އަސީރުން މިނިވަންކުރުމުގެ ބަދަލެއްގެ ގޮތުން ފަސް ދުވަހަށް ހަމަލާ ދިނުން ހުއްޓާލުމަށް ނަތަންޔާހޫ އެއްބަހެއް ނުވި

ހަމާސްގެ ބެލުމުގެ ދަށުގައި ތިބި އަސީރުން ދޫކޮށްލުމުގެ ބަދަލެއްގެ ގޮތުން އިސްރާއީލުން ޣައްޒާއަށް މެދުކެނޑުމެއްނެތި ދެމުންދާ ހަމަލާތައް ފަސް ދުވަހުގެ މުއްދަތަށް މެދުކަނޑާލުމަށް އިސްރާއީލުގެ ބޮޑުވަޒީރު ބެންޔަމިން ނަތަންޔާހޫ ބޭނުންނުވިކަމަށް ރިޕޯޓްތައް ބުނެފިއެވެ.

ދަ ގަރޑިއަން އިން ރިޕޯޓްކޮށްފައިވާ ގޮތުގައި ހަމާސް އާއި އިސްރާއީލާ ދެމެދު ކުރިޔަށްދާ ވާހަކަތަކުގެ މައުލޫމާތު އެނގޭ ފަރާތަކުން ބުނެފައިވަނީ އަސީރުން އެކި މަރުހަލާތަކުގައި މިނިވަންކުރުމާއި ހަމަލާތައް ހުއްޓާލުމާއި މެދުކަނޑާލުމާއި ގުޅޭ ނިންމުންތަކުގައި ނަތަންޔާހޫ އަންނަނީ އަދިވެސް ދޫނުދީ ހިފަހައްޓަމުންނެވެ.

ބައެއް ރިޕޯޓްތައް ބުނާގޮތުގައި ޣައްޒާއަށް އެއްގަމު މަގުން އިސްރާއީލުން އެރުމުގެ ކުރިން ކުރިޔަށްދިޔަ މަޝްވަރާތަކުގައި ހަމާސްއިން ހުށަހަޅާފައިވަނީ އެކި ގައުމުތަކުގެ ގިނަ އަދަދެއްގެ ރައްޔިތުން މިނިވަންކުރުމަށެވެ. އަސީރުން މިނިވަންކުރުމާއި ގުޅޭ މަޝްވަރާތަކާއި ގުޅޭގޮތުން އިސްރާއީލުގެ ބޮޑުވަޒީރު އޮފީހުން އަދި ވަކި އެއްޗެއް ނުބުނެއެވެ.

އޮކްޓޯބަރ މަހުގެ 7 ވަނަ ދުވަހު ހަމާސް އިން ކުއްލިގޮތަކަށް އިސްރާއީލަށް ދިން ވަރުގަދަ ހަމަލާތަކުގައި 240 މީހުން އަސީރުންގެ ގޮތުގައި ގެންގޮސްފައިވާކަމަށް ބެލެވެއެވެ. އަސީރުން ދޫކޮށްލުމަށް އެމީހުންގެ އާއިލާތަކުން އަންނަނީ ނަތަންޔާހޫއަށް ވަރަށް ބޮޑަށް ޕްރެޝަރ ކުރަމުންނެވެ. އެގޮތުން ނަތަންޔާހޫގެ ގެ ކައިރީގައިވެސް އާއިލާތަކުން މުޒާހަރާކޮށްފައިވެއެވެ.

ވާހަކަތަކާއި ގުޅޭ މައުލޫމާތު އެނގޭ މީހަކާއި ހަވާލާދީ ދަ ގަރޑިއަން އިން އިތުރަށް ރިޕޯޓްކޮށްފައިވަނީ އެންމެ ފުރަތަމަ މަޝްވަރާތައް ކުރިޔަށްދިޔައީ ކުޑަކުދިންނާއި، އަންހެނުންނާއި އުމުރުން ދުވަސްވީ މީހުންނާއި އެކި ބަލިތަކުގެ މީހުން ފަސް ދުވަހަށް ހަމަލާތައް ހުއްޓާލާގޮތަށް މިނިވަންކުރުމަށެވެ. ނަމަވެސް އިސްރާއީލު ސަރުކާރުން އެކަމާއި ދެކޮޅު ހަދާ ޣައްޒާއަށް އެއްގަމު މަގުން އެރުމުގެ އޮޕަރޭޝަން ފެށީއެވެ. އެއާއެކު ހަމާސް އިން ބުނެފައިވަނީ ހަމަލާތައް ވަރުގަދަވުމާއެކު އަސީރުން މިނިވަންކުރުމަށް ވަރަށް ބޮޑަށް ދަތިވެފައިވާކަމަށެވެ.

