އިންޑިޔާގެ އޮޑިޝާ އަތުން މިއަދު މާލޭގައި 3-2އިން ބަލިވެ، އޭއެފްސީ ކަޕް ފުޓްބޯޅަ މުބާރާތުގެ ދެ ވަނަ ބުރަށް ދިއުމުގެ ފުރުސަތު މުޅިން ކަހަލަ ގޮތަކަށް މާޒިޔާ އަށް ބަންދުވެއްޖެ އެވެ.

ބިދޭސީ ހަ ކުޅުންތެރިންނާއި ރާއްޖޭގެ ގައުމީ ޓީމުގެ 15 ކުޅުންތެރިން ހިމަނައިގެން މާޒިޔާއިން ގަދަ ޓީމެއް މި ސީޒަނަށް އެކުލަވާލީ އެ ކުލަބުން އޭއެފްސީ ކަޕުގެ ދެ ވަނަ ބުރަށް ދިއުމަށް އެ ކުލަބުން ދެމުން އަންނަ ޒަމާންވީ ހުވަފެން ހަގީގަތަކަށް ހެދުމަށެވެ. ނަމަވެސް މި ފަހަރު ވެސް މިކަން ނުވާނެކަން ކަށަވަރުވީ ކުޅުނު ހަތަރު މެޗުގެ ތެރެއިން ތިން މެޗުން ބަލިވުމުންނެވެ. ގްރޫޕް ސްޓޭޖުގައި ބާކީ އޮތީ ދެ މެޗެވެ. މި ދެ މެޗު ކާމިޔާބު ކޮށްގެން ވެސް މާޒިޔާ އަށް ދެ ވަނަ ބުރަށް ދެވޭނެ ކަމުގެ ޔަގީންކަމެއްނެތެވެ. އަދި މިހާރު އޮތް ހަނިފުރުސަތު ބަނގްލަދޭޝްގެ ބަޝުންދުރަ ކިންގް އަތުން މިރޭ އިންޑިޔާގެ މޯހަން ބަގާންމޮޅުވެއްޖެނަމަ މުޅިން ބަންދުވާނެ އެވެ.

އެއީ އެއިރުން މޯހަން ބަގާންއަށް 10 ޕޮއިންޓްހަމަވާނެތީ އެވެ. މިވަގުތު އެ ޓީމަށް ލިބިފައިވަނީ ހަތް ޕޮއިންޓެވެ. ދެ ވަނައިގައި އޮޑީޝާ އޮތީ މާޒިޔާ އަތުން މާލޭގަ އާއި އިންޑިޔާގައި މޮޅުވެގެން ލިބުނު ހަ ޕޮއިންޓާއެކުގަ އެވެ. ބަޝުންދުރަ އަށް ހަތަރު ޕޮއިންޓް އަދި މާޒިޔާ އަށް ލިބިފައިވަނީ ތިން ޕޮއިންޓެވެ. ބާކީ އޮތް ދެ މެޗުން މޮޅުވެގެން މާޒިޔާ އަށް ގިނަވެގެން ހަމަކުރެވޭނީ ނުވަ ޕޮއިންޓެވެ.

މިއަދުގެ މެޗުގައި ފުރަތަމަ ދެ ގޯލު ޖެހީ މާޒިޔާ އެވެ. މެޗުގެ ފުރަތަމަ ގޯލު ޖެހީ ދެ ވަނަ މިނިޓްގައި ހަސަން ނާއިޒް (ދާދު) އެވެ. ލީޑު ފުޅާކޮށްދިނީ ޕެނަލްޓީ އަކުން ބަލަބޮނޮވިޗް 26 ވަނަ މިނިޓްގަ އެވެ. އޮޑީޝާއިން ގޯލު ޖަހަން ފެށީ 65 ވަނަ މިނިޓްގަ އެވެ. މޫރްޓަޑާ ފޯލް ޖެހި ގޯލަށް ފަހު ނަތީޖާ ހަމަހަމަވީ 72 ވަނަ މިނިޓްގައި ޑިއެގޯ މައުރީސިއޯ ޖެހި ގޯލުންނެވެ. މާޒިޔާ އަށް ތިން ޕޮއިންޓް ގެއްލުނީ މެޗު ނިމެން ފަސް މިނިޓަށްވީ ފަހުން ރޯއި ކްރިޝްނާ ޖެހި ގޯލުންނެވެ.

އިންޑިޔާގައި މި ދެ ޓީމު ކުޅުނު މެޗުން އޮޑީޝާ މޮޅުވީ 6-1އިންނެވެ. މިއީ އޭއެފްސީ ކަޕުގައި މާޒިޔާގެ އެންމެ ދެރަ ނަތީޖާ އެވެ.

މި މެޗަށް މާޒިޔާ ނުކުތީ އޮކްޓޫބަރު މަހުގެ 24ގެ ފަހުން މެޗެއް ނުކުޅެ އެވެ. މި މުއްދަތުގައި އިންޑިއަން ސުޕަ ލީގުގައި އެކަނި ވެސް އޮޑީޝާ ތިން މެޗު ކުޅުނެވެ. މި ތަފާތު މެޗުގެ ކުރިން ދެ ޓީމުގެ ކޯޗުން ވެސް ފާހަގަކުރި އެވެ.