ކޮމިޝަންގެ މަސައްކަތަށް ހުރަސްއަޅާ ފަރާތްތަކާމެދު ފިޔަވަޅުއަޅާނަން - އޭސީސީ
އޭސީސީއަށް އެއްބާރުލުން ދިން އޮމްބަޑްސްޕާސަންގެ އޮފީހުގެ މުވައްޒަފުންނަށް ވަނީ ފިޔަވަޅު އަޅާފައި
އެންޓިކޮރަޕްޝަން ކޮމިޝަންގެ މެންބަރުން
އެންޓި ކޮރަޕްޝަން ކޮމިޝަންގެ މަސައްކަތަށް ހުރަސްއަޅާ ފަރާތްތަކާ މެދު ފިޔަވަޅުއަޅާނެ ކަމަށް އެ ކޮމިޝަނުން ބުނެފިއެވެ.
އެ ކޮމިޝަނުން މިފަދައިން ބުނެފައިވަނީ އެ ކޮމިޝަނުން ތަޙުޤީޤުކުރަމުންދާ މައްސަލައަކާ ގުޅިގެން، އިންތިޤާލީ އިންސާފުގެ އޮމްބަޑްސްޕަރސަންގެ އޮފީހަށް ދިޔަ އެ ކޮމިޝަނުގެ ތަޙުޤީޤު ޓީމުތަކަށް އެ އޮފީހުގެ ބައެއް އިސްވެރިން ހުރަސްއަޅާފައިވާތީއާއި ތަޙުޤީޤަށް އެއްބާރުލުން ދިން މުވައްޒަފުންގެ މަސައްކަތްތަކަށް ހުރަސްއަޅައި، މުވައްޒަފުންނަށް ދީފައިވާ ބައެއް އެކްސެސްތައް ކަނޑާލައި، އެ މުވައްޒަފުން ވަޒީފާގެ މަސްއޫލިއްޔަތުން ސަސްޕެންޑްކޮށް، އެ އޮފީހުން އެމުވައްޒަފުންނާމެދު ފިޔަވަޅު އަޅާފައިވާތީ ކަމަށް އޭސީސީން ބުނެއެވެ. އޭސީސީން ވަނީ އެ މައްސަލަ އެންމެ ހަރުކަށި ޢިބާރާތުން ކުށްވެރިކޮށްފައެވެ.
އޭސީސީން ވަނީ ކޮމިޝަނުގެ މަސްއޫލިއްޔަތު އަދާކުރުމަށް އެއްބާރުލުންދީ، ފަސްޖެހުމެއްނެތި ޤާނޫނު ނެގެހެއްޓުމަށް އިންތިޤާލީ އިންސާފުގެ އޮމްބަޑްސްޕަރސަންގެ އޮފީހުގެ 3 މުވައްޒަފެއް މަސައްކަތްކޮށް ދެއްވާ ފައިވާތީ އެކަން ފާހަގަކޮށް އެމުވައްޒަފުންނަށް ޝުކުރުއަދާކޮށްފައެވެ.
މީގެ އިތުރުން ކޮމިޝަނުގެ ތަޙުޤީޤު ޓީމުން އިންތިޤާލީ އޮމްބަޑްސްޕަރސަންގެ އޮފީހަށް ގޮސް، ކޮމިޝަނުން ހިންގާ ތަޙުޤީޤަކަށް ބޭނުންވާ ލިޔެކިޔުމާއި މަޢުލޫމާތު ހޯދުމުގެ މަރުޙަލާގައި، އެ އޮފީހުން އާންމުންނަށް ދެމުންދިޔަ ޚިދުމަތްތަކަށް ބުރޫއަރާފާނެ ނުވަތަ ޚިދުމަތެއް ހުއްޓާލަންޖެހިދާނެ އެއްވެސް ޢަމަލެއް ހިންގާފައިނުވާނެކަމަަށް ބުނެފައިވެއެވެ.
ޤާނޫނު އަސާސީންނާއި ޤާނޫނުން ކޮމިޝަނާ މަތިކޮށްފައި އޮންނަ، މަސްއޫލިއްޔަތުތަކާއި އެ ކޮމިޝަނަށް ދީފައިވާ ބާރުތަކުގެ ތެރޭގައި، ކޮރަޕްޝަންގެ ޢަމަލެއްކަމަށް ތުހުމަތުކުރެވޭ ޢަމަލެއް އެއްވެސް ފަރާތަކުން ހިންގައިފިކަމުގެ ނުވަތަ ހިންގާކަމުގެ ނުވަތަ އެފަދަ ކަމެއްގެ މައްޗަށް ޝައްކުކުރެވިއްޖެނަމަ، އެ ކަމެއް ބަލައި ތަޙުޤީޤުކުރުމާއި، ދައުލަތް ހިންގުމުގައި ތެދުވެރިކަމާއި އަމާނާތްތެރިކަން ކުރިއެރުވުން ހިމެނޭ ކަމަށް އޭސީސީގެ ނޫސްބަޔާނުގައި ބުނެފައިވެއެވެ.
ކޮމިޝަނުން ބުނެފައިވަނީ މި ވަގުތު ކޮމިޝަނުގެ މެންބަރުންގެ ގޮތުގައި ތިބި ފަރާތްތަކުން ކޮމިޝަނުގެ މަސައްކަތާ ހަވާލުވިތާ މިހާތަނަށް ހިނގައި މިދިޔަ 1 އަހަރާ 8 މަސްދުވަހުގެ މުއްދަތުގައި، ކޮމިޝަނުން މަސައްކަތްކުރަމުން ގެންދަނީ، ޤާނޫނުއަސާސީންނާއި ޤާނޫނުން ކޮމިޝަނާ މަތިކޮށްފައިވާ މަސްއޫލިއްޔަތު އަދާކުރުމަށް ފަސްނުޖެހި ކަމަށެވެ. އަދި ކުރިޔަށް އޮތްތާގައިވެސް އެގޮތަށް މަސައްކަތް ކުރާނެ ކަމަށް ވަނީ ބުނެފައެވެ.
ކޮރަޕްޝަނުގެ ޢަމަލުތައް ހުއްޓުވުމަށާއި، އެފަދަ ތުހުމަތުތައް ބަލައި ތަޙުޤީޤުކުރުމަށް ކޮމިޝަނުން ކުރަމުންދާ މަސައްކަތަށް ގޮންޖަހާ، ކޮމިޝަނުގެ މަސްއޫލިއްޔަތު އަދާކުރުމަށް ހުރަސްއެޅުމަށް ޒިންމާދާރު މަޤާމުތަކުގައި ތިބޭ ފަރާތްތަކުން މަސައްކަތްކުރަމުން ގެންދާތީ، ކޮމިޝަނުގެ މަސްއޫލިއްޔަތު އަދާކުރުމަށް ހުރަސްއަޅާ ފަރާތްތަކާމެދު، ޤާނޫނުގެ އިމުގެ ތެރެއިން ކޮމިޝަނަށް އެޅެން ހުރި ފިޔަވަޅުތައް އަޅަމުންގެންދާނެ ކަމަށް އޭސީސީން ވަނީ ބުނެފައެވެ.
