މިސީޒަންގެ އިނގިރޭސި ޕްރިމިއަރ ލީގުގައި އާސެނަލް ބަލިކުރި ފުރަތަމަ ޓީމަކަށް, ނިއުކާސަލް ޔުނައިޓެޑް ވެއްޖެއެވެ.

ނިއުކާސަލް އިން އަމިއްލަ ދަނޑުގައި އާސެނަލް ބަލިކުރީ 1-0 ނެވެ. މެޗުގެ ހަމައެކަނި ލަނޑު ޖެހީ ގޯޑޮން އެވެ. އެންތަނީ ގޯޑޮން ލަނޑު ޖެހީ 64 ވަނަ މިނިޓްގައި ޖޮއެލިންޓަން ތަނަވަސްކޮށްދިން ފުރުޞަތެއްގައެވެ. ލަނޑު ބަލައިގަތީ ވީއޭއާރުން ވެސް ބެލުމަށްފަހުއެވެ. މިއީ މިސީޒަންގެ ލީގުގައި ކުޅުނު ފުރަތަމަ 11 މެޗުން އާސެނަލްގެ ފުރަތަމަ ބައްޔެވެ ފުރަތަމަ ބައްޔާއެކު އާސެނަލް ވަނީ 24 ޕޮއިންޓާއެކު ތާވަލްގެ ތިންވަނާގައެވެ. އެއްވަނާގައި އޮތް މެންޗެސްޓަރ ސިޓީއާ ދެމެދު ތިން ޕޮއިންޓްގެ ފަރަގެއް އެބައޮތެވެ.

ލީގުގައި އެވަޓަންއާއި ބްރައިޓަން ވާދަކުރި މެޗު ނިމުނީ 1-1 ން އެއްވަރު ވެގެންނެވެ. ތާވަލްގެ ފުލުގައި އޮތް ޝެފީލްޑް ޔުނައިޓެޑް ވަނީ 2-1 ން ވުލްވްސް ބަލިކޮށްފައެވެ. މިއީ މިސީޒަންގެ ލީގުގައި ޝެފީލްޑް ޔުނައިޓެޑްގެ ފުރަތަމަ މޮޅެވެ. މޮޅާއެކުވެސް އެޓީމަށް ލީގު ތާވަލްގެ ފުލުން ސަލާމަތެއް ނުވެވުނެވެ.