މާޒިޔާ އަށް މެޗެއް ނެތް، އޮޑިޝާ އަށް މެޗު ގިނަވެފައި

އޭއެފްސީ ކަޕުގައި މިއަދު ރާއްޖޭގެ މާޒިޔާ އާއި އިންޑިޔާގެ އޮޑިޝާ ފުޓްބޯޅަ ކުލަބު ބައްދަލުކުރާ ދެ ޓީމަށް ތަފާތު ދެ ހާލަތެއް މެދުވެރިވެއްޖެ އެވެ.

އިންޑިޔާގެ އައިލީގުގައި ވާދަކުރާ އޮޑިޝާ އަށް ގާތްގާތުގައި މެޗު ކުޅެން ޖެހުމުން ވަނީ އުނދަގޫތަކެއް ކުރިމަތިވެފަ އެވެ. މިއާ ޚިލާފަށް ރާއްޖޭގެ ލީގު ހުއްޓާލާފައި އޮތުމުން މާޒިޔާ އަށް މި މުހިންމު މެޗާ ކުރިމަތިލާން ޖެހިފައވަނީ މެޗެއް ނުކުޅެ އެވެ. މާޒިޔާ އެންމެ ފަހުން ކުޅުނު މެޗަކީ އޮކްޓޫބަރު މަހުގެ 24 ވަނަ ދުވަހު އޮޑިޝާއާ ދެކޮޅަށް އިންޑިޔާގައި ކުޅުނު މެޗެވެ. މި މެޗު 6-1އިން ކާމިޔާބުކުރީ އޮޑިޝާ އެވެ.

އެ ދުވަހުން ފެށިގެން މިއަދާ ހަމައަށް އޮޑިޝާ ވަނީ އިންޑިއަން ސުޕަލީގުގައި ތިން މެޗު ކުޅެފަ އެވެ. މީގެ ތެރެއިން ދެ މެޗު އެ ޓީމުން ކާމިޔާބު ކުރި އެވެ.

މާޒިޔާ އާއި އޮޑިޝާ އަށް މިއަދު ކުޅޭ މެޗުން މޮޅުވުން ދެ ޓީމަށް ވެސް މުހިންމެވެ. މި ދެ ޓީމު ހިމެނޭ ގްރޫޕް ޑީގައި ކޮންމެ ޓީމެއް ތިން މެޗު ކުޅުނުއިރު މިވަގުތު މި ދެ ޓީމަށް ވެސް ލިބިފައިވަނީ ތިން ޕޮއިންޓެވެ. ގޯލުގެ ތަފާތުން ތިން ވަނަ އޮޑިޝާ އަށް އަދި ޓޭބަލުގެ ފުލުގައި އޮތީ މާޒިޔާ އެވެ. ދެ ވަނާގައި ބަނގްލަދޭޝްގެ ބަޝުންދުރަ ކިންގްސް އޮތީ ހަތަރު ޕޮއިންޓާއެކުގަ އެވެ. އެއްވަނާގައިވާ އިންޑިޔާގެ މޯހަން ބަގާނަށް ލިބިފައިވަނީ ހަތް ޕޮއިންޓެވެ. މިހެންވެ މުބާރާތުގައި ކުރިއަށް ދިއުމަށް މިއަދުގެ މެޗުން މޮޅުވެވިއްޖެނަމަ މާޒިޔާ އަށް ގާތްގަނޑަކަށް މުބާރާތް ނިމުނީ އެވެ.

އޮޑިޝާގެ ކޯޗު ސާޖިއޯ ލޮބެރާ ވެސް އޭނާގެ ޓީމަށް ވަނީ ގާތްގާތުގައި މެޗު ކުޅެން ޖެހޭކަން ފާހަގަކޮށްފަ އެވެ.

އޭނާ އަދި ބުނީ މާލޭގައި ކުޅޭ މެޗަކަށްވުމުން މި މެޗު އުނދަގޫވާނެކަން އެނގޭ ކަމަށާއި ނަމަވެސް އޭނާގެ ޓީމުގައި މޮޅު ކުޅުންތެރިން އެބަތިބި ކަމަށެވެ.

އޭއެފްސީ ކަޕަކީ މާޒިޔާ ވެސް އެންމެ އިސްކަންދީފައިވާ މުބާރާތެވެ. ރާއްޖޭގެ ގައުމީ ޓީމުގެ 15 ކުޅުންތެރިންނާއި ބިދޭސީ ހަ ކުޅުންތެރިން ތިބި މާޒިޔާގެ އަމާޒަކީ އޭއެފްސީ ކަޕުގެ ދެ ވަނަ ބުރަށް ދަތުރުކުރުމެވެ.