ގްރީން ޕްރެކްޓިސްއެއް ނުކުރޭ، ވާދައެއް ނުކުރާނެ!
17 ނޮވެމްބަރު 2023 | ހުކުރު 05:36ވެލެންސިޔާ ވަނީ ލީގުން ވަކިވެފައި
ލީގު މެޗެއްގައި ގްރީން ކުޅުންތެރިން ލަނޑު ޖެހުމަށްފަހު؛ ފޮޓޯ-އެފްއޭއެމް
ބޮޑު މެދުކެނޑުމަކަށްފަހު ބުދަ ދުވަހު އަލުން ފެށި ދިވެހި ޕްރިމިއަރ ލީގުގައި ގްރީން ސްޓްރީޓްސް ވެސް ވާދަނުކުރަން ނިންމައިފިއެވެ.
ލީގު މެދުކަނޑާލި ހިސާބުން, އަލުން ލީގު ފެށުމާ ހަމައަށް ވެސް އެޓީމުން ޕްރެކްޓިސް ކޮށްފައެއް ނުވެއެވެ. ގްރީންއަށް ދިމާވެފައިވާ މައްސަލައަކީ ފައިސާގެ ދަތިކަމެވެ. ގްރީން ސްޓްރީޓްސްގެ ނަން ލީގު ތާވަލްގައި އޮތް ނަމަވެސް އެ ކްލަބް ވާދަނުކުރާ ކަމުގެ ޔަޤީންކަން ކޯޗު އަލީ ނިޝްތާރު ދިނެވެ.
ލީގު ތާވަލް މިހާރު އޮތްގޮތުން ގްރީން ސްޓްރީޓްސްގެ ފުރަތަމަ މެޗު އޮތީ މިމަހުގެ 20 ވަނަ ދުވަހުއެވެ. އެމެޗުގައި ގްރީން ވާދަކުރާނީ ބުރު ސްޕޯރޓްސް ކްލަބާ ދެކޮޅަށެވެ. ކްލަބް ވެލެންސިޔާއިން ލީގުން ވަކިވާން ރަސްމީކޮށް އެފްއޭއެމްގައި އެދިފައިވާތީ އެކްލަބްގެ ނަމެއް ލީގު ތާވަލްގައި މިހާރު ނެތެވެ.
