މަޖިލީހާމެދު ކަން ކުރަމުންދާ ގޮތުން އައިޕީޔޫއިން ކަންބޮޑުވުން ފާޅުކޮށްފި
އައިޕީޔޫއިން ވަނީ މަޖިލީހުގެ ނަޒާހަތްތެރިކަން ދެމެހެއްޓުމަށް ގޮވާލާފައި
އެމްޑީޕީގެ ޕީޖީ ލީޑަރ އިބޫ ގަދަކަމުން ގެންދަނީ
ރައްޔިތުންގެ މަޖިލީހާމެދު ކަންކުރަމުންދާ ގޮތުން ކަންބޮޑުވުން ފާޅު ކުރާ ކަމަށާއި މަޖިލީހުގެ ނަޒާހާތްތެރިކަން ދެމެހެއްޓުމަށް އިންޓަ ޕާލިމަންޓް ޔޫނިއަން (އައިޕީޔޫ) އިން ގޮވާލައިފިއެވެ.
ދުނިޔޭގެ ގައުމުތަކުގެ ގާނޫނު ހަދާ މަޖިލީހުގެ މެމްބަރުން ތަމްސީލު ކުރާ ޖަމިއްޔާ އިން މިހެން ގޮވާލާފައިވަނީ ރައްޔިތުންގެ މަޖިލީހަށް އެމަޖިލީހުގެ މެންބަރުން ވަދެވަޑައިގަތުމަށް ހުރަސްއަޅާ އެމަޖިލީހުގެ ގޭޓުތަކުގައި ތަޅު އަޅުވައިގެން އެމަޖިލިސް ހިސޯރުކޮށްފައި ވަނިކޮށެވެ.
އައިޕީޔޫއިން ކޮށްފައިވާ ޓްވީޓެއްގައި ބުނެފައިަނީ "ރާއްޖޭގެ ސިޔާސީ މަސްރަހާ މެދު ކަންބޮޑުވާ ކަމަށާއި ރައްޔިތުންގެ މަޖިލީހުގެ ނަޒާހަތްތެރިކަމަށް އިހުތިރާމް ކުރަން ގޮވާލާ ކަމަށެވެ.
އައިޕީޔޫ އިން މިހެން ބުނެފައި މިވަނީ މަޖިލީހުގެ ތެރެ އަށް ސިފައިން ވަދެ، އެ ތަނުގައި ތިބި މެމްބަރުން ގަދަކަމުން ނެރުމާ ގުޅިގެންނެވެ.
މަޖިލީހުގެ ޖަލްސާއެއް މިއަދު ބާއްވާނެ ކަމަށް އިދިކޮޅު މެމްބަރުން ވިދާޅުވެފައި ވަނިކޮށް، މަޖިލީހުގެ އިދާރާގެ ހުރިހާ ގޭޓެއް ސިފައިން މިއަދު ހެނދުނު ތަޅުލި އެވެ. އަދި މ. ކުނޫޒުގައި އިދިކޮޅު މެންބަރުން ބައްދަލުކުރެއްވުމަށް ފަހު ހިންގަވާފައި މަޖިލީހަށް ވަޑައިގަންނަވަން އުޅުއްވުމުން އެކަމަށް ފުލުހުންވަނީ ހުރަސްއަޅައި އެމެންބަރުން ހިސޯރު ކޮށްފައެވެ. އެއަށްފަހު ދޫކޮށްލުމުން މެންބަރުން ވަނީ މަޖިލީހުގެ ތެރެއަށް ވަންނަވާފައެވެ. އަދި ޖަލްސާއެއް ބޭއްވުމުގެ މަސައްކަތް ކުރިއަށް ގެންދަނިކޮށް ސިފައިންނާއި ފުލުހުން މަޖިލީހުގެ ތެރެ އަށް ވަދެ ބާރުގެ ބޭނުންކޮށްގެން މެންބަރުން ވަނީ ނެރެފައެވެ. މެމްބަރުން ނެރުމުގެ ތެރޭގައި ބައެއް މެމްބަރުންނަށް އަނިޔާވެ ޕެޕަ ސްޕްރޭގެ އަސަރު ކޮށްގެން ބައެއް މެމްބަރުންނަށް އޭޑީކޭގައި ފަރުވާ ވެސް ދިނެވެ.
ފުލުހުން ބުނެފައިވަނީ މަޖިލިސް ތެރެއަށް ފުލުހުން ވަދެފައިވަނީ މެންބަރުކަން ގެއްލިފައިވާ ބަޔަކު އެތާއެތެރެއަށް ވަނުމުން ކަމަށެވެ. ނަމަވެސް މިހާތަނަށް ސުޕްރީމް ކޯޓުން އެއްވެސް މެންބަރެއްގެ ގޮނޑި ގެއްލިފައިވާކަމަށް ކަނޑައަޅާފައި ނުވުމުގެ އިތުރުން ގޮނޑި ގެއްލިފައިވާކަމަށް އިލެކްޝަންސް ކޮމިޝަނުންވެސް ބުނެފައިނުވާ މެންބަރުންވެސް ވަނީ ގަދަކަމުން ނެރެފައެވެ.
