ރާއްޖޭގައި ތިބި އިންޑިއާ ސިފައިން: އަދަދު ހާމަކުރާނީ މައުލޫމާތު އެއްކޮށް ނިމުމުން

ރާއްޖޭގައި ތިބި އިންޑިއާ ސިފައިންގެ އަދަދު، އެ މައުލޫމާތު އެއްކޮށް ނިމުމުން ހާމަކުރާނެ ކަމަށް ރައީސް އޮފީހުން ބުނެފިއެވެ.

ރާއްޖެއެމްވީއަށް މިނިސްޓަރ އެޓް ދަ ޕްރެޒިޑެންޓްސް އޮފީސް ފޮރ ސްޓްރެޓީޖިކް ކޮމިއުނިކޭޝަން އިބްރާހީމް ޚަލީލު ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކެމްޕޭންގައި ވެވަޑައިގެންނެވި ވައުދުފުޅުތައް ފުއްދަވާނެ ކަަމަށެވެ. އަދި އެމަނިކުފާނު ހާމަކުރައްވަން ވިދާޅުވި ނަންބަރެއް ވިޔަސް އަދި އެ މައުލޫމާތެއް ވިޔަސް ހާމަކުރައްވާނެކަމުގެ ޔަޤީންކަން އެބައޮތް ކަމަށެވެ.

ރާއްޖޭގައި ގާއިމުވެ ތިބި އިންޑިއާ ސިފައިން އަނބުރާ ގައުމަށް ފޮނުވައިލުމަކީ އާ ސަރުކާރުގެ އެންމެ ބޮޑު އެއް ރިޔާސީ ވައުދެވެ. ރައީސް ހުވާކުރައްވަމުން ދެއްވި ތަގުރީރުގައި ވެސް ވިދާޅުވީ ރާއްޖޭގައި ތިބި ބޭރުގެ ހުރިހާ ސިފައިން އަނބުރާ ފޮނުވައިލާނެ ކަމަށެެވެ.

ރާއްޖެއަށް އިންޑިއާއިން ހަދިޔާކުރި ހެލިކޮޕްޓަރުތަކާއި ޑޯނިއާ ފްލައިޓުތައް ބަލަހައްޓާށާއި އެކިއެކި ކަންކަމުގައި ރާއްޖޭގައި އިންޑިއާ ސިފައިން ގާއިމުވެ ތިބެއެވެ. ސަރުކާރުން އަދި މިއަދަދުތައް ހާމަކޮށްފައިނުވާއިރު އުތުރުތިލަފަޅުގެ އެއްބަސްވުމުގެ ތަފްސީލު ވެސް ހާމަކުރައްވާނެ ކަމަށް ރައީސް ޑރ. މުއިއްޒު ކެމްޕޭން ކުރެއްވި ދުވަސްވަރު ވަނީ ވިދާޅުވެފައެވެ.

ރައީސްގެ ވެރިކަމުގެ ފުރަތަމަ 100 ދުވަހުގެ ތެރޭގައި ކުރައްވާނެ ކަންތައްތަކުގެ ތެރޭގައި ރާއްޖޭގައި ތިބި ބޭރުގެ ސިފައިން ބޭލުމުގެ މަސައްކަތް ވެރިކަމުގެ ފުރަތަމަ ދުވަހު ފައްޓަވާނެ ކަމަށް ވަނީ ވިދާޅުވެފައެވެ. އަދި ރާއްޖޭގައި ތިބި އިންޑިޔާގެ ސިފައިން އަނބުރައި އެގައުމަށް ގެންގޮސްދެއްވުމަށް އެދި އިންޑިޔާގެ ސަރުކާރުގައި ރަސްމީގޮތުން ރައީސް މުއިއްޒު ވަނީ އެދިވަޑައިގެންފައެވެ. އެހެންނަމަވެސް ބޭރުގެ ސިފައިން ބޭލުމަށްޓަކައި ކުރި މަސައްކަތުގެ ތަފްސީލެއް ރައީސް އޮފީހުން ހާމައެއް ނުކުރެއެވެ.

މީގެ އިތުރުން ކުރީ ސަރުކާރުން އެހެން ޤައުމުތަކާއެކު ވެފައިވާ ސިއްރު އެއްބަސްވުންތަކުގައި ރާއްޖޭގެ ސިޔާދަތާއި މިނިވަންކަމަށް ނުރައްކާވާގޮތަށް ހުރި ނުކުތާތައް އުވާލައްވާނެ ކަމަށް ވެސް ރައީސް މުއިއްޒުގެ ފުރަތަމަ 100 ދުވަހުގެ ވައުދުގައި ވަނީ ވިދާޅުވެފައެވެ. އަދި އެ މަސައްކަތް ކުރައްވާނެ ވެރިކަމުގެ ފުރަތަމަ 4 ހަފްތާގެ ތެރޭގައި ކަމަށް ވަނީ ވިދާޅުވެފައެވެ.