ނަވާރަ ވަނަ ރައްޔިތުންގެ މަޖިލީހުގެ ބާކީ އޮތް މުއްދަތަކީ އުފެއްދުންތެރި ދުވަސްތަކަކަށް ހެއްދެވުމަށް މަސައްކަތް ކުރައްވާނެ ކަމަށް ރައްޔިތުންގެ މަޖިލީހުގެ ރައީސް ކަމަށް އަލަަށް އިންތިޚާބުވެވަޑައިގެންނެވި ހިތަދޫ އުތުރު ދާއިރާގެ މެމްބަރު މުޙައްމަދު އަސްލަމް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ މަޖިލީހުގެ ރައީސް ކަމަށް ހޯމަ ދުވަހުގެ ރޭ އިންތިޚާބުވެވަޑައިގެންނެވުމަށްފަހު ރިޔާސަތާ ހަވާލުވެވަޑައިގެން ދެއްކެވި ވާހަކަފުޅުގައެވެ. އެގޮތުން މަޖިލީހުގައި ގިނަ ދުވަސްތަކެއް މަސައްކަތް ކުރެއްވުމަށްފަހު ރިޔާސަތަށް އިންތިޚާބު ކޮށްދެއްވުމުން މަޖިލީހުގެ މެމްބަރުންނަށް އެމަނިކުފާނު ޝުކުރު އަދާ ކުރެއްވިއެވެ.

އަސްލަމް ވިދާޅުވީ ރިޔާސަތުގައި އިންނަވައި އެ މަގާމުގެ މަސްއޫލިއްޔަތު އަދާ ކުރެއްވުމަށް މަޖިލީހުގެ ހުރިހާ މެމްބަރުންނާއި ސިޔާސީ ޕާޓީތަކުގެ އެއްބާރުލުން ބޭނުންފުޅުވާނެ ކަމަށެވެ. އަދި މަގާމުގެ ޒިންމާތައް އަދާ ކުރެއްވުމުގައި މެމްބަރުންނާއި ދިވެހި ރައްޔިތުންގެ މަސްލަހަތާއި ޙައްގުތައް ހިމާޔަތް ކުރުމުގައި ދެމިހުންނަވާނެ ކަމުގެ ޔަގީންކަން ވެސް އެމަނިކުފާނު ދެއްވިއެވެ.

ރައްޔިތުންގެ މަޖިލީހުގެ ރައީސަކަމަށް އަސްލަމް އިންތިޚާބު ކުރައްވާފައިވަނީ އެ މަގާމުގައި ހުންނެވި މައްޗަންގޯޅި މެދު ދާއިރާގެ މެމްބަރު، މުޙައްމަދު ނަޝީދު ހޯމަ ދުވަހު އެ މަގާމުން އިސްތިއުފާ ދެއްވުމާ ގުޅިގެންނެވެ. އެމަނިކުފާނު މަގާމުން އިސްތިއުފާ ދެއްވީ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ އެމްޑީޕީ ޕީޖީ ގްރޫޕުން މަޖިލީހަށް ވައްދާފައި ވަނިކޮށެވެ.

ހޯމަ ދުވަހުގެ ރޭ މަޖިލީހުގެ ރައީސް އިންތިޚާބު ކުރުމަށް ބޭއްވި ޖަލްސާގައި އެ މަގާމަށް ކުރިމަތިލެއްވީ އަސްލަމްގެ އިތުރުން މެދުހެންވޭރު ދާއިރާގެ މެމްބަރު އަލީ އާޒިމްއެވެ. އެ ޖަލްސާގައި 76 މެމްބަރުން ވޯޓު ދީފައިވާއިރު އަސްލަމް އިންތިޚާބުވެވަޑައިގެންނެވީ 53 މެމްބަރުންގެ ވޯޓުންނެވެ. އާޒިމަށް ލިބިވަޑައިގެންނެވީ 23 ވޯޓެވެ.

ރައްޔިތުންގެ މަޖިލީހުގެ ރައީސްކަމަށް އަލަށް އިންތިޚާބުވެވަޑައިގެންނެވި މުޙައްމަދު އަސްލަމް ވަނީ 2005 ވަނަ އަހަރުން ފެށިގެން 4 މަޖިލީހެއްގައި މެދުކެނޑުމެއްނެތި ޚިދުމަތް ކުރައްވާފައެވެ. އެއީ 16، 17، 18 އަދި މިހާރު ހިނގަމުންދާ 19 ވަނަ މަޖިލީހުގެއެވެ.