މިއަދު ހިނގައިދިޔަ ކަންކަމާ ގުޅިގެން މަޖިލީހުން ބަޔާނެއް ނެރެފި
24 ޖުލައި 2017 | ހޯމަ 18:14ސަލާމަތީ ބާރުތަކުން މަޖިލީހުގެ ގޯތިތެރޭގައި ހަރަކާތްތެރިވީ ގާނޫނާ ހިލާފު ކަންތައްތަކެއް ބަޔަކު ކޮށްފާނެތީ
މަޖިލީހުގެ އިދާރާ ކާއިރީ ފުލުހުން ހަރަކާތްތެރިވަނީ
ގާނޫނު އަސާސީ އާއި މަޖިލީހުގެ ގަަވައިިދާ ހިލާފަށް މިއަދު ކަންތައްތަކެއް ކުރުމަށް ގޮވާލައި މަޖިލީހުގެ ގޯތި ތެރޭގައި ބަޔަކު މަސައްކަތްތައް ކުރަމުން ގެންދިޔަކަމަށް މަޖިލީހުގެ އިދާރާއިން ބުނެފި އެވެ.
މަޖިލީހުގެ ވެބްސައިޓްގައި ޝާއިޢުކޮށްފައިވާ ބަޔާނުގައި ހަތް ކަމެއް ފާހަގަކޮށްފައިވެ އެވެ.
ރައްޔިތުންގެ މަޖިލީހަށް ގިނަ އަދަދެއްގެ މެމްބަރުން މިއަދު ގަދަކަމުން ވަންއިރު، މަޖިލީހުގެ ބަޔާނުގައި ބުނެފައިވަނީ ޖުލައި 24 ވަނަ ދުވަހު ޖަލްސާއެއް އެޖެންޑާކޮށްފައި ނެތްކަމަށެވެ.
ޖުލައި 24 ވަނަ ދުވަހު ޖަލްސާއެއް އޮންނާނެކަން މެންބަރުންނަށް އަންގާފައި ނޯންނާނެ ކަމަށާއި މަޖިލީހުގެ ގަވައިދުގައިވާ ގޮތުގެމަތިން އެ މައްސަލަ ބާތިލުވެފައިވާކަމަށް ޖުލައި 20 ވަނަ ދުވަހު ނައިބު ރައީސް މެންބަރުންނަށް އަންގާފައިވާ ކަމަށް މަޖިލީހުގެ އިދާރާއިން ނެރުނު ބަޔާނުގައި ބުނެފަ އެވެ.
މީގެ އިތުރުން މަޖިލީހުގެ ޕްރޮގްރާމުތަކާއި ސެކިއުރިޓީ ކަންކަމުގެ މައްޗަށް ރިޔާއަތްކޮށް ދެން މަޖިލީހުގެ ޖަލްސާއެއް ބާއްވާނީ 31 ޖުލައިގައިކަން މަޖިލީހުގެ މެންބަރުންނަށް އަންގާފައިވާ ކަަމަށް މަޖިލީހުގެ އިދާރާއިން ހާމަކުރެ އެވެ.
މަޖިލީހުގެ ގެއާއި ގޯތި ތެރޭގައި ސަލާމަތީ ބާރުތަކުން ހަރަކާތްތެރިވެފައިވަނީ މަޖިލީހުގެ ސަލާމަތަށް ނުރައްކާވާނެ ކަމެއް ހިންގުމަށް ބަޔަކު މަސައްކަޔް ކުރުމުން ކަމަށް ވަނީ މި ބަޔާނުގައި ފާހަގަކޮށްފަ އެވެ.
މަޖިލީހުން މިފަދަ ބަޔާނެއް ނެރެ މަޖިލީހުގެ ވެބްސައިޓުގައި ޝާއިއުކޮށްފައިވާ އިރު، މި ބަޔާނުގައި އެއްވެސް މީހެއްގެ ސޮޔެއް ނުވަތަ ނަމެއް ހިމެނިފައެއް ނުވެ އެވެ.
މިކަމާ ގުޅޭ ގޮތުން ރާއްޖެއެމްވީއިން މަޖިލީހުގެ އަމީންއާންމު އަހްމަދު މުހައްމަދަށް ގުޅުމަށް ކުރި މަސައްކަތް ވަނީ ކާމިޔާބު ވާގޮތް ނުވެފަ އެވެ. އެހެން ނަމަވެސް މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވިގޮތުގައި، މިކަމާ ގުޅިގެން އަމީންއާންމަށް ގުޅުމުން އެއީ އަމީންއާންމު ނެރުނު ބަޔާނެއް ނޫން ކަަމަށް ވިދާޅުވެފައިވާ ކަމަށެވެ.
