ހުސްވެފައިވާ އަލް އިއްތިހާދުގެ ކޯޗުކަމުގެ މަގާމަށް އާޖެންޓީނާގެ މާސެލޯ ގަލާޑޯ ހަމަޖައްސައިފި އެވެ.

އެ މަގާމަށް އުމުރުން 47 އަހަރުގެ ގަލާޑޯ ހަމަޖައްސާފައިވާކަން އަލް އިއްތިހާދުން ވަނީ ރަސްމީކޮށް ހާމަކޮށްފަ އެވެ. އަލް އިއްތިހާދުގެ ކޯޗުކަމާ ގަލާޑޯ ހަވާލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން، 2025 ވަނަ އަހަރުގެ ޖޫން މަހުގެ ނިޔަލަށް އޭނާ އެ ކުލަބުގައި ހުންނާނެ އެވެ. އެ މުއްދަތު ހަމަވުމުން، އަލް އިއްތިހާދުން ބޭނުންވާ ހިނދެއްގައި، އިތުރު ދެ އަހަރަށް އެއްބަސްވުން އައު ކުރުމުގެ ފުރުސަތު ވެސް އެއްބަސްވުމުގެ ދަށުން އޮވެ އެވެ. އަލް އިއްތިހާދުގެ ކޯޗުގެ ގޮތުގައި ރަސްމީކޮށް ގަލާޑޯ ދައްކާލުން އޮންނާނީ މި ހަފްތާ ބަންދުގަ އެވެ.

ގަލާޑޯ އޭނާގެ ކޯޗިން ކެރިއަރު ފެށީ 2011 ވަނަ އަހަރު އުރުގުއޭގެ ނަސިއޯނެލް އިންނެވެ. އެ ކުލަބަށް އެއް އަހަރު ދުވަހު އިރުޝާދު ދިނުމަށްފަހު، އޭނާ ވަނީ އެ ކުލަބު ދޫކޮށްލައިފަ އެވެ. އޭގެ ދެ އަހަރު ފަހުން 2014 ވަނަ އަހަރު ގަލާޑޯ ހަވާލުވީ އާޖެންޓީނާގެ ރިވާ ޕްލޭޓަށެވެ. އެ ކުލަބު އޭނާ ދޫކޮށްލީ މިދިޔަ އަހަރުގެ ނޮވެމްބަރު މަހު އެވެ. އޭގެ ފަހުން ގަލާޑޯ ހުރީ ދުވަސްކޮޅަކަށް ބްރޭކަށް ނަގަައިގެންނެވެ.

އަލް އިއްތިހާދުގެ ކޯޗުކަމުގެ މަގާމު ހުސްވީ ކުރިން އެ މަގާމުގައި ހުރި ޕޯޗުގަލްގެ ނޫނޯ އެސްޕިރިޓޯ ސަންޓޯ މަގާމުން ވަކި ކުރުމާއެކު އެވެ. އޭގެ ފަހުން އަލް އިއްތިހާދުން ގެންނަން ބޭނުންވި ކޯޗުންގެ ލިސްޓުގައި އޮތީ ރެއާލް މެޑްރިޑުގެ ކުރީގެ ކޯޗު ޒިދާން، ރޯމާގެ މިހާރުގެ ކޯޗު މޮރީނިއޯ އަދި ސެވިއްޔާގެ ކުރީގެ ކޯޗު ލޮޕެޓެގީ އެވެ. މީގެ ތެރެއިން ލޮޕެޓެގީ އާއެކު އަލް އިއްތިހާދުން ފުޅާ ދާއިރާއެއްގައި މަޝްވަރާ ކުރި ނަމަވެސް، އޭނާ ވަނީ އެ ކުލަބާ ހަވާލުނުވާން ނިންމައިފަ އެވެ. ގަލާޑޯ އާއެކު އަލް އިއްތިހާދުން މަޝްވަރާ ކުރަން ފެށީ އޭގެ ފަހުންނެވެ.