އެމްބާޕޭއާ މަޝްވަރާ ކުރަމުންދާ ކަމަށް ދެކެވޭ ވާހަކަތައް ރެއާލުން ދޮގު ކޮށްފި
ޕީއެސްޖީގެ އެއްބަަސްވުމުގައި ހުރި އެއްވެސް ކުޅުންތެރިޔަކާ އެފަދަ މަޝްވަރާތަކެއް ކުރަމުން ނުދާ ކަމަށް އެ ކުލަބުން ވަނީ ބުނެފައި
ޕީއެސްޖީ އަށް ކުޅެމުން އަންނަ ފްރާންސްގެ ކީލިއަން އެމްބާޕޭ
ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ކީލިއަން އެމްބާޕޭ ގެނައުމަށް ރެއާލް މެޑްރިޑުން އޭނާ އާއެކު މަޝްވަރާ ކުރަމުންދާ ކަމަށް މީޑިއާ ތަކުގައި ބުނެފައިވާ ވާހަކަތައް ރެއާލުން ދޮގު ކޮށްފި އެވެ.
ޕީއެސްޖީ އާއެކު އެމްބާޕޭ ހަދާފައިވާ އެއްބަސްވުމުގެ މުއްދަތު އަންނަ އަހަރުގެ ޖޫން މަހުގެ ނިޔަލަށް ހަމަވާއިރު، އޭނާ ހޯދުމުގެ ޝައުޤުވެރިކަން މީގެ ކުރިން ރެއާލުން ވަނީ ފާޅުކޮށްފަ އެވެ. ރެއާލަށް ބަދަލުވުމާ ގާތަށް އެމްބާޕޭ ދިޔަ ކަމަށް މީޑިއާ ތަކުން ވަނީ ބުނެފަ އެވެ. ނަމަވެސް ޕީއެސްޖީގެ ބޮޑެތި ހުށަހެޅުންތަކާއެކު އެމްބާޕޭ ވަނީ އެކުލަބުގެ އެއްބަސްވުން އައު ކޮށްފަ އެވެ. ބޭރުގެ ބައެއް މީޑިއާ ތަކުގައި ބުނެފައިވާ ގޮތުން، އެމްބާޕޭ ގެނައުމަށް ރެއާލުން ދަނީ އަނެއްކާ ވެސް އޭނާ އާއެކު މަޝްވަރާތައް ކުރިއަށް ގެންދަމުންނެވެ.
ނަމަވެސް، ރެއާލުން ވަނީ އެކަން ދޮގުކޮށް ބަޔާނެއް ނެރެފަ އެވެ. ރެއާލުން ނެރުނު ބަޔާނުގައި ބުނެފައި ވަނީ އެމްބާޕޭއާ ރެއާލާ ގުޅުވައިގެން މީޑިއާ ތަކުގައި އެކި ކަހަލަގެ ވާހަކަތައް ފަތުރަމުން އަންނަ ކަމަށެވެ. ނަމަވެސް އެ ކުލަބުން ހާމަކުރަން ބޭނުންވަނީ އެއީ އެއްވެސް ކަހަލަ ތެދެއް އެކުލެވިގެން ނުވާ، ދޮގު ވާހަކަތަކެއް ކަމަށެވެ. ޚާއްސަކޮށް ޕީއެސްޖީގެ އެއްބަަސްވުމުގައި ހުރި އެއްވެސް ކުޅުންތެރިޔަކާ އެފަދަ މަޝްވަރާތަކެއް ކުރަމުން ނުދާ ކަމަށް އެ ކުލަބުން ވަނީ ބުނެފަ އެވެ.
ދާދި ފަހުން އެމްބާޕޭ ވަނީ ޕީއެސްޖީގެ އެއްބަސްވުން އައު ނުކުރަން ނިންމައި، އެ ކުލަބުގެ ވެރިންނަށް އެކަން އަންގައިފަ އެވެ. އެއާއެކު ޕީއެސްޖީން ވަނީ އެމްބާޕޭ އަށް ދަތިކުރުމުގެ ފިޔަވަޅުތައް ވެސް އަޅައިފަ އެވެ. އެގޮތުން ޕީއެސްޖީގެ ފުރަތަމަ ޓީމުގެ ސްކޮޑުން އެމްބާޕޭ އުނި ކުރި އެވެ. އެއާއެކު ޕީއެސްޖީގެ ރައީސް ވަނީ އެމްބާޕޭއާ ބައްދަލުކޮށް، މަޝްވަރާތައް ކުރިއަށް ގެންގޮސްފަ އެވެ. އޭގެ ފަހުން އެމްބާޕޭ ވަނީ ޕީއެސްޖީގެ ފަރިތަކުރުންތަކާއި، މެޗުތަކުގައި ބައިވެރިވާން ފަށައިފަ އެވެ. ފްރާންސްގެ މީޑިއާ ތަކުގައި ބުނެފައިވާ ގޮތުން އެމްބާޕޭ ވަނީ ޕީއެސްޖީ އާއެކު ސުލްހަވާން ނިންމައިފަ އެވެ.
