ރައީސް މުލީއާގެއަށް ބަދަލުވެވަޑައިގަންނަވާނީ މަރާމާތުގެ މަސައްކަތް ނިމުމުން
މުލީއާގޭގެ މަރާމާތުގެ މަސައްކަތް ދަނީ ކުރިއަށް
މުލީއާގެ
ރައީސުލްޖުމްހޫރިއްޔާ ޑރ. މުހައްމަދު މުއިއްޒު މުލީއާގެއަށް ބަދަލުވެވަޑައިގަންނަވާނީ މަރާމާތުގެ މަސައްކަތް ނިމުމުން ކަމަށް ރައީސް އޮފީހުން ބުނެފިއެވެ.
ރާއްޖެއެމްވީއަށް މިނިސްޓަރ އެޓް ދަ ޕްރެޒިޑެންޓްސް އޮފީސް ފޮރ ސްޓްރެޓީޖިކް ކޮމިއުނިކޭޝަން އިބްރާހީމް ޚަލީލު ވިދާޅުވީ މުލީއާގޭގެ މަރާމާތުގެ މަސައްކަތް ކުރިއަށްދާ ކަމަށާއި އެ މަސައްކަތް ނިމުމުން ބަދަލުވެވަޑައިގަންނަވާނެ ކަމަށެވެ. މުލީއާގޭގެ މަރާމާތުގެ މަސައްކަތަށް ނަގާނީ ކިހާ ދުވަހެއް ކަމެއް އަދި ނޭނގެއެވެ.
ރައީސް މުއިއްޒު ހުންނަވާނީ އެ މަނިކުފާނުގެ އަމިއްލަ ގެކޮޅު ކަމަށްވާ މ. ދިމްޔާތުގައެވެ.
ކުރީގެ ރައީސް އިބްރާހީމް މުހައްމަދު ސާލިހު މުލީއާގެއިން ނުކުމެވަޑައިގަތީ މި މަހުގެ 10 ވަނަ ދުވަހުއެވެ.
މީގެ 104 އަހަރު ކުރިން އައްސުލްތާން މުހައްމަދު ޝަމްސުއްދީންގެ ވެރިކަމުގައި ބިނާކޮށްފައިވާ މުލީއާގޭގައި ކުރީގެ ރައީސް މައުމޫން އަބްދުލްގައްޔޫމް ވަގުތީ ގޮތުން ދިރިއުޅުއްވިއެވެ.
