ސައުދީ ޕްރޯ ލީގުގެ އަލް އިއްތިހާދުގެ ޑައިރެކްޓަރުގެ މަގާމަށް، އިޓަލީގެ ފުޓުބޯޅަ ލެޖެންޑް ޕައޮލޯ މަލްޑިނީ ހަމަޖައްސަން ނިންމައިފިއެވެ.

ބައިނަލްއަގުވާމީ މީޑިއާތަކުގައި ބުނެފައިވާގޮތުގައި އަލް އިއްތިހާދުން، އުމުރުން 55 އަހަރުގެ މަލްޑިނީއާއެކު ކުރަމުން އައި މަޝްވަރާތަކަށްފަހު އެއްބަސްވުމަކަށް އާދެވިފައިވާކަމަށެވެ. އެ ކުލަބުން މިހާރު މަސައްކަތްކުރަމުން އަންނަނީ މަލްޑިނީއާއެކު އެއްބަސްވުމެއްގައި ސޮއިކުރުމަށް ކަމަށާއި، ދާދި އަވަހަށް ރަސްމީކޮށް މަލްޑިނީ އެ ކުލަބުގެ ޑައިރެކްޓަރުގެ މަގާމާ ހަވާލުވާނެކަމަށް މީޑިއާތަކުން ބުނެއެވެ. އަލް އިއްތިހާދުން ވަނީ ދާދި ފަހުން އެ ޓީމުގެ ކޯޗުކަމުގައި ހުރި ޕޯޗުގަލްގެ ނޫނޯ އެސްޕިރިޓޯ ސަންޓޯ މަގާމުން ވަކިކޮށްފައެވެ. އެއީ ކުލަބުގެ ނަތީޖާތައް ދަށްވުމުގެ ސަބަބުންނެވެ.

އިޓަލީގެ ގައުމީ ޓީމަށްވެސް ކުޅެފައިވާ މަލްޑިނީ އެންމެ ފަހުން ހުރީ އޭސީ މިލާންގެ ޓެކްނިކަލް ޑައިރެކްޓަރުގެ މަގާމުގައެވެ. އެ މަގާމާ މަލްޑިނީ ހަވާލުވީ 2018 ވަނަ އަހަރުއެވެ. އޭގެ ފަހުން އެ މަގާމު އޭނާ ދޫކޮށްލީ މިއަހަރުގެ ޖޫން މަހުގެ ތެރޭގައެވެ. އޭސީ މިލާންގެ ޓެކްނިކަލް ޑައިރެކްޓަރުގެ މަގާމު މަލްޑިނީ ދޫކޮށްލީ، ކުލަބުގެ އިސްވެރިންނާ ޖެހުނު މައްސަލައެއްގައި ކަމަށް މީޑިއާތަކުން ވަނީ ބުނެފައެވެ.

ހުނަރުވެރި ޑިފެންޑަރެއްގެ ގޮތުގައި މަޝްހޫރުވެގެން ދިޔަ މަލްޑިނީ، އޭނާގެ ކެރިއަރުގައި ކުޅުނު ހަމައެކަނި ކުލަބަކީވެސް އޭސީ މިލާނެވެ. އޭސީ މިލާންގައި ހޭދަކުރި 25 ސީޒަންގައި މަލްޑިނީ ވަނީ އެ ކުލަބަށް 902 މެޗު ކުޅެދީ، 33 ލަނޑު ޖަހާފައެވެ. އެ ކުލަބާއެކު އޭނާ ވަނީ 23 ތައްޓެއް ކާމިޔާބު ކޮށްފައެވެ. ރަސްމީކޮށް މަލްޑިނީ ފުޓުބޯޅަ ކުޅުން ހުއްޓާލީ 2009 ވަނަ އަހަރު އެވެ. އޭގެ ފަހުން، އޭސީ މިލާންގެ ޓެކްނިކަލް ޑައިރެކްޓަރުގެ މަގާމާ ހަވާލުވުމުގެ ކުރިން މަލްޑިނީ ވަނީ ޔޫރަޕުގެ ފުޓުބޯޅައިގެ މައި އިދާރާ (ޔުއެފާ)ގެ އެމްބެސެޑަރެއްގެ ގޮތުގައި މަސައްކަތް ކޮށްފައެވެ.