ތެޔޮ ނުލިބުމުގެ ސަބަބުން ޣައްޒާގައި ހުންނަ އަލް-ގުދުސް ހޮސްޕިޓަލުގެ ގިނަ ޚިދުމަތްތަކެއް މެދުކަނޑާލައިފި

ޣައްޒާގައި ހުންނަ އަލް-ޤުދުސް ހޮސްޕިޓަލުގައި ތެޔޮ ނެތުމުގެ ސަބަބުން ހޮސްޕިޓަލުން ދޭ މުހިންމު ޚިދުމަތްތައް މެދުކަނޑާލައިފިއެވެ.

މިހަފްތާގެ އާދިއްތަ ދުވަހުން ފެށިގެން އިސްރާއީލުން އަންނަނީ ކޮންމެ ދުވަހަކު އެ ހޮސްޕިޓަލަށް އަމާޒުކޮށް ހަމަލާތައް ދެމުންނެވެ. ފަލަސްތީން ރެޑް ކްރެސެންޓް ސޮސައިޓީން ހިންގަމުން އަންނަ މި ހޮސްޕިޓަލުން ބުނާ ގޮތުގައި ތެޔޮ ނެތުމުގެ ސަބަބުން މުހިންމު އޮޕަރޭޝަންތައް ކުރުން ހުއްޓާލަން މަޖުބޫރުވެފައިވާކަމަށާއި ކުރިޔަށް އޮތް ދުވަސްތަކުގައި ކޮންމެހެން ދޭން ޖެހޭ ޚިދުމަތް ދިނުމަށް ތެޔޮ ބޭނުންކުރުން ވަކި މިންވަރެއްގައި ބެހެއްޓުމަށް އެނިންމުން ނިންމަންޖެހިފައިވާކަމަށެވެ.

މިހާރުވެސް ހޮސްޕިޓަލުގައި ބޭނުންކުރާ މައި ޖެނެރޭޓަރ ވަނީ ނިއްވާލާފައެވެ. ކޮންމެހެން ދޭންޖެހޭ އަސާސީ ޚިދުމަތްތައް ދިނުމަށްޓަކައި ކުޑަ ޖަނެރޭޓަރުގެ ބޭނުންކުރާއިރު ކަރަންޓު ދެނީ ދެ ގަޑިއިރަށެވެ. އެއީ ހޮސްޕިޓަލުގައި އެޑްމިޓްކޮށްފައި ތިބި ބަލި މީހުންނަށާއި ހޮސްޕިޓަލުން ބޯހިޔާވަހިކަން ހޯދަމުން އަންނަ 14،000 އެއްހާ މީހުންނަށެވެ. ހޮސްޕިޓަލުގެ ސަރޖިކަލް ވޯރޑް ބަންދުކޮށްފައިވާއިރު އޮކްސިޖަން އުފައްދާ ޕްލާންޓްވެސް ވަނީ ބަންދުކޮށްފައެވެ.

ޕަލަސްތީން ރެޑް ކްރެސެންޓް ސޮސައިޓީންގެ ސްޕޯކްސްވުމެން ނަބާލް އަލްޖަޒީރާއާ ވާހަކަދައްކަމުން ބުނީ ހޮސްޕިޓަލުގެ ވަަށައިގެންވާ އިމާރާތްތަކަށް އިސްރާއީލުން ހަމަލާދީ އިމާރާތްތައް އެއްކޮށް ހަލާކުކޮށްލާފައިވާކަމަށެވެ. އަދި ހަމަލާތައް ހޮސްޕިޓަލާއި ދުވަހަކަށްވުރެ ދުވަހެއް ކައިރިވަމުން އަންނަކަމަށާއި ހޮސްޕިޓަލަށް އަމާޒުކޮށް ހަމަލާ ދީފާނެތީ އެކަމާ ބިރު ގަންނަކަމަށެވެ.

ހޮސްޕިޓަލާއި ގުޅިފައިވާ ހުރިހާ މަގުތަކެއްހެން ބަންދުކޮށްފައިވާއިރު އިމާރާތްތަކުގެ ދަށުވެ ޒަޚަމްވެފައިވާ ބަލި މީހުން ގޮވައިގެން ހޮސްޕިޓަލަށް ސީދާ އާދެވޭ ގޮތަށް އޮތީ އެންމެ މަގެކެވެ.

ނަބާލް އިތުރަށް ބުނީ މިހާރުވެސް 500ށް ވުރެ ގިނަ ބަލި މީހުން ހޮސްޕިޓަލުގައި އެބަތިބިކަމަމަށާއި އައިސީޔޫގައި 15 ބަލި މީހުން އެބަތިބި ކަމަށެވެ. އަލަށް ވިހާފައިވާ ތުއްތު ކުދިން އިންކިޔުބޭޓަރުތަކުގައި އެބަތިބިކަމަށާއި އެތައް ބަޔަކު ޒަޚަމްވެފައިވާކަމަށެވެ.

ފަލަސްތީން ރެޑް ކްރެސެންޓުން ބުނީ އިތުރު އެއްވެސް ގޮތެއް ނެތްކަމަށާއި ހޮސްޕިޓަލަށް ތެޔޮ ނުލިބިއްޖެނަމަ ޚިދުމަތްތައް ދިނުން ހުއްޓޭނެކަމަށް ބުނަމުން އަންނަތާ ދެ ހަފްތާ ވެއްޖެކަމަށެވެ. ނަމަވެސް އިސްރާއީލުން ޣައްޒާގެ ތެރެއަށް ތެޔޮ އެތެރެކުރުމަށް ދެކޮޅު ހަދަމުން އަންނަކަމަށެވެ.

އިސްރާއީލުން ވަނީ ޣައްޒާއަށް ކާނާ އާއި ފެނާއި ކަރަންޓް ނުލިބޭ ގޮތަށް ބަންދުކޮށްފައެވެ. މިހާރު ހަމައެކަނި އެހީ އެތެރެވަނީ ރަފަހް ބޯޑަރުންނެވެ.

ޣައްޒާގެ ހެލްތު މިނިސްޓްރީން ބުނެފައިވާ ގޮތުގައި ހަމަލާތަކުގެ ސަބަބުން އިމާރާތް ހަލާކުވެގެންނާއި ތެޔޮ ހުސްވުމުގެ ސަބަބުން ފަލަސްތީނުގެ 18 ހޮސްޕިޓަލަކުން މިހާރު ޚިދުމަތްދެމުން ނުދެއެވެ.