މުޢިއްޒުގެ ފުރަތަމަ ތަޤުރީރުގައި ފަލަސްޠީނުގެ ވާހަކަ ނެތުމުން ފަޅުކަން!

ދިވެހިރާއްޖެ އަކީ އަބަދު ވެސް ފަލަސްޠީނުގެ ރައްޔިތުންނާއެކު ދެމި އޮންނަ ޤައުމެކެވެ. އާބާދީގެ ގޮތުން ރާއްޖެ ކިތަންމެ ކުޑަ ނަމަވެސް، ދުނިޔޭގެ ބޮޑެތި ޙަފްލާތަކުގައި ވެސް ދިވެހިން ވަނީ ފަލަސްޠީނުގެ ޙައްގުގައި ބަސް ބުނެފަ އެވެ. އަބަދު ވެސް ދިވެހިންގެ ސްޓޭންޑަކީ، ފަލަސްޠީނާއެކު ތިބުމެވެ. މިއީ މިހާތަނަށް އައިއިރު، ދުވަހަކު ވެސް ބަދަލު ނުވެ އޮތް ކަމެކެވެ.

ހުކުރު ދުވަހަކީ ރާއްޖޭގެ ޖުމްޙޫރީ ހަޔާތުގައި ވަރަށް ވެސް މުހިންމުވި ދުވަހެކެވެ. ރާއްޖޭގެ އަށް ވަނަ ރައީސް ނުވަތަ ދެ ވަނަ ޖުމްޙޫރިއްޔާގެ ހަތް ވަނަ ރައީސް، ރައީސްކަމުގެ ހުވާ ކުރެއްވި ދުވަހެވެ. އައު ސަރުކާރަކަށް ދިވެހި އުންމަތް މަރުޙަބާކީ އުފާވެރި ދުވަހެވެ. އިއްތިފާގުން ނަމަވެސް މި ދުވަސް މި ދިމާވީ، ދިވެހި ކުދި ބޮޑު އެންމެހާ ރައްޔިތުން ފަލަސްޠީނުގެ ޙައްގުގައި އަޑު އުފުލަމުން އައި ދުވަސް ވަރަކާ އެވެ. ވެރި ރަށް މާލޭގެ ބޮޑެތި މަގުތަކުގައި ފަލަސްޠީނުގެ ޙައްގުގައި އަޑު ގުގުމަމުން ދިޔައިރު، ދަޢުލަތުގެ ބާރުތަކަށް ވެސް ރައްޔިތުން ވަނީ އެ އަޑު އިއްވައިފަ އެވެ.

އެހެން ނަމަވެސް، ދިވެހިރާއްޖޭގެ އައު ރައީސުލްޖުމްޙޫރިއްޔާ ޑރ މުޙައްމަދު މުޢިއްޒު ހުވާ ކުރެއްވުމަށްފަހު، ޤައުމާ ކުރެއްވި ފުރަތަމަ މުޚާތަބުގައި ފަލަސްޠީނުގެ ވާހަކަ ނެތުމުން ފަޅުކަން އިޙުސާސް ކުރެވެ އެވެ. މި ފަޅުކަން އިޙުސާސް ކުރެވޭ އެތައް ސަބަބުތަކެއް ވެސް އެބަ ހުއްޓެވެ. ރައީސް މުޢިއްޒު ހުވާ ކުރެއްވުމުގެ ދަރުބާރަށް ވަޑައިގެންނެވި ރާއްޖޭގެ ކުރީގެ ރައީސުންނާއި، ރައްޔިތުންގެ މަޖިލީހުގެ މެމްބަރުންނާއި، ޢާންމު ރައްޔިތުން ވެސް ތިބީ ފަލަސްޠީނު ރަމްޒުކޮށްދޭ ގޮތަށެވެ. ފަލަސްޠީނުގެ ދިދަ ކަރުގައި އަޅުއްވައިގެން ތިބި މީހުންގެ އަދަދު ވެސް މަދެއް ނޫނެވެ. ދަރުބާރަށް ވަޑައިގެންނެވި ބައެއް މަޖިލިސް މެމްބަރުން ވަނީ، އެހެން މީހުނަށް ދިދަ ބައްސަވަން ވެސް ބައްސަވައިފަ އެވެ. މިކަހަލަ ދަރުބާރެއްގައި، ޤައުމާ މުޚާތަބު ކުރައްވައި، ދެއްވި ފުރަތަމަ ތަޤުރީރުގައި އެކުވެރި ފަލަސްޠީނުގެ ވާހަކަ ނެތުމުން، ދިވެހިން ދެރަ ވާނެ އެވެ.

