ފުށިދިއްގަރު ފަޅު ހިއްކަން އެމްޓީސީސީއާ ހަވާލުކޮށްފިނަމަ 40 މިލިއަން ޑޮލަރު ސަލާމަތްކުރެވޭނެ: އާޒިމް
އެމްޓީސީސީއަކީ އިންޖިނިއަރިންގގެ ދާއިރާއިން މި ސަރަހައްދުގައި އޮތް އެންމެ ކުރިއަރާފައިވާ ކުންފުންޏަށް ހެދުމަކީ އަމާޒެއް
އެމްޓީސީސީގެ ސީއީއޯ، އާދަމް އާޒިމް
ފުށިދިއްގަރު ފަޅު ހިއްކަން އެމްޓީސީސީއާ ހަވާލުކޮށްފިނަމަ 40 މިލިއަން ޑޮލަރު ސަލާމަތްކުރެވޭނެކަމަށް، އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
އާދިއްތަ ދުވަހުގެ ރޭ ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅުދައްކަވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ، އެމްޓީސީސީއަކީ އިންޖިނިއަރިންގގެ ދާއިރާއިން މި ސަރަހައްދުގައި އޮތް އެންމެ ކުރިއަރާފައިވާ ކުންފުންޏަށް ހެއްދެވުމަކީ އަމާޒެއްކަމަށާއި، އެ އަމާޒަށް ވާސިލްވުމަށްޓަކައި ކޮންމެ އަހަރަކު މިލިއަން ރުފިޔާގެ ބަޖެޓެއް އެކަމަށް ކަނޑައަޅާކަމަށެވެ.
އެގޮތުން، މިއަދު ރާއްޖޭގައި ހިންގޭ ބޮޑެތި މަޝްރޫއުތައް ހިންގުމުގެ ގާބިލްކަން އެމްޓީސީސީގައި ހުރިކަން އާޒިމް ފާހަގަކުރެއްވިއެވެ.
އޭގެ މިސާލެއްގެ ގޮތުގައި ފުށިދިއްގަރު ފަޅު ނަންގަވަމުން އާޒިމް ވިދާޅުވީ، ފުށި ދިއްގަރު ފަޅުގެ 1260 ހެކްޓަރު ހިއްކުމުގެ މަސައްކަތް އެމްޓީސީސީއާ ހަވާލުކޮށްފިނަމަ، މަދުވެގެން 40 މިލިއަން ޑޮލަރު ރާއްޖޭގައި ހިފެހެއްޓޭނެކަަމަށެވެ.
އާޒިމް އިތުރަށް ވިދާޅުވީ، ގައުމީ ވިސްނުން އިސްކުރައްވައިގެން ވެރިކަމަށް ހޮވިވަޑައިގެންނެވި ބޭފުޅުން، ގައުމީ ވިސްނުން އިސްކުރައްވައި، ގައުމުގައި ހިންގޭ އެންމެ ބޮޑު އެއް ޕްރޮޖެކްޓް އެމްޓީސީސީއާ ހަވާލުކުރައްވާނެކަމަށް އުއްމީދު ކުރައްވާކަމަށެވެ.
