ނިޒާމީ ނުކުތާ ނަގާ ބަޖެޓް ފާސްނުކޮށް ކުރިއަށްގެންދާކަން ޖާގަ ނުދެއްވާނެކަމަށް ރައްޔިތުންގެ މަޖިލީހުގެ ރައީސް މުހައްމަދު އަސްލަމް ވިދާޅުވެއްޖެއެވެ.
އަސްލަމް މިފަދައިން ވިދާޅުވީ އަންނަ އަހަރަށް ލަފާކުރާ ދައުލަތުގެ ބަޖެޓާއި، މިއަހަރުގެ ބާކީ އޮތް މުއްދަތުގައި ހަރަދުކުރަން ބޭނުންވާ ސަޕްލިމެންޓްރީ ބަޖެޓް، ފިނޭންސް މިނިސްޓަރު މަޖިލީހަށް ހުށަހަޅުއްވާފައިވަނީ ގާނޫނާއި ހިލާފަށްކަމަށް ވިދާޅުވެ އަންގާރަ ދުވަހުގެ ޖަލްސާގައި އިދިކޮޅު މެންބަރުން ނިޒާމީ ނުކުތާ ނަންގަވާ ޖަލްސާގެ ނިޒާމް ގެއްލުވާލަން މަސައްކަތްކުރައްވަމުން ގެންދަވާތީއެވެ.
ސަޕްލިމެންޓްރީ ބަޖެޓާއި 2024 ވަނަ އަހަރަށް ލަފާކުރާ ބަޖެޓް ހުށަހެޅުމުގައި، މާލިއްޔަތު ގާނޫނުގެ 32 ވަނަ މާއްދާއާއި ހިލާފުކަމަށް މެންބަރުން ފާހަގަކުރި މައްސަލައާއި ގުޅޭގޮތުން އަސްލަމް ވިދާޅުވީ، އެކަމާއި ގުޅޭގޮތުން މަޖިލީހުގެ ފަންނީ އިދާރީ މުވައްޒަފުންނާއި މަޝްވަރާ ކުރައްވާފައިވާ ކަމަށެވެ. އަދި އެ ބޭފުޅުންގެ ލަފަޔަކީ ގާނޫނުގައިވާ ގޮތުގެ މަތިން މަޖިލީހަށް ބޭނުންވާ އެންމެހާ ލިޔެކިޔުންތައް ފޮނުވާފައިވާ ކަމަށެވެ. އަދި އެ ލިޔެކިޔުންތައް ޕޯޓަލްގައިވާނެ ކަމަށް އަސްލަމް ވިދާޅުވިއެވެ.
އަސްލަމް ވިދާޅުވީ މި މައްސަލައިގައި އިތުރަށް ނިޒާމީ ނުކުތާ ނަގާ މަޖިލީހުގެ މަސައްކަތް ހުއްޓުވުމަށް ފުރުސަތު ނުދެއްވާނެކަމަށެވެ. އަދި އިތުރު އެއްވެސް މައްސަލައެއް މެންބަރެއްގެ އޮތްނަމަ، ލިޔުމުން އެކަން ހުށަހެޅުމަށް އަސްލަމް ވަނީ ވިދާޅުވެފައެވެ.
ލިޔުމުން ހުށަހަޅާއިރު، އެކަންކަން ތަފްސީލުކޮށް ފާހަގަކޮށްދެއްވުން އެދެން. އެކަންކަމާއި ގުޅޭގޮތުން އިތުރަށް ބަލަންޖެހޭކަމެއް އޮތްނަމަ އިދާރީ ފަރާތްތަކާއި މަޝްވަރާކުރުމަށްފަހުގައި ސާފުކުރާނެ ވާހަކަ ދަންނަވަން.ރައްޔިތުންގެ މަޖިލީހުގެ ރައީސް މުހައްމަދު އަސްލަމް
ދެވަނަކަމެއްގެ ގޮތުގައި އަސްލަމް ފާހަގަކުރައްވާފައިވަނީ، ފިނޭންސް މިނިސްޓަރު މަޖިލީހަށް 2024 ވަނަ އަހަރުގެ ބަޖެޓާއި 2023 ވަނަ އަހަރުގެ ސަޕްލިމެންޓްރީ ބަޖެޓު ހުށަހެޅުމުގައި ގާނޫނުގައި ބަޔާންކުރައްވާފައިވާ މުއްދަތުގައި އެކަން ހުށަހެޅިފައިނުވާ މައްސަލައެވެ.
އަސްލަމް ވިދާޅުވީ މި މައްސަލައިގައި ފިނޭންސް މިނިސްޓަރު ދެކެވަޑައިގަންނަވާ ގޮތުގައި ބަޖެޓް މަޖިލީހަށް ފޮނުވުމުން، މަޖިލީހަށް ބަޖެޓް ހުށަހެޅިގެންދާ ކަމަށެވެ. އެހެންނަމަވެސް ހާޒިރުވުމަށްޓަކައި ދެންނެވުނު ދުވަހު މަޖިލީހަށް ހާޒިރުވެވަޑައިގެންފައިނުވަނީ ބަންޑާރަނާއިބުގެ ލަފަޔަށްކަމަށް ވިދާޅުވެފައިވާ ކަމަށެވެ.
މި މައްސަލައާއި ގުޅިގެން މަޖިލީހުގެ އިމްތިޔާޒަށް އަރައިވަޑައިގެންފައިވާކަމަށް މެންބަރުން ދެކެވަޑައިގަންނަވާ ނަމަ ލިޔުމުން އެކަން ރިޔާސަތަށް ނުވަތަ އިމްތިޔާޒް ކޮމިޓީއަށް ހުށަހަޅަައި ދެއްވާ. އިމްތިޔާޒު ކޮމިޓީން އެ މައްސަލަ ބައްލަވާނެކަމަށް އަޅުގަނޑު ދެކެނީ. މި މައްސަލައާއި ގުޅިގެން އިތުރަށް ނިޒާމީ ނުކުތާ ނަންގަވާ ދައުލަތުގެ ބަޖެޓް ފާސްނުކޮށް ކުރިއަށްގެންދާކަން ޖާގަނުދޭނެ ވާހަކަ ވަރަށް ސާފުކޮށް ދަންނަވަން.ރައްޔިތުންގެ މަޖިލީހުގެ ރައީސް މުހައްމަދު އަސްލަމް
އަސްލަމް މިފަދައިން ވިދާޅުވެފައިވާއިރު، މަޖިލީހުގެ ރައީސްކަމުން ދާދިފަހުން އިސްތިއުފާ ދެއްވި ކުރީގެ ރައީސް މުހައްމަދު ނަޝީދު އިސްވެ ހުންނަވާ، އަންގާރަ ދުވަހުގެ ޖަލްސާގައި ނިޒާމީ ނުކުތާ ނަންގަވާ، އެމަނިކުފާނު ނިސްބަތްވާ ޕާޓީގެ މެންބަރުން މަޖިލީހުގައި އަޑުގަދަކުރައްވާފައިވެއެވެ.
އަދި ފިނޭންސް މިނިސްޓަރު ބަޖެޓް ހުށަހެޅުއްވި އިރު މިނިސްޓަރު ވަށާލައި އަޑުގަދަކުރަމުން ގެންދިޔައެވެ.
