ސްޕޭނުގެ މުއްސަދި ކުލަބު ރެއާލް މެޑްރިޑަށް ފާއިތުވެދިޔަ ސީޒަނުގައި 12 މިލިއަން ޔޫރޯގެ ފައިދާއެއްވެއްޖެ އެވެ.

ދެ ޕްލޭބުކްއިން ބުނީ ކުލަބުގެ އަހަރީ އާއްމު ޖަލްސާގައި މިކަން ރެއާލްގެ ރައީސް ފްލޮރެންޓީނޯ ޕެރޭޒް އިއުލާނުކުރާނެ ކަމަށެވެ. މިދިޔަ ސީޒަނުގައި ރެއާލްއަށް ލިބިފައިވަނީ 843 މިލިއަން ޔޫރޯގެ އާމްދަނީއެކެވެ. މިއީ އޭގެ ކުރީ ސީޒަނުގައި ލިބުނު 757 މިލިއަން ޔޫރޯއަށްވުރެ ބޮޑު އަދަދެކެވެ.

ރެއާލްގެ އާމްދަނީގެ 54 ޕަސެންޓް ހޭދަކުރަނީ ކުޅުންތެރިންނާއި ކުލަބުގެ މުވައްޒަފުންގެ މުސާރައަށެވެ. އެކުލަބުގެ އައު ސްޓޭޑިއަމާއެކު ލިބޭ މާކެޓިން އަދި ވިޔަފާރީގެ އާމްދަނީ ވަނީ ރެކޯޑް އަދަދަކަށް މައްޗަށް ޖެހިފަ އެވެ. ސްޓޭޑިއަމުގެ އަޕްގްރޭޑިން މަސައްކަތް އަދި އެއްކޮށް ނިންމާނުލެވެ އެވެ. މިހެންވެ އެ ކުލަބުން ލަފާކުރަނީ ސްޓޭޑިއަމް އެއްކޮށް ނިންމާލެވުމާއެކު ލިބޭ އާމްދަނީ އަދިވެސް އިތުރުވެގެންދާނެ ކަމަށެވެ. މި ގޮތުން ރެއާލްގެ ދަނޑުގައި ރަގްބީ ލީގު ކުޅެން މިހާރު ދަނީ މަޝްވަރާކުރަމުންނެވެ. އެކުލަބުން ގަބޫލުކުރާ ގޮތުގައި ގައުމީ ރަގްބީ ލީގު ކުޅޭ މައި ސްޓޭޑިއަމަށް ބާނަބައު ހެދިއްޖެނަމަ އެއީ އަނެއްކާ ވެސް ކުލަބު ލިބޭ އާމްދަނީ އިތުރުވެގެންދާނެ ސަބަބެވެ.

ރެއާލް މެޑްރިޑުގެ ދަރަނި ވެސް ކުޑައެއްނޫނެވެ. އެކުލަބުން ސްޓޭޑިއަމުގެ މަރާމާތުކޮށް ބޮޑު ބަދަލެއް ގެނައުމުގެ މަސައްކަތް ފެށީ 800 މިލިއަން ޔޫރޯގެ ލޯނެއް ނެގުމަށްފަހު އެވެ. އަދި އިންޓަރެސްޓާއެކު މިއަދަދު 1.2 ބިލިއަނަށް އަރާނެ އެވެ. މިހެންވެ ކުރިއަށް އޮތް ތިން އަހަރަކީ މި ލޯނު ދެއްކުމަށް އިތުރު އާމްދަނީ ހޯދުމަށް ކުލަބުން މަސައްކަތް ކުރާނެ ދުވަސްތަކަކަށްވާނެ އެވެ.