6 ޕްރިންސިޕަލަކަށް، ޕްރިންސިޕަލުންގެ ސްކޮލަރޝިޕް ދީފި

ސްކޫލްތަކުގެ ހިނގުން ހަރުދަނާ ކުރުމުގެ ގޮތުން ގާބިލު ޕްރިންސިޕަލުން އުފެއްދުމަށްޓަކައި، ޕްރިންސިޕަލުން ތަމްރީން ކުރުމަށް ހިންގާ ސްކޮލަރޝިޕް ޕްރޮގްރާމުގެ ދަށުން ހަ ޕްރިންސިޕަލަކަށް ސްކޮޕލަރޝިޕް ދީފިއެވެ.

ބުރާސްފަތި ދުވަހު އެޑިއުކޭޝަން މިނިސްޓްރީގައި ބޭއްވި ހާއްސަ ރަސްމިއްޔާތެއްގައި ސްކޮލަރޝިޕްތައް ޕްރިންސިޕަލުންނާ ހަވާލުކޮށްދެއްވީ އެޑިއުކޭޝަން މިނިސްޓަރު ޑރ. އައިޝަތު އަލީއެވެ.

އޭޑިއުކޭޝަން މިނިސްޓްރީން ގާބިލު ޕްރިންސިޕަލުން އުފެއްދުމަށް 10 ސްކޮލަރޝިޕްގެ ފުރުސަތު ހުޅުވާލީ މިއަހަރުގެ ޖޫން މަހުގައެވެ. މި ސްކޮލަރޝިޕްގެ ދަށުން ހުރިހާ ޚަރަދެއް އެ މިނިސްޓްރީން ކުރާއިރު މީގެ ތެރޭގައި ކިޔެވުމުގެ ޚަރަދާއި ދެކޮޅު ޓިކެޓް އަދި މުސާރައާ އެއްވަރުގެ އެލަވަންސެއް ވެސް ހިމެނެއެވެ.

މި ސްކޮލަރޝިޕްގެ ފުރުސަތު ލިބުނު ޕްރިންސިޕަލުންނަށް ވަކި މުއްދަތަކަށް، ކަނޑައެޅޭ ސަރުކާރުގެ ސުކޫލެއްގައި ޚިދުމަތްކުރުމަށް ބޮންޑުކުރެވޭނެއެވެ. މި ސްކޮލަރޝިޕް ގައި ކިޔެވުމަށް ހަމަޖެހިފައިވަނީ ޔުނިވަރސިޓީ އޮފް މަލާޔާ/ އިންޓަރނޭޝަނަލް އިސްލާމިކް ޔުނިވަރސިޓީ އޮފް މެލޭޝިއާގައެވެ. އެގޮތުން، ލެވެލް 9 ގައި މާސްޓަރ ފެންވަރުގެ މިކޯހުގެ ދާއިރާއަކީ ސްކޫލް އެޑްމިނިސްޓްރޭޝަން، ސްކޫލް މެނޭޖްމަންޓް، އެޑިޔުކޭޝަނަލް މެނޭޖްމަންޓް އަދި އެޑިޔުކޭޝަނަލް ލީޑަރޝިޕް އެންޑް މެނޭޖްމަންޓެވެ.

ސްކޫލްތަކުގެ ޕްރިންސިޕަލުން ތަމްރީންކުރުމަށް ހިންގާ މި ސްކޮލާރޝިޕް ޕްރޮގްރާމަކީ ރޭވުންތެރިކަމާއި އަދި ދެމެހެއްޓެނިވިގޮތެއްގައި، ގާބިލު ޕްރިންސިޕަލުން އުފެއްދުމަށް އެޑިއުކޭޝަން މިނިސްޓްރީން ތައާރަފުކުރި ޕްރޮގްރާމެެކެވެ. މި ޕްރޮގްރާމުގެ ދަށުން މިއީ ސްކޮލަރޝިޕް ދޭ ދެވަނަ ބެޗެވެ.