ޔުއެފާ ޗެެމްޕިއަންސް ލީގު ގްރޫޕް ސްޓޭޖުގައި ކުޅުނު ހަތަރު ވަނަ މެޗުން ވެސް މޮޅުވެ، ރެއާލް މެޑްރިޑު މުބާރާތުގެ ދެ ވަނަ ބުރުން ޖާގަ ޔަގީން ކޮށްފި އެވެ.

ބުދަ ދުވަހުގެ ރޭ ރެއާލްގެ އަމިއްލަ ދަނޑުގައި ސްޕޯޓިން ކުލަބު ބްރާގާއާ ދެކޮޅަށް ކުޅުނު މެޗު ކާމިޔާބު ކުރީ 3-0 އިންނެވެ. މެޗު ފަށައިގެން ހަ ވަނަ މިނެޓުގައި ބްރާގާ އަށް ވަނީ ލީޑު ނަގާނެ ފުރުސަތު ލިބިފަ އެވެ. އެ ޓީމަށް ލިބުނު ޕެނަލްޓީ އަލްވާރޯ ޖާލޯ ފޮނުވާލި ނަމަވެސް، ރެއާލްގެ ގޯލް ކީޕަރު ވަނީ ޕެނަލްޓީ މަތަަކޮށްފަ އެވެ. އޭގެ ފަހުން މެޗުގެ 27 ވަނަ މިނެޓުގައި ރެއާލަށް ލީޑު ނަގައިދިނީ ބްރަހިމް ޑިއާޒް އެވެ. އޭނާ އެ ލަނޑު ޖެހީ ރޮޑްރީގޯ ތަނަވަސްކޮށްދިން ފުރުސަތެއްގަ އެވެ. ރެއާލްގެ ފަހު ދެ ލަނޑު ވެސް އެ ޓީމުން ޖެހީ ދެ ވަނަ ހާފުގަ އެވެ.

ދެ ވަނަ ހާފު ފަށައިގެން ކުރީ ކޮޅު ރެއާލަށް ލީޑު ފުޅާ ކޮށްދިނީ ބްރެޒިލްގެ ވިނީޝިއުސް ޖޫނިއާ އެވެ. މެޗުގެ 58 ވަނަ މިނެޓުގައި ވިނީޝިއުސް ލަނޑު ޖަހަން ފުރުސަތު ތަނަވަސްކޮށްދިނީ ލޫކަސް ވަޒްކުއޭޒް އެވެ. އޭގެ ތިން މިނެޓު ފަހުން ރެއާލްގެ ތިން ވަނަ ލަނޑު، ވިނީޝިއުސް ތަނަވަސްކޮށްދިން ފުރުސަތެއްގައި ޖެހީ ރޮޑްރީގޯ އެވެ.

މޮޅާއެކު ރެއާލުން ދެ ވަނަ ބުރުގެ ޖާގަ ކަށަވަރު ކުރީ މިހާތަނަށް ކުޅުނު ހަތަރު މެޗުން ވެސް މޮޅުވެ، އެއް ވަނައިގައި 12 ޕޮއިންޓު ހޯދައިގެންނެވެ. ގްރޫޕް ސްޓޭޖުގައި އެ ޓީމަށް ބާކީ ދެން އޮންނާނީ އަމިއްލަ ދަނޑުގައި ނަޕޯލީއާ ދެކޮޅަށް ކުޅޭ މެޗާއި، ރަށުން ބޭރުގައި ޔޫނިއަން ބާލިންއާ ދެކޮޅަށް ކުޅޭ މެޗެވެ. މި ގްރޫޕްގެ ދެ ވަނައިގައި އޮތީ ހަތް ޕޮއިންޓާއެކު ނަޕޯލީ އެވެ. ތިން ވަނައިގައި ބްރާގާ އޮތް އިރު، ފުލުގަައި އޮތީ ބާލިން އެވެ.