އައު ސަރުކާރުގައި ރާއްޖޭ ބައިނަލްއަގުވާމީ އާއުސްމިންތަކަށް ގެންގޮސްދޭނެ ކަމަށް އުންމީދުކުރަން: ޝާހިދު
18 ނޮވެމްބަރު 2023 | ހޮނިހިރު 08:14މިނިސްޓްރީ އޮފް ފޮރިން އެފެއާޒަކީ 90 އަހަރުގެ ދިގު މާޒީއެއް އޮތް ވުޒާރާއެއް
ކުރީގެ ފޮރިން މިނިސްޓަރު އަބްދުﷲ ޝާހިދު
އައު ސަރުކާރުގައި ދިވެހިރާއްޖޭ ބައިނަލްއަގުވާމީ އާއުސްމިންތަކަށް ގެންގޮސްދޭނެ ކަމަށް އުންމީދު ކުރައްވާ ކަމަށް ކުރީ ސަރުކާރުގެ ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
އައު ސަރުކާރުގެ ފޮރިން މިނިސްޓަރު މޫސާ ޒަމީރަށް ތަހުނިޔާ ދަންނަވައި ފޮނުއްވި ސިޓީގައި ޝާހިދު ވިދާޅުވީ މިނިސްޓްރީ އޮފް ފޮރިން އެފެއާޒަކީ 90 އަހަރުގެ ދިގު މާޒީއެއް އޮތް ވުޒާރާއެއް ކަމަށާއި، ހާރިޖިއްޔާއަކީ ދިވެހި ދައުލަތުގެ އެންމެ މަތީ މަސްލަހަތު ހިމާޔަތްކުރުމާއެކު އެއިރެއްގައި ރައީސުލްޖުމްހޫރިއްޔާގެ ހާރިޖީ ސިޔާސަތު ތަންފީޒު ކުރުމުގެ މަސައްކަތުގެ އެންމެބޮޑު މަސްއޫލިއްޔަތު އަދާކުރާ ވުޒާރާ ކަމަށެވެ.
ދިގު ތާރީހެއްގެ ތެރެއިން އުފެދިފައިވާ އުސޫލުތަކާއި ބައިނަލްއަގުވާމީ ޑިޕްލޮމެޓިކް ހަމަތަކާއި އުސޫލުތަކުގެ ތެރެއިން ހިނގަމުން އައިސްފައިވާ މިހާރު ވަކި ގާނޫނެއްގެ ހިޔާވަހިކަމުގެ ދަށުން ހިނގަމުންދާ ވުޒާރާއެއް ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ ދިވެހި ހާރިޖިއްޔާގައި މިހާރު ތިބި މުވައްޒަފުންނަކީ މިވޭތުވެދިޔަ ފަސް އަހަރު ދުވަހު ކުރި މަސައްކަތުގައި އެހީތެރިވި ޕްރޮފެޝަނަލް ކަމަށް ގާބިލް ހީވާގި އިހްލާސްތެރި މުވައްޒަފުންތަކެއް ކަމަށެވެ. ހާރިޖީ ދާއިރާއިން ހޯދައިފައިވާ ކުރިއެރުމެއްވާނަމަ އެކުރިއެރުމެއް ހޯދިފައިވަނީ މި ޓީމުގެ ސަބަބުން ކަމަށާއި، އައު ލީޑަރޝިޕްގެ ދަށުން ޓީމް ހާރިޖީން ދިވެހިރާއްޖޭ ބައިނަލްއަގުވާމީ އާއުސްމިންތަކަށް ގެންގޮސްދޭނެ ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ މޫސާ ޒަމީރުގެ ވަޒީރުކަމުގައި ބޭރު ދުނިޔޭގައި ރާއްޖޭގެ ނަން އިތުރަށް ވިދަމުން ދިއުމަކީ އެދޭ އެދުމެއް ކަމަށެވެ.
