ކުޑަކުދިންނަށް ޖިންސީ ގޯނާކުރާ މީހުންގެ ދަފްތަރަށް ޚިޔާލު ހުށަހަޅަން ބޭނުންވާ ފަރާތްތަކަށް އެ ފުރުސަތު ހުޅުވާލައިފިއެވެ.

ކުޑަކުދިންނަށް ޖިންސީ ގޯނާ ކުރާމީހުންގެ އަދާހަމަ ދަފްތަރު ޑިޖިޓަލައިޒްކުރުމާއި ގުޅިގެން ވަރަށް ގިނަ ފަރާތްތަކުން މަޢުލޫމާތު ހޯދަން އެދެމުންދާ ކަަމަށް ޗައިލްޑް ޕްރޮޓެކްޝަން އެޖެންސީ އިން ވަނީ ބުނެފައެވެ. އަދި އެ ކަމާއި ގުޅިގެން މަޢުލޫމާތު ހޯދުމަށާއި އަދި މި ދަފްތަރު އިތުރަށް ފުރިހަމަ ކުރައްވަން ޚިޔާލު ހުށަހެޅުމަށް، [email protected] އަށް އީމެއިލް ކުރެއްވުމަށް ނުވަތަ މިސަރވިސްގެ ނަންބަރު 3027576 އަށް ގުޅުއްވުމަށް އެ އިދާރާއިން ވަނީ އެދިފައެވެ.

ޕްރޮސިކިއުޓަރ ޖެނެރަލްގެ އޮފީހުގެ އެހީތެރިކަމާއެކު ކުޑަކުދިންނަށް ޖިންސީ ގޯނާކުރާ މީހުންގެ ދަފްތަރު ލިސްޓު ޑިޖިޓަލައިޒްކޮށްފައި ވަނީ އާދިއްތަ ދުވަހުއެވެ.

މި ލިސްޓަކީ ޗައިލްޑް އެންޑް ފެމެލީ ޕްރޮޓެކްޝަން ސަރވިސް ސީ.އެފް.ޕީ.އެސް އިން އަދާހަމަކޮށް ބަލަހައްޓަމުން ގެންދާ ލިސްޓެކެވެ.

މިއީ އާއްމުންނަށް މިހާ ފަސޭހައިން އެފަދަ މައުލޫމާތު ފެންނަ ގޮތަށް މި ލިސްޓް އާއްމުކުރި ފުރަތަމަ ފަހަރެވެ.

ފުރަތަމަ ފަހަރަށް 2018 ވަނަ އަހަރު އެކުލަވާލި ކުޑަކުދިންނަށް ޖިންސީ ގޯނާކުރާ މީހުންގެ ދަފްތަރުގައި އެފަދަ ކުށްތައް ކުރާ މީހުންގެ ވަނަވަރު ވަނީ ހިމަނާފައެވެ.

ދަފްތަރުގައި ހިމެނޭ މައުލޫމާތަށް ބަލާއިރު އެ މީހަކު ކުރި ކުށުގެ ބާވަތާއި، ޙުކުމް ތަންފީޒުކޮށް ނިމޭ ތާރީޚް ފަދަ މުހިންމު މަޢުލޫމާތުތައް އެ ދަފްތަރުގައި ހިމެނެއެވެ.

ދަފްތަރުގައި ހިމެނޭ މީހާ ހުރި ތަން ފިޔަވައި، އެހެން ހުރިހާ މަޢުލޫމާތުތަކަކީ ޕްރޮސެކިއުޓަރ ޖެނެރަލްގެ އޮފީސް (ޕީ.ޖީ އޮފީސް) އިން ފޯރުކޮށްދެއްވުމުން، ޗައިލްޑް އެންޑް ފެމެލީ ޕްރޮޓެކްޝަން ސަރވިސް އިން ޝާއިޢުކުރާ މަޢުލޫމާތުތައްކަން ފާހަގަކޮށްލެވެއެވެ.

ޕީ.ޖީ އޮފީހުން ފޯރުކޮށްދެއްވާ މަޢުލޫމާތު ބިނާވާނީ، ޝަރުޢީ ކޯޓަކުން ނިންމާ ޙުކުމްގެ މައްޗަށް ބިނާކޮށެވެ.

https://offenders.mv/އިން ކުޑަކުދިންނަށް ޖިންސީ ގޯނާކުރާ މީހުންގެ ދަފްތަރު ބަލާލެވޭނެއެވެ.