އެނެއްކޮޅުން، ރައީސް މުޢިއްޒު ހުވާ ކުރެއްވުމުގެ ދަރުބާރުގައި ދުނިޔޭގެ އެކި ކަންކޮޅުތަކުން، މަމްދޫބުން ވަނީ ބައިވެރިވެ ވަޑައިގެންފަ އެވެ. ދުނިޔޭގެ ބާރުތަކުގެ މަމްދޫބުންނެވެ. ޚާއްސަކޮށް އެމެރިކާގެ ރައީސް ޖޯ ބައިޑެންގެ ޚާއްސަ ވަފުދެއް ވެސް ވަޑައިގެންނެވި އެވެ. އެހެންކަމުން، މިއީ ފަލަސްޠީނާމެދު އައު ސަރުކާރުގެ ސްޓޭންޑް، ނުވަތަ ދިވެހިންގެ ސްޓޭންޑް ފާޅުކޮށް ދައްކާލުމަށް ލިބުނު ފުރުޞަތެކެވެ. އިސްރާއީލުން ފަލަސްޠީނަށް ދެމުންދާ ޙަމަލާތަކަށް އެމެރިކާ ވާގިވެރިވާއިރު، އެމެރިކާ ރައީސްގެ މަމްދޫބުންގެ ކުރިމަތީ، ދިވެހިންގެ ރައީސް ފަލަސްޠީނުގެ ޙައްގުގައި ބަސް ބުނަން ކެރިވަޑައިގަންނަވަން ޖެހޭ ކަމަށް ގިނަ ރައްޔިތުން ދެކެ އެވެ. އެހެން ނަމަވެސް، ޖޯޝާއި، ފޯރި އަދި އުންމީދުގައި މުޅި ތަޤުރީރު ނިންމަވާލެއްވި އިރު ވެސް، ފަލަސްޠީނުގެ ނަން ނެތުމުން އުނިކަން އިޙުސާސް ކުރެވެ އެވެ.

ރައީސް މުޢިއްޒު ހުވާ ކުރުމުގެ ދަރުބާރު ނިމުމާއެކު، އެމަނިކުފާނުގެ ތަޤުރީރާމެދު އާންމުންގެ ޝުޢޫރުތައް ސޯޝަލް މީޑިއާގައި ދައުރުވާން ފެށި އެވެ. އެގޮތުން، ގިނަ މީހުން ދެކޭ ގޮތުގައި ރައީސް މުޢިއްޒުގެ ތަޤުރީރު ވަރަށް ވެސް ފުރިހަމަ އެވެ. ނަމަވެސް، އެ ތަޤުރީރުގައި ފަލަސްޠީނުގެ ވާހަކަ ނެތުމުން، ގިނަ ބަޔަކު ފާޑު ވެސް ކިޔެވެ. ރައީސްކަމުގެ ހުވާ ކުރެއްވުމަށްފަހު ދެއްވި ތަޤުރީރުގައި، އެ ވާހަކަ އަންނާނެ ކަމަށް އުންމީދު ކޮށްގެން ތިބި ކަމަށް ވެސް ބުންޏެވެ. ނަމަވެސް، އެ ވާހަކަ ނެތުމުން އާންމުންނަށް މުޅި ތަޤުރީރުން ވެސް ފަޅުކަމެއް އިޙުސާސް ކުރެވިއްޖެ އެވެ.