ބޭނުންވަނީ ވަކި އުސޫލެއްގެ ދަށުން ދިވެހި ކުޅިވަރު ކުރިއަށް ގެންދަން ކަމަށް، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެ އެވެ.
ރާފިޢު މިހެން ވިދާޅުވީ، ރާއްޖެ ޓީވީ އަށް ދެއްވި ޚާއްސަ އިންޓަވިޔުއެއްގަ އެވެ. އެގޮތުން، ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ސަރުކާރުގައި ކުޅިވަރު ވަކި ވުޒާރާއެއްގެ ގޮތުގައި ބޭއްވީ، ވަރަށް ގިނަ ކަންތައްތަކެއް ހާސިލު ކުރުމުގެ ނިޔަތުގައި ކަމަށް ވިދާޅުވި އެވެ. އެހެންކަމުން، އެ ވުޒާރާގެ އެންމެ ބޮޑު އެއް މެންޑޭޓަކީ، ވަކި އުސޫލެއްގެ ދަށުން ކުޅިވަރު ކުރިއަށް ގެންދިޔުން ކަމަށް ވެސް ވަނީ ވިދާޅުވެފަ އެވެ.
މީގެ އިތުރުން، ބައިނަލްއަޤުވާމީ ފެންވަރުގައި ނުވަތަ ރާއްޖެ ހިމެނޭ އޭޝިއާ ސަރަހައްދުގައި ދިވެހި އެތުލީޓުންނަކީ މެޑަލް ކާމިޔާބު ކުރެވޭ ފެންވަރުގެ ބަޔަކަށް ހަދަން ބޭނުންވާ ކަމަށް ވެސް ރާފިޢު ވިދާޅުވި އެވެ. ހަމައެއާއެކު، އޮލިމްޕިކްސް ކުޅިވަރުތަކާއި، ނުވަތަ ވޯލްޑް ކަޕް ކަހަލަ މުބާރާތްތަކާ ހަމައަށް ދިޔުމަށް، ކޮށަން ޖެހޭ މަގާއި، ކުރަން ޖެހޭ ކަންތައްތަކުގެ ދިގު ރާސްތާ ޕްލޭނެއް އެކުލަވާލަން ބޭނުންފުޅުވާ ކަމަށް ރާފިޢު ވިދާޅުވި އެވެ. އެހާ ހިސާބަށް ދިވެހި އެތުލީޓުންނަށް ވާސިލުވެވޭނެ ގޮތް ކަނޑައަޅައި، އެކަންކަން ތަންފީޒު ކުރުމަށްޓަކައި ކުރަން ޖެހޭ ކަންކަން، އެއް އަހަރުން އަނެއް އަހަރަށް ކުރައްވަމުން ގެންދަވާނެ ކަމުގެ ޔަގީންކަން ވެސް ވަނީ ދެއްވައިފަ އެވެ.
އެކަންކަމުގެ ތެރެއިން މަދަރުސާ ތަކުގެ މެދުގައި ކުޅިވަރުގެ ކަންކަން މިހާރަށްވުރެ ހަރުދަނާ ގޮތެއްގައި ކުރިއަށް ގެންދަން ވެސް ރާފިޢު ބޭނުންވެލައްވަ އެވެ. އަނެއްކޮޅުން ރާއްޖޭގެ އެކި އެކި ކަންކޮޅުތަކުގައި ވީހާ ވެސް ގިނައިން ކުޅިވަރު ކުޅެވޭނެހެން މުބާރާތްތައް ބާއްވައި، ކުދިންގެ ހުނަރު އިތުރަށް ތަރައްޤީ ކުރުމަށް ވެސް ޚާއްސަ އަހަންމިއްޔަތު ކަމެއް ދިނުމަށް ވަނީ ނިންމަވައިފަ އެވެ. އެކަންކަމަށް ޓެކްނިކަލް އެހީތެރިކަން ބޭނުންވާނެކަން ފާހަގަކުރައްވައި ރާފިޢު ވިދާޅުވީ، އަވަށްޓެރި ޤައުމުތަކުގެ އެހީތެރިކަމާއެކު އެކަން ވެސް ކުރައްވާނެ ކަމަށެވެ.
ކުދިންގެ ޓެލެންޓްސް އިތުރަށް ބިލްޑު ކުރުން. އަދި އެއާއެކު ޓެކްނިކަލް ސަޕޯޓު، އެހެން ޤައުމުތަކުން ހޯދައިގެން ނަމަވެސް، ކޯޗިންނާއި، ފިޓްނަސް އާއި، މެޑިކަލް ފެސިލިޓީސްއާ، މިހުރިހާ އެއްޗެއް އިންކޯޕަރޭޓްކޮށްގެން، އޯގަނައިޒް ގޮތަކަށް ކުޅިވަރު ބައްޓަން ވެގެން ދިޔުން އަސްލުގަ އަޅުގަނޑުމެންގެ އެންމެ ބޮޑު މަޤްސަދަކީ.ޢަބްދުﷲ ރާފިޢު / ކުޅިވަރާއި ހަށިހެޔޮކަމާ ބެހޭ ވަޒީރު
މީގެ އިތުރުން ދިވެހި އެތުލީޓުންގެ ފިޓްނަސް ރަނގަޅު ފެންވަރެއްގައި ބެހެއްޓުމަށް، އެންމެހާ ކުޅިވަރު އެސޯސިއޭޝަންތަކާއެކު މަސައްކަތް ކުރައްވާނެ ކަމަށް ވަޒީރު ވިދާޅުވި އެވެ. އެގޮތުން، ކުޅުންތެރިންގެ ފިޓްނަސް ފެންވަރު ދެނެގަނެވޭނެ ގޮތްތަކާއި، އެކަންކަން ބެލެހެއްޓުމަށް އެކަށީގެންވާ ނިޒާމެއް އެކުލަވާނެ ކަމަށް ވެސް ވަނީ ވިދާޅުވެފަ އެވެ. އެކަންކަމުގެ ތެރެއިން ކުޅިވަރުގެ ހައި ޕާފޮމަންސް ސެންޓަރެއް ޤާއިމު ކުރުމުގެ މަސައްކަތް ވަރަށް ފުޅާ ދާއިރާއެއްގައި ކުރައްވާނެ ކަމަށް ރާފިޢު ވަނީ ވިދާޅުވެފަ އެވެ. މީގެ އިތުރުން ރެކްރިއޭޝަންގެ ތެރެއިން، ވެޓަރަންސް ނުވަތަ އިސް ރަށްވެހިންނަށް އަމާޒުކޮށްގެން ޚާއްސަ ކަންތައްތަކެއް ވެސް ކުރައްވަން ވަނީ ނިންމަވައިފަ އެވެ.
މީގެ ކުރިން ޒުވާނުން އަދި ކުޅިވަރު އެއްކޮށް ވުޒާރާ އޮތް ނަމަވެސް، އައު ސަރުކާރުން ނިންމަވާފައި ވަނީ އެ ދެ ބައި ވަކިކޮށްލުމަށެވެ. އެއީ، ދެ ބަޔަށް ވެސް ޚާއްސަ ސަމާލުކަމެއް ދެއްވަން ބޭނުންވާތީ އެވެ.