ބުރާސްފަތި ދުވަހު އެމެރިކާގެ ނޭޝަނަލް ސެކިޔުރިޓީ ކައުންސިލުގެ ސްޕޯކްސްޕާސަން ޖޯން ކަރބީ ބުނެފައިވަނީ ކޮންމެ ދުވަހަކު ހަތަރު ގަޑިއިރު ހަމަލާތައް ދިނުން ހުއްޓާލުމަށް އިސްރާއީލުން އެއްބަސްވެފައިވާކަމަށެވެ.

އެކަން ވައިޓް ހައުސްއިން ހާމަކުރުމާއެކު އިސްރާއީލު އަސްކަރިއްޔާގެ ސްޕޯކްސްޕާސަން ބުނެފައިވަނީ ހަމަލާތައް ދިނުން ހުއްޓާނުލާނެކަމަށެވެ. ކުރާކަމަކީ އިންސާނީ އެހީތެރިކަން ފޯރުކޮށްދިނުމަށް ހަތަރު ގަޑިއިރަށް ހަމަލާތައް ދިނުން މެދުކަނޑާލުންކަމަށެވެ.

އަނެއްކޮޅުން ހަމާސް އިން ވަނީ އަސީރުންގެ ގޮތުގައި ތިބި މީހުންގެ ތެރެއިން އުމުރުން 75 އަހަރުގެ އަންހެނަކާއި 13 އަހަރުގެ ފިރިހެން ކުޑަކުއްޖެއްގެ ވީޑިއޯއެއް އާންމުކޮށް ހާލަތު ރަނގަޅުވެއްޖެނަމަ އެ ދެ މީހުން ދޫކޮށްލާނެކަމަށް ބުނެފައެވެ. އެކަމަށް ރައްދުދެމުން އިސްރާއީލު އަސްކަރިއްޔާގެ ސްޕޯކްސްޕާސަން ބުނެފައިވަނީ މިއީ ހަމާސް އިން ސައިކޮލޮޖީގޮތުން ހިންގާ ޓެރަރިޒަމްގެ އަމަލެއްކަމަށެވެ.

ހަމާސް އާއި އިސްރާއީލާ ދެމެދު ވާހަކަތައް ކުރިޔަށްދަނީ ގަތަރު މެދުވެރިއެއްގެ ރޯލު އަދާކޮށްގެންނެވެ. ވާހަކަތަކާއި ގުޅޭ މައުލޫމާތު އެނގޭ އެހެން ފަރާތަކާއި ހަވާލާދީ ދަ ގަރޑިއަން ގައި ބުނެފައިވަނީ މައިގަނޑު ގޮތެއްގައި މަޝްވަރާތައް ކުރިޔަށްދަނީ ހަމާސްގެ ބެލުމުގެ ދަށުގައި ތިބި އަސީރުންގެ މައުލޫމާތު އެނގޭ ލިސްޓެއް ހަމާސްއިން އިސްރާއީލާ ދިނުމާއި ގުޅޭގޮތުންނެވެ. އެ ލިސްޓު ނުލިބޭނަމަ ހަމަލާތައް ދިނުން ހުއްޓާލާކަށް އިސްރާއީލު ބޭނުމެއްނުވެއެވެ. ނަމަވެސް ހަމާސްއިން ބުނަމުން އަންނަނީ މެދުކެނޑުމެއްނެތި ހަމަލާތައް ދެމުން އަންނަނަމަ ހަމާސްގެ ބެލުމުގެ ދަށުގައި ތިބީ ކޮން ބައެއްކަން ދެނެގަންނަން އުނދަގޫވާނެކަމަށެވެ. އެމީހުން ތިބީ ޣައްޒާގެ އެކި ހިސާބުތަކުގައިކަމަށްވެސް ހަމާސް އިން އަންނަނީ ބުނަމުންނެވެ.

