ލަސް ޕަލްމާސް އަތުން ބަލިވެ އެތުލެޓިކޯ އިން ފުރުސަތު ނަގާލައިފި

ސްޕެނިޝް ލީގުގައި ލަސް ޕަލްމާސާ ދެކޮޅަށް ކުޅުނު މެޗުން ބަލިވެ، ލީގު ތާވަލްގެ ކުރިއަށް ޖެހިލަން ލިބުނު ފުރުސަތު އެތުލެޓިކޯ މެޑްރިޑުން ނަގާލައިފި އެވެ.

ލީގުގައި ހޮނިހިރު ދުވަހުގެ ރޭ ލަސް ޕަލްމާސްގެ ދަނޑުގައި އެ ޓީމާ ދެކޮޅަށް ކުޅުނު މެޗުން އެތުލެޓިކޯ ބަލިވީ 2-1 އިންނެވެ. މެޗުގައި ފުރަތަމަ ދެ ލަނޑު ޖަހައި ކުރި ހޯދީ ވެސް ލަސް ޕަލްމާސް އިންނެވެ. އެ ޓީމުން މެޗުގައި ލީޑު ނެގީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ހަ ވަނަ މިނެޓުގައި ލަސް ޕަލްމާސް އަށް ލީޑު ނަގައިދިނީ ކިރިއަން ރޮޑްރިގޭޒް އެވެ. އޭނާ އެ ލަނޑު ޖެހީ އަލްބާޓޯ މޮލެއިރޯ ތަނަވަސްކޮށްދިން ފުރުސަތެއްގަ އެވެ. އޭގެ ފަހުން 75 ވަނަ މިނެޓުގައި އެ ޓީމަށް ލީޑު ފުޅާކޮށްދިނީ ބެނިޓީ ރަމިރޭޒް އެވެ. އޭނާ މެޗުގައި ކުޅެން ނުކުމެފައި ވަނީ ބަދަލު ކުޅުންތެރިޔެއްގެ ގޮތުގަ އެވެ. އޭނާ އެ ލަނޑު ޖެހީ މުނީރު އަލް ހައްދާދީ ތަނަވަސްކޮށްދިން ފުރުސަތެއްގަ އެވެ. ލަސް ޕަލްމާސް އިން ދެ ލަނޑު ޖެހި ފަހުން، އެތުލެޓިކޯގެ ހަމައެކަނި ލަނޑު 83 ވަނަ މިނެޓުގައި ޖެހީ އަލްވާރޯ މޮރާޓާ އެވެ.

މިއީ މި ސީޒަންގެ ލީގުގައި އެތުލެޓިކޯގެ ދެ ވަނަ ބައްޔެވެ. މިހާތަަނަށް ކުޅުނު 11 މެޗުން އެ ޓީމު ވަނީ އަށް މެޗުން މޮޅުވެފަ އެވެ. އެއް މެޗު އެއްވަރުވެފައިވާއިރު، ބަލިވީ ދެ މެޗުންނެވެ.