ޖަޕާނުގެ ޕާލިމެންޓަރީ ވައިސް މިނިސްޓަރު، ރައްޔިތުންގެ މަޖިލީހުގެ ރައީސާ ބައްދަލުކުރައްވައިފި

ޖަޕާނުގެ ޕާލިމެންޓަރީ ވައިސް މިނިސްޓަރ ފޯ ފޮރިން އެފެއަރޒް، ހިޒް އެކްސެލެންސީ މިސްޓަރ ކޮމުރާ މަސަހިރޯ، ރައްޔިތުންގެ މަޖިލީހުގެ ރައީސް މުޙައްމަދު އަސްލަމްގެ އަރިހަށް އިހުތިރާމްގެ ޒިޔާރަތެއް ކުރައްވައިފިއެވެ.

ޖަޕާނުގެ ޕާލިމެންޓަރީ ވައިސް މިނިސްޓަރު ރާއްޖެ ވަޑައިގަތީ، ރައީސުލްޖުމްހޫރިއްޔާ ހުވާކުރެއްވުމުގެ ރަސްމިއްޔާތަށެވެ. އޭނާ މަޖިލީހުގެ ރައީސާ ބައްދަލުކުރެއްވީ ހޮނިހިރު ދުވަހުގެ ހެނދުނު، ރައްޔިތުންގެ މަޖިލިސްކުރާ ގޭގައެވެ.

މި ބައްދަލުކުރެއްވުމުގައި، ރާއްޖެއާ ޖަޕާނާ ދެމެދު އޮންނަ ގާތް ރަހުމަތްތެރި ގުޅުން ފާހަގަކުރައްވައި، ޖަޕާނުން ރާއްޖޭގެ ތަރައްގީއަށް ވެދޭ އެހީތެރިކަމަށްޓަކައި ރައްޔިތުންގެ މަޖިލީހުގެ ރައީސް އަސްލަމް ވަނީ، ޖަޕާން ސަރުކާރަށާއި ރައްޔިތުންނަށް ޝުކުރު އަދާކުރައްވާފައެވެ. އެގޮތުން ޚާއްސަކޮށް، ދަނޑުވެރިކަމާއި މަސްވެރިކަމުގެ އިތުރުން، ފާއިތުވި ތިން އަހަރު ރާއްޖޭގެ ސިއްހީ ދާއިރާއަށް ޖަޕާނުން ވެދީފައިވާ އެހީ އެމަނިކުފާނު ފާހަގަކުރެއްވިއެވެ.

މީގެ އިތުރުން ރައްޔިތުންގެ މަޖިލީހާ، ޖަޕާނުގެ ގާނޫނު ހަދާ މަޖިލީހާ ދެމެދު އޮންނަ ގުޅުން ވަރުގަދަ ކުރެއްވުމަށް މަސައްކަތް ކުރައްވާނެ ކަމަށްވެސް އެމަނިކުފާނު ވިދާޅުވިއެވެ.

މިބައްދަލުކުރެއްވުމުގައި، އިގްތިސާދީ ދާއިރާގެ އިތުރުން އެހެނިހެން ދާއިރާތަކުން ރާއްޖެއާ ޖަޕާނާ ދެމެދު އޮންނަ ގާތް ރަހުމަތްތެރި ގުޅުން އިތުރަށް ބަދަހިކުރެއްވުމުގެ މުހިއްމުކަން، ޖަޕާނުގެ ޕާލިމަންޓްރީ ވައިސް މިނިސްޓަރު ފާހަގަކުރެއްވިއެވެ. އަދި މި ގުޅުން ބަދަހިކުރެވޭނެ ގޮތްތަކާ ބެހޭގޮތުން މަޝްވަރާކުރެއްވިއެވެ.