މީގެއިތުރުން ހަމާސްއިން އެންމެ ފުރަތަމަ ޑިމާންޑްކުރީ އަސީރުންގެ ބަދަލެއްގެ ގޮތުގައި އިސްރާއީލު ޖަލުތަކުގައި ތިބި ފަލަސްތީނު ހުރިހާ ރައްޔިތުން މިނިވަންކުރުމަށާއި ތެލާއި އެނޫންވެސް ޒަރޫރީ ތަކެތި ޣައްޒާއަށް އެތެރެކުރުމަށެވެ. ނަމަވެސް މި ޑިމާންޑަށްވެސް އިސްރާއީލުން ދެކޮޅު ހެދީއެވެ.

ކޮންމެ ފަހަރަކުވެސް އިސްރާއީލުން ހުށަހަޅާ ކަންކަން މާބޮޑުވަނީކަމަށް ދަ ގަރޑިއަންގައި ބުނެފައިވެއެވެ.

އަސީރުންގެ މައްސަލައިގައި ކުރިޔަށްދާ މަޝްވަރާތަކާއި ގުޅިގެން އިސްރާއީލުގެ އެތެރޭގައިވެސް ވަނީ ދެބަސްވުންތައް އުފެދިފައެވެ. އެގޮތުން ކުރިޔަށް އޮތްތަނުގައި އިސްރާއީލު ދެމި އޮންނާނެގޮތާއި ގުޅޭގޮތުން ޚިޔާލު ތަފާތުވުންތައް ވަނީ އުފެދިފައެވެ. އެގޮތުން އިސްރާއީލު އަސްކަރިއްޔާ އާއި ސަރުކާރުގެ ކަނާތުފިޔައިގެ މީހުންނާއި ނަތަންޔާހޫ އާއި މަޝްވަރާތައް ކުރިޔަށް ގެންދާ އިސްރާއީލުގެ އިންޓެލިޖެންސް އިދާރާ މޮސާޑާ ދެމެދު ވަނީ ދެބަސްވުންތައް އުފެދިފައެވެ.

އެގޮތުން ކޮންމެ ފަހަރަކު ހުށަހެޅުމެއް ލިބޭއިރަށް އެ ހުށަހެޅުމެއް ނަތަންޔާހޫ އާ ހަމައަށް ދާއިރު ހުށަހެޅުން އެނބުރި އަންނަނީ އިތުރު ޑިމާންޑަތަކަކާއެކުކަމަށް އެފަރާތުން ބުނެފައިވެއެވެ.

ނަތަންޔާހޫ ވަނީ ތަކުރާރުކޮށް ހަމަލާތައް ދިނުން ހުއްޓާލުމަށް ދެކޮޅު ހަދާފައެވެ. އަދި ހަމަލާތައް އަންނަނީ އިތުރަށް ވަރުގަދަ ކުރަމުންނެވެ.

އިސްރާއީލުގެ މީޑިޔާއިން ރިޕޯޓްކޮށްފައިވާ ގޮތުގައި މޮސާޑުގެ މިހާރުގެ ޑައިރެކްޓަރ ޑޭވިޑް ބަރްނާ އާއި ކުރީގެ ޑިރެކްޓަރ ޔޮސީ ކޯހެން ވަނީ ދާދިފަހުން އަސީރުން މިނިވަންކުރުމާއި ގުޅޭ މަޝްވަރާތަކަށް ދޯހާއަށް ގޮސްފައެވެ. މިވާހަކަތައް މިހާރު ހުރި މިސްރާބަށް ބަލާއިރު މަޝްވަރާތައް ކުރެވެމުންދާނީ މަދު އަދަދެއްގެ އަސީރުން މިނިވަންކުރުމުގެ ބަދަލެއްގެ ގޮތުގައި ވަގުތީ ގޮތުން ހަމަލާތައް ދިނުން ހުއްޓާލުމާކަމަށް ވަނީ ބެލެވިފައެވެ.

އަނެއްކޮޅުން ސީއައިއޭގެ ޗީފް ވިލިއަމް ބަރންސްވެސް ވަނީ މިހަފްތާތެރޭގައި މިސްރަށާއި އިސްރާއީލަށް ގޮސްފައެވެ. މިވާހަކަތާއި ގުޅޭގޮތުން ރޮއިޓަރސް އިން ބުނެފައިވަނީ މަޝްވަރާތައް ކުރެވިފައިވަނީ މަދު އަދަދެއްގެ އަސީރުން ދޫކުރުމުގެ ބަދަލެއްގެ ގޮތުން ޣައްޒާއަށް ކުޑަމިންވަރަކަށް ތެޔޮ އެތެރެކުރުމަށް ހަމަލާތައް ވަގުތީ ގޮތުން މެދުކަނޑާލުމަށެވެ.