އެމްޑީޕީގެ ޕީޖީ ގްރޫޕްގެ ލީޑަރުކަމުން އަސްލަމް އިސްތިއުފާދެއްވައިފި
އަސްލަމް ޕީޖީ ލީޑަރުކަމަށް ވަޑައިގެންނެވީ 2022 ވަނަ އަހަރު
ރައްޔިތުންގެ މަޖިލީހުގެ ރައީސް މުހައްމަދު އަސްލަމް
އެމްޑީޕީގެ ޕީޖީ ގްރޫޕްގެ ލީޑަރުކަމުން ރައްޔިތުންގެ މަޖިލީހުގެ ރައީސް އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް އިސްތިއުފާދެއްވައިފިއެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި އަސްލަމް ވިދާޅުވީ އެ މަޤާމުން އިސްތިއުފާދެއްވާފައި ވަނީ ހޯމަ ދުވަހުގެ ރޭގެ ވަގުތެއްގައި ކަމަށެވެ.
އެމްޑީޕީގެ ޕީޖީ ގުރޫޕްގެ ލީޑަރަކަށް ހިތަދޫ އުތުރު ދާއިރާގެ މެންބަރު މުހައްމަދު އަސްލަމް އިންތިހާބުވެވަޑައިގަންނަވާފައި ވަނީ 2022 ވަނަ އަހަރުގެ ފެބްރުއަރީ މަހުގެ ތެރޭގައެވެ.
އޭރު ރައްޔިތުންގެ މަޖިލީހުގައި އެމްޑީޕީގެ ސުޕަ މެޖޯރިޓީ އޮތެވެ. އަސްލަމް އެ މަޤާމަށް އިންތިޚާބުވެވަޑައިގެންނެވީ އޭރު އެމްޑީޕީގައި ހުންނެވި މެދު ހެންވޭރު ދާއިރާގެ މެންބަރު އަލީ އާޒިމާއި ވާދަކުރައްވައެވެ. އޭރު އެމްޑީޕީގެ ޖުމްލަ 65 މެންބަރުން ތިއްބެވިއެވެ. އަސްލަމް ޕީޖީ ލީޑަރުކަމަށް ހޮވިވަޑައިގަތީ 40 މެންބަރުންގެ ސޮޔާއެކުގައެވެ.
އަސްލަމް އެމްޑީޕީގެ ޕީޖީ ލީޑަރުކަމުން އިސްތިއުފާދެއްވާފައި ވާއިރު އޭނާ މަޖިލީހުގެ ރައީސްގެ މަޤާމަށް ރޭ ވަނީ އިންތިޚާބުވެވަޑައިގަންނަވާފައެވެ.
