އައްޑޫ ސިޓީ އާއި ފުވައްމުލައް ސިޓީގައި ހިނގި އަލިފާނުގެ ދެހާދިސާއެއްގައި ރޯވި ދެއަލިފާން ގަނޑު އެމްއެންޑީއެފުން ނިއްވާލައިފިއެވެ.

އެމްއެންޑީއެފުން ބުނި ގޮތުގައި އައްޑޫސިޓީގައި އަލިފާން ރޯވީ ހިތަދޫ ކުޑަކުދިންގެ ޕާކު ކުރިމަތީ ހުރި ކުނިތަކެއްގައެވެ. އެ ހާދިސާގެ މައުލޫމާތު ލިބުމާއެކު އެމްއެންޑީއެފް ސަދަން އޭރިއާ ކޮމާންޑް، ހިތަދޫ ފަޔަރ ސްޓޭޝަނުގެ ފަޔަރފައިޓަރުން ހަރަކާތްތެރިވެ، އަލިފާން ނިއްވާލައިފައިވާ ކަމަށް އެމްއެންޑީއެފުން ބުނެފައިވެއެވެ.

ފުވައްމުލަކު ދިގުވާޑު އަވަށުގެ ޗަސް ބިމުގައި ވެސް އަލިފާން ރޯވެފައިވާއިރު، އެމްއެންޑީއެފް ސަދަން އޭރިއާ ކޮމާންޑް، ޏ. ފުވައްމުލަކު ފަޔަރ ސްޓޭޝަނުގެ ފަޔަރފައިޓަރުން ހަރަކާތްތެރިވެ ނިއްވާލިއިރު އެ ހާދިސާގެ މައުލޫމާތު އެ އިދާރާއަށް ލިބުނީ ހުކުރު ދުވަހުގެ މެންދުރު 2:00 އެހާއިރުއެވެ. އެ ސަރަހައްދަށް ފަޔަރފައިޓަރުން ގޮސް ކުރި މަސައްކަތުން ރޯވެފައިހުރި އަލިފާން ނިއްވާލާފައިވަނީ 2:45 އެހާއިރު ކަމަށް އެމްއެންޑީއެފުން މައުލޫމާތު ދީފައި ވެއެވެ.

މި ދެ ހާދިސާގައި ވެސް އެއްވެސް މީހަކަށް އަނިޔާއެއް ލިބިފައެއް ނުވާ ކަމަށް އެމްއެންޑީއެފުން ބުނެފައި ވެއެވެ.