖެހޭ ކަމެއް ކަމަށެވެ. އެގޮތުން އެސޯސިއޭޝަންތަކަށް ދޭންވާ އެހީތެރިކަން ފޯރު ކޮށްދޭނެ ނިޒާމެއް ކަނޑަ އަޅަން ޖެހޭ ކަމަށް ރާފިޢު ދެކިލައްވަ އެވެ. އެކަމުގެ ތެރެއިން މަސައްކަތްކޮށް، އެސޯސިއޭޝަންތައް އަމިއްލަ ފައި މައްޗަށް ތެދުވެވޭނެ ގޮތް ހައްދަވައި ދެއްވާނެ ކަމަށް ރާފިޢު ވަނީ ވިދާޅުވެފަ އެވެ. އެކަމަށްޓަކައި، ކުރަން ޖެހޭ އެންމެ ބޮޑު އެއް މަސައްކަތަކީ އެސޯސިއޭޝަންތަކަށް މާލީ ގޮތުން އެހީތެރިކަން ދިނުންކަން ފާހަގަކުރައްވައި ވަޒީރު ވިދާޅުވީ، މިއަދު އެސޯސިއޭޝަންތަކަށް އޮތް އެންމެ ބޮޑު އެއް ގޮންޖެހުމަކީ ވެސް މާލީ ގޮންޖެހުން ކަމަށެވެ.
އެގޮތުން މިހާރުގެ ސަރުކާރުގެ ސިޔާސަތުތަކުގެ ތެރޭގައި އެސޯސިއޭޝަންތައް ބާރުވެރި ކުރުވުމަށް ވެސް ގިނަ ކަންކަން ކުރައްވަން ހިމަނުއްވާފައި ވާނެ ކަމަށް ރާފިޢު ވިދާޅުވި އެވެ. މާލީ ގޮތުން އެސޯސިއޭޝަންތައް ބާރުވެރި ކުރުވުމަކީ، ޤާނޫނީ ގޮތުން ކުރަން ޖެހޭ ކަމަކަށް ވެއްޖެ ނަމަ، އެ މަގުން މަސައްކަތް ކުރައްވައިގެން ވެސް، އެކަމަށް ނިޒާމެއް ޤާއިމު ކުރައްވަން މަސައްކަތް ކުރައްވާނެ ކަމަށް ރާފިޢު ވަނީ ވިދާޅުވެފަ އެވެ.
އޭގެ ތެރޭގައި އެސޯސިއޭޝަންތައް އަމިއްލަ ފައި މައްޗަށް ތެދުވެވޭނެ، ފައިނޭންޝިއަލީ، މާނަައަކީ އެ ބޭފުޅުންނަށް އެންމެ ބޮޑު ގޮންޖެހުމަކަށް ވެފައި އޮންނަނީ ބަޖެޓުގެ ދަތިކަން. ފައިސާގެ ދަތިކަން. އެހެންވީމާ، މި ސަރުކާރުގެ ސިޔާސަތުގެ ތެރޭގައި އެސޯސިއޭޝަންތަކަށް ފައިނޭންޝިއަލީ ބެނެފިޓް ލިބޭނެ ނިޒާމެއް ކަނޑައަޅައި، އެކަން ކުރެވޭނެ ގޮތެއް، އެއީ ޤާނޫނަށް އެމެންޑްމަންޓެއް ގެނެސްގެން ނަމަވެސް، އެކަން ކުރެވޭނެ ގޮތުގެ ނިޒާމެއް ކަނޑައެޅުން.ޢަބްދުﷲ ރާފިޢު / ކުޅިވަރާއި ހަށިހެޔޮކަމާ ބެހޭ ވަޒީރު
ކުޅިވަރު އެސޯސިއޭޝަންތަކަށް ބާރުވެރިކަން ދިނުމަކީ މި ސަރުކާރުގެ ރިޔާސީ ވައުދުގެ ތެރޭގައި ހިމެނޭ ކަމެކެވެ. އަބަދު ވެސް ރާއްޖޭގެ ކުޅިވަރު އެސޯސިއޭޝަންތަކަށް ދިމާވާ އެންމެ ބޮޑު އެއް މައްސަލަ އަކީ ވެސް، މާލީ ގޮތުން ކުރިމަތިވާ ގޮންޖެހުންތަކެވެ. އެކަން ޙައްލު ކުރުމަށް ސަރުކާރުތަކުން އަންނަނީ އަބަދު ވެސް ވަރަށް ބޮޑަށް މަސައްކަތް ކުރަމުންނެވެ.
މީގެ އިތުރުން ވަޒީރު ވިދާޅުވީ، ކުޅިވަރުގެ ޤައުމީ ކައުންސިލަކީ ވަރަށް މުހިންމު ތަނެއް ކަމަށެވެ. އެހެންކަމުން، އެމަނިކުފާނުގެ ވަޒީރު ކަމުގައި ކުޅިވަރުގެ ޤައުމީ ކައުންސިލް އިތުރަށް ހަރުދަނާކޮށް، މަސައްކަތްތައް މިހާރަށްވުރެ ބާރު ދުވެލީގައި ކުރިއަށް ގެންދިޔުމަށް މަސައްކަތް ކުރައްވާނެ ކަމަށް ވެސް ވިދާޅުވި އެވެ. އަދި އެ ކައުންސިލްގެ މަސައްކަތް، މެދު ކެނޑުމެއް ނެތި، ދާއިމަށް ކުރިއަށް ގެންދެވޭނެ ގޮތްތަކަކަށް ކަންތައް އިންތިޒާމު ކުރައްވާނެ ކަމަށް ވެސް ވަނީ ވިދާޅުވެފަ އެވެ.
